ଆଜି ବିଶ୍ୱ ବନ ଦିବସ: କେତେ ସୁରକ୍ଷିତ ଆମ ଜଙ୍ଗଲ ?

ନୂଆଦିଲ୍ଲୀ: ପାଣି ଗ୍ଲାସ ଠାରୁ ଆରମ୍ଭ କରି ଲେଖିବା ପାଇଁ ଏକ ନୋଟବୁକ ହେଉ ବା ଜ୍ୱର ପାଇଁ ଔଷଧ ସେବନ ହେଉ ବା ଘର ନିର୍ମାଣ କରିବାରେ ହେଉ ସବୁ କ୍ଷେତ୍ରରେ ଜଙ୍ଗଲ ବା ବଣର ରହିଛି ବିଶେଷ ମହତ୍ତ୍ୱ । ଆମ ଜୀବନର ପ୍ରତିଟି କ୍ଷେତ୍ର ଜଙ୍ଗଲ ସହିତ ଜଡ଼ିତ । ଜଙ୍ଗଲ ସ୍ଥାୟୀ ପରିଚାଳନା ଏବଂ ଉତ୍ସ ଗୁଡ଼ିକର ବ୍ୟବହାର ଜଳବାୟୁ ପରିବର୍ତ୍ତନକୁ ମୁକାବିଲା କରିବା ଏବଂ ବର୍ତ୍ତମାନର ଓ ଭବିଷ୍ୟତ ପିଢୀର ସମୃଦ୍ଧତା ଏବଂ ଉନ୍ନତି ପାଇଁ ଏକ ବିଶେଷ ଯୋଗଦାନ ଦେଇଛି ।

ଦାରିଦ୍ର୍ୟ ଦୂରୀକରଣ ଏବଂ ସ୍ଥାୟୀ ବିକାଶ ଲକ୍ଷ୍ୟ ହାସଲ କରିବାରେ ଜଙ୍ଗଲ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ । ତଥାପି ଏହି ସମସ୍ତ ଅମୂଲ୍ୟ ପରିବେଶ, ଅର୍ଥନୈତିକ, ସାମାଜିକ ଏବଂ ସ୍ୱାସ୍ଥ୍ୟ ସୁବିଧା ସତ୍ତ୍ୱେ ବିଶ୍ବରେ ଜଙ୍ଗଲ ବା ବଣ ନଷ୍ଟ ହେବାର ଏକ ଭୟାବହତା ବହୁ ମାତ୍ରାରେ ଦେଖାଦେଇଛି। ତେବେ ଚଳିତବର୍ଷର ଥିମ ରହିଛି(Forest restoration: a path to recovery and well-being)  ଅର୍ଥ  "ଜଙ୍ଗଲ ପୁନରୁଦ୍ଧାର: ରକ୍ଷା ଓ ସୁସ୍ଥତା ପାଇଁ ଆଉ ପାଦେ" 

ଜଙ୍ଗଲର ପୁନଃରୁଦ୍ଧାର (Restoration Of Forest) ଏବଂ ସ୍ଥାୟୀ ପରିଚାଳନା ଜଳବାୟୁ ପରିବର୍ତ୍ତନ ଏବଂ ଜୈବ ବିବିଧତା ସଙ୍କଟ ଦୂର କରିବାରେ ସାହାଯ୍ୟ କରେ । ଏହା ମଧ୍ୟ ସ୍ଥାୟୀ ବିକାଶ ପାଇଁ ସାମଗ୍ରୀ ଏବଂ ସେବା ଉତ୍ପାଦନ କରେ, ଏକ ଅର୍ଥନୈତିକ କାର୍ଯ୍ୟକଳାପ ସୃଷ୍ଟି କରେ ଯାହା ଚାକିରୀ କ୍ଷେତ୍ର ସୃଷ୍ଟି କରେ ଏବଂ ଜୀବନକୁ ଉନ୍ନତ କରେ । 

