ରଥଯାତ୍ର ସପକ୍ଷରେ ପିଟିସନ ଦାଖଲ କରି ଚର୍ଚ୍ଚାକୁ ଆସିଥିବା ମୁସଲମାନ ଭକ୍ତ ଅଫତାବ୍ ସମ୍ବର୍ଦ୍ଧିତ

ଶାନ୍ତସ୍ୱରୂପ ରାଉତ, ଭୁବନେଶ୍ୱର: ଯେତେବେଳେ କୋରୋନା ଯୋଗୁ ରଥଯାତ୍ରା ବନ୍ଦ ନେଇ ଦେଶର ସର୍ବୋଚ୍ଚ ଅଦାଲତ ଶୁଣାଣି କରିଥିଲେ, ସେତେବେଳେ ବିଶ୍ୱପ୍ରସିଦ୍ଧ ରଥଯାତ୍ରା ସପକ୍ଷରେ ମତ ରଖିଥିଲେ ମହାପ୍ରଭୁଙ୍କ ଜଣେ ମୁସଲମାନ ଭକ୍ତ । ଆଉ ଏଥିପାଇଁ ସୁପ୍ରିମକୋର୍ଟରେ ପିଟିସନ ମଧ୍ୟ ଦାଖଲ କରିଥିଲେ । ରଥଯାତ୍ରାକୁ କଟକଣା ଭିତରେ ହେବାକୁ ଅନୁମତି ଦିଆଯାଉ ବୋଲି କୋର୍ଟଙ୍କ ନିକଟରେ ଆବେଦନ କରିଥିଲେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ଭକ୍ତ ଅଫତାବ ହୁସେନ । ଯାହାଙ୍କୁ ଆଜି ଏକ କାର୍ଯ୍ୟକ୍ରମରେ ସମ୍ବର୍ଦ୍ଧିତ କରାଯାଇଛି । 

ଖଣ୍ଡଗିରି ସ୍ଥିତ ଶିବାନନ୍ଦ ସେନେଟାରୀ ବାଳକ ଉଚ୍ଚ ବିଦ୍ୟାଳୟରେ ଅୟୋଜିତ ଏକ ଆଲୋଚନା ଚକ୍ରରେ ଅଫତାବ ସମ୍ବର୍ଦ୍ଧିତ ହୋଇଛନ୍ତି । ମହାପ୍ରଭୁଙ୍କ ସଂସ୍କୃତି ଓ ପରମ୍ପରା ବିଷୟରେ ଏହି ଆଲୋଚନା ଚକ୍ର ଚାଲିଥିଲା । ମୁଖ୍ୟ ଅତିଥି ଭାବେ ଜଗନ୍ନାଥ ରିସର୍ଚ୍ଚ ଇନଷ୍ଟିଚ୍ୟୁଟର ସଭାପତି ସୁରେନ୍ଦ୍ର ନାଥ ଦାସ ଯୋଗ ଦେଇ ଜଗନ୍ନାଥ ସଂସ୍କୃତିର ମହନୀୟତା ଉପରେ ଆଲୋକପାତ କରିଥିଲେ । ବିଦ୍ୟାଳୟ ପରିଚାଳନା କମିଟି ସଦସ୍ୟ ରାଜୀବ ଶେଖର ସାହୁ କାର୍ଯ୍ୟକ୍ରମକୁ ପରିଚାଳନା କରିଥିଲେ ।