ଟଳିଲା ବାତ୍ୟା ଭୟ, ବର୍ଷା ପରିମାଣ ବଢିବ

ଶାନ୍ତଶ୍ୱରୂପ ରାଉତ, ଭୁବନେଶ୍ୱର: ଟଳିଲା ବାତ୍ୟା ଭୟ, ଘନୀଭୂତ ହେବନି ଲଘୁଚାପ । ଦକ୍ଷିଣ ଆଣ୍ଡାମାନ ସାଗର ଏବଂ ଏହା ପାର୍ଶ୍ୱବର୍ତ୍ତି ଦକ୍ଷିଣ-ପୂର୍ବ ବଙ୍ଗୋସାଗରରେ ସୃଷ୍ଟି ହୋଇଥିବା ଲଘୁଚାପ ବଳୟ ଆଉ ସକ୍ରିୟ ହେବ ନାହିଁ । ତେବେ ଏହା ଆସନ୍ତା ୪ ଦିନ ଯାଏଁ ଉକ୍ତ ଅଞ୍ଚଳରେ ବାୟୁମଣ୍ଡଳରେ ଘୂରିବୁଲିବ. ଏଭଳି କିଛି ପୂର୍ବାନୁମାନ କରିଛି ଆଂଚଳିକ ପାଣିପାଗ ବିଜ୍ଞାନ କେନ୍ଦ୍ର । 

ସେପଟେ ସକ୍ରିୟ ଘୂର୍ଣ୍ଣିବଳୟ ଓ ଟ୍ରଫ୍ ଲାଇନ ପ୍ରଭାବରେ ଆସନ୍ତା ୫ ଦିନ ଯାଏଁ ବିଭିନ୍ନ ଜିଲ୍ଲାରେ ବିକ୍ଷିପ୍ତ ଭାବେ ବର୍ଷା ସହ ପବନର ବେଗ ବୃଦ୍ଧି ପାଇବାର ସମ୍ଭାବନା ରହିଛି । ଆସନ୍ତା ୨୪ ଘଣ୍ଟାରେ ଦେଓଗଡ, ଅନୁଗୁଳ, କେନ୍ଦୁଝର, ମୟୂରଭଞ୍ଜ, ଯାଜପୁର, ଢେଙ୍କାନାଳ, ବାଲେଶ୍ୱର, କଟକ ଓ ଭଦ୍ରକ ଜିଲ୍ଲାରେ ପ୍ରବଳ ବର୍ଷା ସାଙ୍ଗକୁ ୪୦ରୁ୫୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି । ଏପରିକି ଉକ୍ତ ଜିଲ୍ଲାଗୁଡ଼ିକୁ ଅରେଞ୍ଜ ଓ୍ୱାର୍ଣ୍ଣି ମଧ୍ୟ ଜାରି କରାଯାଇଛି ।

ସେହିପରି ଉପକୂଳ ଓଡିଶା ସମେତ ସୁନ୍ଦରଗଡ, ସମ୍ବଲପୁର, ସୋନପର,  ବୌଦ୍ଧ, କନ୍ଧମାଳ, ରାୟଗଡା, ବଲାଙ୍ଗିର, ଓ କୋରାପୁଟ ଜିଲ୍ଲାରେ ଘଡଘଡି ବର୍ଷା ସହ ୩୦ରୁ ୪୦ କିଲୋମିଟର ବେଗରେ ପବନ ବହିବା ନେଇ ୟେଲୋ ୱାର୍ଣ୍ଣିଂ ଜାରି କରିଛି କେନ୍ଦ୍ର । ସେହିପରି ଆସନ୍ତା ୯ ତାରିଖ ଯାଏଁ ବିଭିନ୍ନ ଜିଲ୍ଲାରେ ବିକ୍ଷିପ୍ତ ଭାବେ ବର୍ଷା ପବନ ସହ ତାପମାତ୍ରା ବିଶେଷ ପରିବର୍ତ୍ତନ ନ ହେବାର ସମ୍ଭାବନା ରହିଛି ।