ଜାରି ରହିବ ଗ୍ରୀଷ୍ମ ପ୍ରବାହ, ଉର୍ଦ୍ଧ୍ୱମୁହାଁ ହେବ ପାରଦ

ଶାନ୍ତସ୍ବରୂପ ରାଉତ,ଭୁବନେଶ୍ବର: ଏଥର ଅନୁଭୂତ ହେବ ପ୍ରବଳ ଗରମ। ଉର୍ଦ୍ଧ୍ୱମୁହାଁ ହେବ ପାରଦ। ଚଳିତ ମାସରୁ ଆସନ୍ତା ମେ ପର୍ଯ୍ୟନ୍ତ ଗ୍ରୀଷ୍ମ ପ୍ରବାହ ଜାରି ରହିବା ନେଇ ଭାରତୀୟ ପାଣିପାଗ ବିଭାଗ ପକ୍ଷରୁ ସାମ୍ଭାବ୍ୟ ପୂର୍ବାନୁମାନ କରାଯାଇଛି। ଏନେଇ ହୋଇଥିବା ଆକଳନ ଅନୁଯାୟୀ ରାଜ୍ୟରେ ଚଳିତ ବର୍ଷ ତାପମାତ୍ରା ସ୍ବାଭାବିକ ଠାରୁ ଅଧିକ ରହିବ। 

ଏହାସହ ବର୍ତ୍ତମାନ ମଧ୍ୟମ ଧରଣର ଲା ନିନା ରହିଥିବା ବେଳେ ମେ ପର୍ଯ୍ୟନ୍ତ ଏହାର ପ୍ରଭାବ ବଳବତ୍ତର ରହିବ। ଗତ ୨୦୧୬ ମସିହାରୁ ଦେଶର ବିଭିନ୍ନ ଅଞ୍ଚଳ ପାଇଁ ମଡେଲ ଆଧାରରେ ଏହି ପୂର୍ବାନୁମାନ କରାଯାଇଛି। ବିଶେଷ କରି ଫେବୃୟାରୀ ମାସର ପାଣିପାଗ ସ୍ଥିତିକୁ ଦେଖି ଏହି ଆକଳନ କରାଯାଇଥାଏ। ସେପଟେ ଆଗାମୀ ୪-୫ ଦିନ ମଧ୍ୟରେ ଦିନ-ରାତ୍ରୀ ସମୟରେ ତାପମାତ୍ରା ଅପରିବର୍ତ୍ତିତ ରହିବ।

Also Read: ତାତିରୁ ନାହିଁ ତ୍ରାହି, ୮ ଜିଲ୍ଲାରେ ଗ୍ରୀଷ୍ମ ପ୍ରବାହ

ଏହା ପରବର୍ତ୍ତୀ ୨-୩ ଦିନ ମଧ୍ୟରେ ତାପମାତ୍ରା ୩-୪ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବାର ସମ୍ଭାବନା ରହିଛି। ଏହାସହ ୯ ଜିଲ୍ଲା ଖୋର୍ଦ୍ଧା, କଟକ, ଅନୁଗୁଳ, ବୌଦ୍ଧ, ଯାଜପୁର, କେଉଁଝର, ମୟୂରଭଞ୍ଜ, ଭଦ୍ରକ, ନୟାଗଡ ଆଦି  ଜିଲ୍ଲାରେ ଗ୍ରୀଷ୍ମ ପ୍ରବାହ ଜାରି ରହିବା ସହ ସ୍ବାଭାବିକ ଠାରୁ ୫ ଡିଗ୍ରୀ ଅଧିକ ରହିବ ତାପମାତ୍ରା। ଦିନ ୧୧ଟାରୁ ୩ଟା ପର୍ଯ୍ୟନ୍ତ ଘରୁ ନବାହାରିବାକୁ ପରାମର୍ଶ ଦିଆଯାଇଛି।