ମିଳିତ ଜାତିସଂଘର ସାଧାରଣ ସଭାରେ ଆଜିର ଦିନରେ ବିଶ୍ୱ ବନ ଦିବସ ଘୋଷଣା କରି ସମସ୍ତ ପ୍ରକାର ଜଙ୍ଗଲର ମହତ୍ତ୍ୱ ବିଷୟରେ ସଚେତନତା ସୃଷ୍ଟି କରିଥିଲା। ବୃକ୍ଷରୋପଣ ଅଭିଯାନ ପରି ଜଙ୍ଗଲ ଏବଂ ବୃକ୍ଷ ସହିତ ଜଡିତ କାର୍ଯ୍ୟକଳାପର ଆୟୋଜନ ପାଇଁ ଦେଶଗୁଡିକ ସ୍ଥାନୀୟ, ଜାତୀୟ ତଥା ଅନ୍ତର୍ଜାତୀୟ ଉଦ୍ୟମ କରିବାକୁ ଉତ୍ସାହିତ କରିଥିଲେ ।

କେମିତି ଅଛି ଆମ ଜଙ୍ଗଲର ଅବସ୍ଥା ?

ଯଦି ଆମ ରାଜ୍ୟର ଜଙ୍ଗଲ ସୁରକ୍ଷା କଥା ଦେଖିବା ତାହେଲେ, ବିଗତ କିଛି ଦିନ ତଳେ ରାଜ୍ୟର ବିଭିନ୍ନ କୋଣ ଅନୁକୋଣରେ ଲାଗିଥିବା ନିଆଁର ପ୍ରକୋପ ଜଣାଇଦିଏ କେତେ ସୁରକ୍ଷିତ ଆମ ଜଙ୍ଗଲ । ନିକଟ ଅତୀତରେ ଶିମିଳିପାଳ (Similipal) ସହ ଜଳୁଥିଲା ସାରା ଓଡିଶା। ରାଜ୍ୟର ହଜାରେରୁ ଅଧିକ ଜଙ୍ଗଲରେ ନିଆଁ ଲାଗିଥିବା ନାସାର ସାଟେଲାଇଟ ଫଟୋରୁ ବି ସ୍ପଷ୍ଟ ହୋଇଥିଲା । ବିଳମ୍ବରେ ହେଉ ପଛେ ସରକାରଙ୍କ ନିଦ ଭାଙ୍ଗିଥିଲା । କେବଳ ଏତିକି ନୁହେଁ ନିଜର ସଉକ ମେଣ୍ଟାଇବାକୁ ଗଛ ହାଣି ପଦା କରୁଥିବା ମଣିଷର ଜୀବନ ବି ଏବେ ବିପଦରେ । କାରଣ ଜଙ୍ଗଲ ସଫା ଯୋଗୁଁ ବନ୍ୟପ୍ରାଣୀ ମାନେ ଖାଦ୍ୟ ଅନ୍ୱେଷଣରେ ଜନବସତି ମୁହାଁ ହେଉଥିବା ଖବର ମଧ୍ୟ ନଜିର ରହିଛି  ।  

ଅନେକ ସମୟରେ ଏହି ଗୋଟିଏ ଦିନରେ ଅନେକ କିଛି କାର୍ଯ୍ୟକ୍ରମର ଆୟୋଜନ କରାଯାଏ । ରାଲି, ଶପଥ ଠାରୁ ଆରମ୍ଭ କରି ଚାରା ରୋପଣ ହେଲେ ତାହା ଦିନ ଗଡ଼ିବା ପରେ ପରିସ୍ଥିତି ଯଥା ପୂର୍ବଂ ତଥା ପରଂ । ମାନେ ଗଛଟି ଯେମିତି ଅବସ୍ଥାରେ ଥିଲା ସେମିତି ଅବସ୍ଥାରେ ରହିଯାଏ । ଆଉ ଜଙ୍ଗଲ ଅବକ୍ଷୟର ଏବେ ହାର କମିବା ବଦଳରେ ଦିନକୁ ଦିନ ବଢିଚାଲିଛି । ଏହି କ୍ରମରେ ମଣିଷ ସମାଜ ପ୍ରତି ଗୋଟିଏ ଦାୟିତ୍ୱ ବଢିଛି ତାହା ହେଉଛି ଜଙ୍ଗଲର ସୁରକ୍ଷା।