ଜିଏସଟିକୁ ନେଇ ତେଜୁଛି ରାଜନୀତି

ମଳୟ ରଞ୍ଜନ ମହାନ୍ତି, ଭୁବନେଶ୍ୱର: ଜିଏସଟି (GST) କୁ ନେଇ ରାଜନୀତି (Politics) ତୀବ୍ର ହୋଇଛି। ଜିଏସଟି (GST) ଆଇନ ଅନୁଯାୟୀ କେନ୍ଦ୍ର ସରକାର (Central Government) ବିଭିନ୍ନ ରାଜ୍ୟକୁ କ୍ଷତିପୂରଣ ରାଶି ଭରଣା କରିବାର ବ୍ୟବସ୍ଥା ଥିବାବେଳେ ଏବେ ଓଡିଶା ସରକାର (Odisha Government) ହଜାର ହଜାର କୋଟି ଟଙ୍କା ଏ ବାବଦକୁ ହରାଉଛନ୍ତି। କିନ୍ତୁ ଏତେ ସବୁ ପରେ ମଧ୍ୟ କାହିଁକି ରାଜ୍ୟ ସରକାର ମୁହଁ ଖୋଲୁ ନାହାନ୍ତି ବୋଲି କଂଗ୍ରେସ ସାମ୍ବାଦିକ ସମ୍ମିଳନୀରେ ପ୍ରଶ୍ନ କରିଛି। କେନ୍ଦ୍ର ସରକାରଙ୍କ ତ୍ରୁଟିପୂର୍ଣ ନୀତି ବିମୁଦ୍ରୀକରଣ (Monetisation) ଏବଂ ଜିଏସଟି (GST) ଲାଗୁ ଯୋଗୁ ଆଜି ଉଭୟ ଦେଶ ଓ ରାଜ୍ୟ ଦୁର୍ଦଶା ଭୋଗୁଛନ୍ତି ବୋଲି କଂଗ୍ରେସ ଅଭିଯୋଗ କରିଛି। 

ଏହା ପରେ ପରେ କୋରୋନା (Corona) ଯୋଗୁ ରାଜ୍ୟର ଅର୍ଥନୀତି ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛି। ଗୋଟିଏ ଟିକସ (Tax) ର ଆଖ୍ୟା ଦେଇ କେନ୍ଦ୍ର ସରକାର ଦେଶରେ ଜିଏସଟି (GST) ଲାଗୁ କରିଥିବାବେଳେ ଏହା ସମ୍ପୂର୍ଣ୍ଣ ଫେଲ ମାରିଛି। ଏପରିକି ଜିଏସଟି ଲାଗୁ ହେଲେ ଟିକସ ଫାଙ୍କି ହେବ ନାହିଁ ବୋଲି କୁହାଯାଉଥିଲେ ମଧ୍ୟ ଲୋକେ ଟିକସ ଫାଙ୍କୁଛନ୍ତି ବୋଲି ଦଳ ଅଭିଯୋଗ କରିଛି। ଜିଏସଟି କ୍ଷତିପୂରଣ ବାବଦରେ ହଜାର ହଜାର କୋଟି ଟଙ୍କା ଓଡିଶା (ODISHA) କୁ କେନ୍ଦ୍ର ସରକାର ଦେଉ ନ ଥିବାବେଳେ ରାଜ୍ୟ ସରକାର କାହିଁକି ଚୁପ ରହିଛନ୍ତି ବୋଲି କଂଗ୍ରେସ (Congress) ର ବରିଷ୍ଠ ନେତା ପଞ୍ଚାନନ କାନୁନଗୋ (Panchanan Kanungo) ସାମ୍ବାଦିକ ସମ୍ମିଳନୀରେ ପ୍ରଶ୍ନ କରିଛନ୍ତି। 

ଜିଏସଟି (GST) ଆଇନର ତଥ୍ୟ ଦେଖାଇ କଂଗ୍ରେସ କହିଛି ଯେ ଆଇନ ଅନୁଯାୟୀ କେନ୍ଦ୍ର ସରକାର ଜିଏସଟି ବାବଦ କ୍ଷତିପୂରଣ ରାଜ୍ୟକୁ ଦେବାକୁ ବାଧ୍ୟ। ତେଣୁ ବିକଳ୍ପ ବ୍ୟବସ୍ଥାରେ ଋଣ କଥା କହି କେନ୍ଦ୍ର ରାଜ୍ୟକୁ ଭଣ୍ଡାଇବା ଆଦୌ ଗ୍ରହଣୀୟ ନୁହେଁ। ଏଭଳି ସ୍ଥିତିରେ ଏ ସମ୍ପର୍କରେ ରାଜ୍ୟ ସରକାରଙ୍କ ସ୍ୱର ଶୁଣିବାକୁ ନ ମିଳିବା ଅର୍ଥ ବିଜେପି ସହ ଓଡିଶା ସରକାର ସମ୍ପୂର୍ଣ୍ଣ ମିଶିକି ଅଛନ୍ତି। ତେଣୁ ରାଜ୍ୟର ବିଜେଡି ସରକାର ରାଜ୍ୟବାସୀଙ୍କ ସ୍ୱାର୍ଥ ପାଇଁ କାମ କରୁଛନ୍ତି ନା କେନ୍ଦ୍ର ସରକାରଙ୍କ ଇସାରାରେ କାମ କରୁଛନ୍ତି ସେ ସମ୍ପର୍କରେ ସ୍ପଷ୍ଟ ଉତ୍ତର ରଖିବାକୁ କଂଗ୍ରେସ ବରିଷ୍ଠ ନେତା ପଞ୍ଚାନନ କାନୁନଗୋ ସାମ୍ବାଦିକ ସମ୍ମିଳନୀରେ ଦାବି କରିଛନ୍ତି। 

