ବଙ୍ଗୋପ ସାଗରରେ ଲଘୁଚାପ, ରାଜ୍ୟରେ ପ୍ରବଳ ବର୍ଷା ସମ୍ଭାବନା

ଶାନ୍ତସ୍ୱରୂପ ରାଉତ, ଭୁବନେଶ୍ୱର: ୨୪ ଘଣ୍ଟାରେ ଲଘୁଚାପ । ଉତ୍ତର ପୂର୍ବ ବଙ୍ଗୋପସାଗର ଓ ଆନ୍ଧ୍ର ଉପକୂଳରେ ଆସନ୍ତା ୨୦ ତାରିଖ ତଥା ରବିବାର ସୁଦ୍ଧା ଏକ ଲଘୁଚାପ ଘନୀଭୂତ ହେବା ନେଇ ଆକଳନ କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । ଦକ୍ଷିଣ ଚୀନ ସାଗରରେ ସୃଷ୍ଟି ହୋଇଥିବା ସାମୁଦ୍ରିକ ଝଡ ‘ନୌଲ୍‌’ ର ପ୍ରଭାବରେ ଲଘୁଚାପଟି ଅଧିକ ଶକ୍ତିଶାଳୀ ହେବା ସହ ପରବର୍ତ୍ତୀ ୨୪ ଘଣ୍ଟାରେ ଅଧିକ ସକ୍ରିୟ ହୋଇ ଅବପାତରେ ପରିଣତ ହେବାର ସମ୍ଭାବନା ରହିଛି । ଏହାର ପ୍ରଭାବରେ ୨୩ ତାରିଖ ପର୍ଯ୍ୟନ୍ତ ରାଜ୍ୟରେ ବିଭିନ୍ନ ସ୍ଥାନରେ ବର୍ଷା ହେବା ନେଇ ବିଭିନ୍ନ ଜିଲ୍ଲାକୁ ସତର୍କ ସୂଚନା ଜାରି କରିଛି କେନ୍ଦ୍ର । ସେପଟେ ଲଘୁଚାପ ପ୍ରଭାବରେ ରାଜ୍ୟରେ ବିଶେଷ ବର୍ଷା ନାଥିବା ସହ ବନ୍ୟାର ସମ୍ଭାବନା କମ୍ ବୋଲି ଆକଳନ କରିଛନ୍ତି କୃଷି ବିଶେଷଜ୍ଞ ।

ଆସୁଛି ଆଉ ଏକ ବଡ ବର୍ଷା । ୨୪ ଘଣ୍ଟାରେ ଲଘୁଚାପ, ୪୮ ଘଣ୍ଟାରେ ଅବପାତ । ଦକ୍ଷିଣ ଚୀନ ସାଗରରେ ସୃଷ୍ଟି ହୋଇଥିବା ସାମୁଦ୍ରିକ ଝଡ ‘ନୌଲ୍‌’ ର ପ୍ରଭାବରେ ଆସନ୍ତା ୨୪ ଘଣ୍ଚା ମଧ୍ୟରେ ଉତ୍ତର ପୂର୍ବ ବଙ୍ଗୋପସାଗର ଓ ଆନ୍ଧ୍ର ଉପକୂଳରେ ଏକ ଲଘୁଚାପ ଘନୀଭୂତ ହେବାର ସମ୍ଭାବନା ରହିଛି । ଯାହା ପରବର୍ତ୍ତୀ ୨୪ ଘଣ୍ଟା ମଧ୍ୟରେ ଆହୁରି ସକ୍ରିୟ ହେବାର ସମ୍ଭାବନ । ଏହାର ପ୍ରଭାବରେ ଉତ୍ତର ଓଡ଼ିଶାର ବିଭିନ୍ନ ଜିଲ୍ଲାରେ ସେପ୍ଟେମ୍ବର ୨୦ ଓ ୨୧ ତାରିଖ ପର୍ଯ୍ୟନ୍ତ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି । ପଶ୍ଚିମ ଓଡ଼ିଶାର କେତେକ ସ୍ଥାନରେ ସେପ୍ଟେମ୍ବର ୨୨ ତାରିଖରେ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି । ଏହାପରେ ୨୨ ତାରିଖରୁ ପାଗରେ ପରିବର୍ତ୍ତନ ହେବା ସହ ବର୍ଷାର ପରିମାଣ ହ୍ରାସ ପାଇବାର ସମ୍ଭାବନା ରହିଛି ।

