କଡା ସୁରକ୍ଷା ମଧ୍ୟରେ ରାଜ୍ୟରେ ଜେଇଇ ମେନ୍ ପରୀକ୍ଷା ଆରମ୍ଭ

ଶାନ୍ତସ୍ୱରୂପ ରାଉତ, ଭୁବନେଶ୍ୱର: କଟକଣା ଭିତରେ ଆରମ୍ଭ ହେଲା ପରୀକ୍ଷା । ମଙ୍ଗଳବାର (ସେପ୍ଟମ୍ବର ୧, ୨୦୨୦) ଠାରୁ ସାରା ଦେଶରେ ଆରମ୍ଭ ହୋଇଛି ସର୍ବଭାରତୀୟ ଜାତୀୟ ପ୍ରବେଶିକା ପରୀକ୍ଷା ଜେଇଇ ମେନ୍ (JEE Main) । ସମ୍ପୂର୍ଣ୍ଣ କୋଭିଡ କଟକଣା ଓ କଡା ସୁରକ୍ଷାବଳୟ ମଧ୍ୟରେ ଅନୁଷ୍ଠିତ ହୋଇଛି ପରୀକ୍ଷା । ଦୁଇଟି ସିଫ୍ଟରେ ପରୀକ୍ଷା ହୋଇଥିବା ବେଳେ ପ୍ରଥମ ଦିନରେ ଆର୍କିଟେକ୍ଚର (Architecture) ବିଭାଗରେ ପରୀକ୍ଷା ହୋଇଛି । କୋରୋନା ସଂକଟ ସମୟରେ ସରକାର ସମସ୍ତ ବ୍ୟବସ୍ଥାକୁ ସୁଚାରୁରୂପେ ସମ୍ପାଦନ କରିଥିବାରୁ ଛାତ୍ରଛାତ୍ରୀ ଓ ଅଭିଭାବକ ପ୍ରଶଂସା କରିବା ସହ ପ୍ରସ୍ତୁତି ଅନୁସାରେ ଭଳ ଫଳାଫଳ ହେବା ନେଇ ଆଶାବ୍ୟକ୍ତ କରିଛନ୍ତି ।

ବହୁ ବାଦ ବିବାଦ ପରେ ଆରମ୍ଭ ହୋଇଛି ପରୀକ୍ଷା । କୋରୋନା ରୂପୀ ଅଗ୍ନିପରୀକ୍ଷା ସହ ଜେଇଇ ପ୍ରବେଶିକା ପରୀକ୍ଷାକୁ ସାମ୍ନା କରିଛନ୍ତି ପରୀକ୍ଷାର୍ଥୀ । ବିଗତ ବର୍ଷ ଅପେକ୍ଷା ଚଳିତ ବର୍ଷର ପରୀକ୍ଷା ପରିଚାଳନା ସମ୍ପୂର୍ଣ୍ଣ ଭିନ୍ନ । କୋଭିଡ ନିୟମା ଅନୁଯାୟୀ ପ୍ରଥମେ ହାତ ସାନିଟାଇଜ ପରେ ଥର୍ମାଲ ସ୍କାନିଂ ଓ ଶେଷରେ ନୂଆ ମାସ୍କ ପିନ୍ଧି ପରୀକ୍ଷା କେନ୍ଦ୍ରକୁ ପ୍ରବେଶ କରିଥିଲେ ଛାତ୍ରଛାତ୍ରୀ । ପ୍ରବେଶ ଓ ପ୍ରସ୍ଥାନ ସମୟରେ ଭିଡ ଏଡାଇବା ଲାଗି ସାମାଜିକ ଦୂରତାକୁ ବାଧ୍ୟତାମୂଳକ କରାଯାଇଥିଲା । ସେହିପରି ପରୀକ୍ଷା କେନ୍ଦ୍ରକୁ ଆଡମିଟ୍ କାର୍ଡ ଓ ଆବଶ୍ୟକୀୟ ଡକ୍ୟୁମେଣ୍ଟ ସହ ନିଜସ୍ୱ ପାଣିବୋତଲ ଓ ହ୍ୟାଣ୍ଡ ସାନିଟାଇଜର ନେଇଥିଲେ ଛାତ୍ରଛାତ୍ରୀ । ପରୀକ୍ଷା ସରିବା ପରେ ପ୍ରଥମ ଦିନର ପରୀକ୍ଷା ବେଶ ଭଲ ଫଳାଫଳ ନେଇ ଆଶାବ୍ୟକ୍ତ କରିଛନ୍ତି ଛାତ୍ରଛାତ୍ରୀ । ଏସବୁ ଉପଯୁକ୍ତ ବ୍ୟବସ୍ଥା ଦ୍ୱାରା ଉଭୟ ପରୀକ୍ଷା ଓ କୋରୋନା ସଂକ୍ରମଣ ଜନିତ ଭୟ ଦୂର ହୋଇଥିବା ପରୀକ୍ଷାର୍ଥୀ ଓ ଅଭିଭାବକ କହିଛନ୍ତି ।

ଦୁଇଟି ସିଫ୍ଟରେ ପରୀକ୍ଷା ହେଉଥିବା ବେଳେ ପ୍ରତି ସିଫ୍ଟ ପରେ ପରୀକ୍ଷାର୍ଥୀଙ୍କ ଦ୍ୱାରା ବ୍ୟବହୃତ କି ବୋର୍ଡ, ମାଉସ୍, କମ୍ପ୍ୟୁଟର ଆଦି ଉପକରଣକୁ ବିଶୋଧନ କରାଯାଉଛି । ପରୀକ୍ଷା କେନ୍ଦ୍ର ବାହାରେ ମଧ୍ୟ ସାନିଟାଇଜ କରାଯାଇଛି । ସେହିପରି ଓଡିଶା- ମୋ ପରିବାର ପକ୍ଷରୁ ହେଲ୍ପ ଡେସ୍କ ଖୋଲି ପରୀକ୍ଷାର୍ଥୀଙ୍କ ଶେଷ ସମୟର ସୁବିଧା ଅସୁବିଧା ବୁଝିବା ସହ ମାଗଣା ପାଣି ବୋତଲ, ସାନିଟାଇଜର ଓ ବିସ୍କୁଟ ପ୍ରଦାନ କରାଯାଇଥିଲା । ଅତିରିକ୍ତ ଜିଲ୍ଲାପାଳଙ୍କ ସମେତ ସ୍ଥାନୀୟ ନୋଡାଲ ସେଣ୍ଟରର ଅଧିକାରୀ ପ୍ରମୁଖ ସମସ୍ତ କାର୍ଯ୍ୟକୁ ତଦାରଖ କରିଥିଲେ ।

ଚଳିତ ବର୍ଷ ରାଜ୍ୟର ୭ଟି ସହରରେ ମୋଟ ୨୬ଟି ପରୀକ୍ଷା କେନ୍ଦ୍ର କରାଯାଇଥିବା ବେଳେ ମୋଟ ୩୮,୨୩୬ ଛାତ୍ରଛାତ୍ରୀ ପରୀକ୍ଷା ପାଇଁ ପଞ୍ଜୀକରଣ କରିଛନ୍ତି । ସେପ୍ଟମ୍ବର ୬ ତାରିଖ ପର୍ଯ୍ୟନ୍ତ ପରୀକ୍ଷା ହେବାକୁ ଥିବା ବେଳେ ୨ ତାରିଖରୁ ମୁଖ୍ୟ ବିଷୟର ପରୀକ୍ଷା ଆରମ୍ଭ ହେବ ।