ଅନ୍ୟପକ୍ଷରେ ଜିଏସଟି ପ୍ରସଙ୍ଗରେ ରାଜ୍ୟ କ୍ଷତି ସହୁଥିବା ବିଜେଡି (BJD) ସ୍ୱିକାର କରିଛି। କିନ୍ତୁ ରାଜ୍ୟର ସ୍ୱାର୍ଥହାନୀ ହେଲା ଭଳି କୌଣସି କାର୍ଯ୍ୟ କରାଯିବ ନାହିଁ ଏବଂ ଆବଶ୍ୟକ ପଡିଲେ କେନ୍ଦ୍ର ସହ ଲଢେଇ କରାଯିବ ବୋଲି ବିଜେଡି କହିଛି। ଏହା ମୁଖ୍ୟମନ୍ତ୍ରୀ (Chief Minister) ଙ୍କର ନିର୍ଦେଶ। ତେଣୁ ଜିଏସଟି ହେଉ କିମ୍ବା କୌଣସି ପ୍ରସଙ୍ଗରେ ରାଜ୍ୟର ସ୍ୱାର୍ଥହାନୀ ହେଲେ ବିଜେଡି (BJD) ଲଢିବ ବୋଲି ବିଜେଡି ସାଂସଦ ଅମର ପଟ୍ଟନାୟକ (Amar Pattnaik) କହିଛନ୍ତି। ଅନ୍ୟପକ୍ଷରେ କୋରୋନା (Corona) ଭଳି ମହାମାରୀ (Pandemic) ଏବଂ ସଂକଟ ସମୟରେ ସାରା ବିଶ୍ୱରେ ଜିଡିପି (GDP) ଏବଂ ରାଜସ୍ୱ ଆଦାୟ ଆଦି କମିଛି। ଏପରିକି ଜିଏସଟି ବାବଦରେ ଯାହା ଆଦାୟ ହେବା କଥା ତାହା ହୋଇପାରି ନାହିଁ। 

ତେଣୁ ସଂକଟଜନକ ସ୍ଥିତିକୁ ଆଖି ଆଗରେ ରଖି କେନ୍ଦ୍ର ସରକାର ଜିଏସଟି (GST) କ୍ଷତିପୂରଣ ପ୍ରସଙ୍ଗରେ ବିକଳ୍ପ ବ୍ୟବସ୍ଥା ସମ୍ପର୍କରେ ରାଜ୍ୟମାନଙ୍କୁ ଜଣାଇଛନ୍ତି। ଏପରିକି ଋଣ ବ୍ୟବସ୍ଥା ମଧ୍ୟ କରିଛନ୍ତି। ତେଣୁ ଏହାକୁ ବିରୋଧ କରିବା ଅତ୍ୟନ୍ତ ନିନ୍ଦନୀୟ ଏବଂ ବିପତ୍ତି ସମୟରେ ସଂଘୀୟ ବ୍ୟବସ୍ଥାରେ ଉଭୟ କେନ୍ଦ୍ର ଏବଂ ରାଜ୍ୟ ପରସ୍ପରକୁ ସହଯୋଗ କରିବା ଆବଶ୍ୟକ ବୋଲି ବିଜେପିର ବରିଷ୍ଠ ନେତା ପ୍ରଦୀପ ପୁରୋହିତ କହିଛନ୍ତି। 

ଅନ୍ୟପକ୍ଷରେ କୋରୋନା ପାଇଁ ଉତ୍ପାଦନ, ଆମଦାନୀ ଏବଂ ଆବଶ୍ୟକତା କମିଛି। ତେଣୁ ଲୋକଙ୍କ ପାଖକୁ କିଭଳି ଅଧିକ ରୋଜଗାର ଆସିବ ଏବଂ ସପ୍ଲାଇ ଚେନ ବଢାଇବାକୁ ପଡିବ। ଅର୍ଥନୀତିକୁ ଚଳଚଞ୍ଚଳ କରିବାକୁ ହେବ ଏ ସବୁକୁ ଧ୍ୟାନ ଦେବାକୁ ହେବ। ସରକାରଙ୍କୁ ଅଧିକ ଋଣ କରିବାକୁ ପଡିବ ବୋଲି ଅର୍ଥନୀତି ସମୀକ୍ଷକ ରାଜୀବ ସାହୁ କହିଛନ୍ତି। ଜିଏସଟି କ୍ଷତିପୂରଣ ଅର୍ଥକୁ ନେଇ କେନ୍ଦ୍ର ଏବଂ ରାଜ୍ୟ ମଧ୍ୟରେ ଲଢେଇ ତୀବ୍ର ହୋଇଛି। ଏପରିକି ପଶ୍ଚିମବଙ୍ଗ କେନ୍ଦ୍ର ସରକାରଙ୍କ ପକ୍ଷରୁ ଦିଆଯାଇଥିବା ବିକଳ୍ପ ଋଣ ବ୍ୟବସ୍ଥାକୁ ଗ୍ରହଣ କରିବାକୁ ମନା କରିଦେଇଥିବାବେଳେ ଅନ୍ୟ ରାଜ୍ୟଗୁଡିକ ନିଜର ମତ ସ୍ପଷ୍ଟ କରିନାହାନ୍ତି। ଏଭଳି ସ୍ଥିତିରେ ବିରୋଧୀ ଦଳଗୁଡିକର ଶାଣିତ ଆକ୍ରମଣ ପରେ ଓଡିଶା ସରକାର କିଭଳି ଆଭିମୁଖ୍ଯ ପୋଷଣ କରୁଛନ୍ତି ତା ଉପରେ ସମସ୍ତଙ୍କର ନଜର ରହିଛି।