ସେପଟେ କୃଷି ବିଶେଷଜ୍ଞଙ୍କ ଆକଳନ ମୁତାବକ ଲଘୁଚାପ ପ୍ରଭାବରେ ରାଜ୍ୟରେ ବିଶେଷ ବର୍ଷା ଯଥା ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ନାହିଁ । ଆସନ୍ତା ୨୪ ଓ ୨୫ ତାରିଖ ଯାଏଁ ବର୍ଷ ସମ୍ଭାବନା ରହିଛି । ଉପକୂଳ ଓଡିଶାରେ ୨୦ ରୁ ୨୨ ଯାଏଁ, ପଶ୍ଚିମ ଓଡିଶାରେ ୨୧ ରୁ ୨୨ ତାରିଖ ଯାଏଁ ସ୍ୱଳ୍ପରୁ ମଧ୍ୟମ ବର୍ଷା ହେବାର ସମ୍ଭାବନା ରହିଛି । ତେବେ ଲଘୁଚାପ ପ୍ରଭାବରେ ଉତ୍ତର ଓଡିଶାରେ ଓ ଆଭ୍ୟନ୍ତରୀଣ ଓଡିଶାରେ ବେଶୀ ପ୍ରଭାବ ସହ ୨୩ ତାରିଖ ପର୍ଯ୍ୟନ୍ତ ବର୍ଷା ସମ୍ଭାବନା ରହିଛି । ଏହହାସହ ୨୫ ତାରିଖ ଯାଏଁ ସାରା ରାଜ୍ୟରେ ଆଂଶିକ ମେଘୁଆ ପାଗ ରହିବାର ସମ୍ଭାବନା ରହିଛି । ଲଘୁଚାପ ପ୍ରଭାବରେ ଆସନ୍ତା ୬ ଦିନ ମଧ୍ୟରେ ସମୁଦାୟ ୧୦୦ ରୁ ୧୨୦ ମିଲିମିଟର ପର୍ଯ୍ୟନ୍ତ ବର୍ଷା ହେବା ନେଇ ସେ ଆକଳନ କରିଛନ୍ତି । ଏହାସହ ବନ୍ୟାର ଆଶା ନାହିଁ ଏବଂ ଚାଷୀଙ୍କୁ ଭୟ କରିବାର ଆବଶ୍ୟକତା ନାହିଁ ବୋଲି ସେ ପରାମର୍ଶ ଦେଇଛନ୍ତି  ।

ତେବେ ରାଜ୍ୟରେ ଏଯାବତ ମୌସୁମୀ ଜନିତ ବର୍ଷା ୨ ପ୍ରତିଶତ କମ୍ ରେକର୍ଡ ହୋଇଛି । ୨୪ଜିଲ୍ଲାରେ ସ୍ୱାଭାବିକ ରହିଥିବା ବେଳେ ଦୁଇ ଜିଲ୍ଲାରେ ଅଧିକା ଏବଂ ୪ ଜିଲ୍ଲା ଖୋର୍ଦ୍ଧା, ଗଜପତି ପୁରୀ ଓ ବାଲେଶ୍ବରରେ କମ୍ ବର୍ଷା ରେକର୍ଡ ହୋଇଛି । ଏହି ସଦ୍ୟ ଲଘୁଚାପ ପ୍ରଭାବରେ ନିଅଣ୍ଟିଆ ବର୍ଷା ଭରଣା ହେବାର ସମ୍ଭାବନା ରହିଛି ।