 "ଆସୁଛି ଲଘୁଚାପ; ସାମ୍ଭାବ୍ୟ ବନ୍ୟାକୁ ନେଇ ସତର୍କ ଜଳ ସମ୍ପଦ ବିଭାଗ")
ଭୁବନେଶ୍ୱର: ଆସୁଛି ଲଘୁଚାପ। ଗତକାଲିର ଘୁର୍ଣ୍ଣୀବଳୟ ମିଆଁମାର ଉପକୂଳ ଆଖପାଖ ମାର୍ଟାବାନ୍ ଉପକୂଳ ଅଞ୍ଚଳରେ ଗୁରୁବାର ସକ୍ରିୟ ରହିଛି। ଏହା ଉତ୍ତର-ପଶ୍ଚିମ ଦିଗକୁ ଗତି କରି ଉତ୍ତର-ପୂର୍ବ ଏବଂ ପୂର୍ବ-କେନ୍ଦ୍ରୀୟ ବଙ୍ଗୋପ ସାଗର ଅଞ୍ଚଳରେ ପହଞ୍ଚିବା ପରେ ୨୪ ତାରିଖ ସନ୍ଧ୍ୟା ବେଳକୁ ସେଠାରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି। ଯାହା ପରବର୍ତ୍ତୀ ୪୮ ଘଣ୍ଟା ମଧ୍ୟରେ ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତି କରି ଓଡିଶା ମୁହାଁଇବ ବୋଲି ପାଣିପାଗ କେନ୍ଦ୍ର ଆକଳନ କରିଛି।
ବର୍ତ୍ତମାନ ମନସୁନ୍ ଟ୍ରଫ୍ ଲାଇନ ସକ୍ରିୟ ଥିବା ବେଳେ ଏକ ଘୂର୍ଣ୍ଣିବଳୟ ଉତ୍ତର ଛତିଶଗଡ ଏବଂ ଏହାର ଆଖପାଖ ଅଞ୍ଚଳରେ ସମୁଦ୍ର ପତ୍ତନ ଠାରୁ ଲମ୍ବିଛି। ଏସବୁ ପାଣିପାଗ ନିୟାମକ ପ୍ରଭାବରେ ରାଜ୍ୟରେ ଆସନ୍ତାକାଲି ସକାଳ ୮ଟା ୩୦ ସୁଦ୍ଧା କୋରାପୁଟ ନବରଙ୍ଗପୁର ଆଦି ୨ ଜିଲ୍ଲାରେ ପ୍ରବଳ ବର୍ଷା ନେଇ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ ବିଜ୍ଞାନ କେନ୍ଦ୍ର। ଏହା ସହ ଉତ୍ତର ଓଡିଶାରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ରହିଛି।
ଏହାପରେ ଆସନ୍ତାକାଲି ପାଗ ଶୁଖିଲା ରହିବା ପରେ ସାମ୍ଭାବ୍ୟ ଲଘୁଚାପ ପ୍ରଭାବରେ ଆସନ୍ତା ୨୫ ତାରିଖରୁ ରାଜ୍ୟରେ ବର୍ଷା ପରିମାଣ ବୃଦ୍ଧି ହେବା ନେଇ କେନ୍ଦ୍ର ଆକଳନ କରିଛି। ଆସନ୍ତା ୨୬ ତାରିଖରେ ବର୍ଷାର ପରିମାଣ ଅଧିକ ରହିବ। ଏହା ସହ ସମୁଦ୍ର ଅଶାନ୍ତ ରହିବା ସହ ସର୍ବାଧିକ ୬୦ କିଲୋମିଟର ବେଗରେ ପବନ ବହିବା ହେତୁ ଆସନ୍ତା ୨୫ ତାରିଖରୁ ୨୭ ତାରିଖ ପର୍ଯ୍ୟନ୍ତ ସମୁଦ୍ର ପ୍ରବେଶ ନେଇ ବାରଣ କରାଯାଇଛି।
ଆସନ୍ତା ୨୪ ତାରିଖରେ ଉତ୍ତର ଓଡିଶା ସହ ଛତିଶଗଡରେ ପୁଣି ଜୋରଦାର ବର୍ଷା ହେବ ବୋଲି ଆଶଙ୍କା କରାଯାଉଛି। ଏହାର ପ୍ରଭାବରେ ଉତ୍ତର ଓଡ଼ିଶାରେ ବନ୍ୟା ପରିସ୍ଥିତି ଦେଖା ଦେଇପାରେ। ଏନେଇ ଜଳ ସମ୍ପଦ ବିଭାଗ ସତର୍କ ରହିଥିବା କହିଛନ୍ତି ବିଭାଗୀୟ ସର୍ବୋଚ୍ଚ ଯନ୍ତ୍ରୀ। ସମ୍ପୃକ୍ତ ଅଞ୍ଚଳରେ ବିଭାଗୀୟ ଯନ୍ତ୍ରୀଙ୍କୁ ନିୟୋଜିତ କରାଯାଇଛି। ଜଳକା ନଦୀର ତଳମୁଣ୍ଡରେ ୪ ଘାଇ ସୃଷ୍ଟି ହୋଇଛି। ପାଣି କମିଲେ ମରାମତି କାର୍ଯ୍ୟ ଆରମ୍ଭ ହେବ। ମରାମତି ପାଇଁ ସମସ୍ତ ଉପକରଣ ମହଜୁଦ ରହିଛି। ଉପର ମୁଣ୍ଡରେ ଯଦିଓ ଅଳ୍ପ ବର୍ଷା ହେଉଛି ଏହା ସତ୍ବେ ବର୍ତ୍ତମାନ ରାଜଘାଟ ଠାରେ ସୁବର୍ଣ୍ଣରେଖା ବିପଦ ସଙ୍କେତ ତଳେ ରହିଛି। ମହନଦୀ ଅଵବାହିକାରେ ବର୍ତ୍ତମାନ ସେପରି କିଛି ସମସ୍ୟା ଦେଖା ଦେଇନାହିଁ। ହୀରାକୁଦ ଗେଟ ନିୟମ ମୁତାବକ ଖୋଲାଯାଉଛି। ଜଳସ୍ତରକୁ ଦେଖି ଇଞ୍ଜିନିୟର ଗାଇଡ଼ଲାଇନ ମୁତାବକ ଗେଟ ଖୋଲୁଛନ୍ତି କିମ୍ବା ବନ୍ଦ କରୁଛନ୍ତି ବୋଲି ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ କହିଛନ୍ତି।
)