ଲେଉଟିଲା ତାତି, ୫ ଡିଗ୍ରୀ ବଢିବ ପାରା

ଭୁବନେଶ୍ବର: ପୁଣି ଥରେ ରାଜ୍ୟକୁ ଲେଉଟିଛି ତାତି। ରବିବାର ଠାରୁ ଉପରମୁହାଁ ହୋଇଛି ପାରଦ। ବିଗତ ସପ୍ତାହ ଧରି ତାତିରେ ସାମାନ୍ୟ ବ୍ରେକ୍ ଲାଗିବା ପରେ ପୁଣି ବୃଦ୍ଧି ପାଇଛି ତାପମାତ୍ରା। 

ଆଭ୍ୟନ୍ତରୀଣ ଓଡିଶା ଏବଂ ଦକ୍ଷିଣ ଛତିଶଗଡ ମଧ୍ୟରେ ସକ୍ରିୟ ଥିବା ଟ୍ରଫ୍ ଲାଇନ ଧିରେ ଧିରେ ଦୁର୍ବଳ ହେଉଛି। ରାଜ୍ୟରେ ଆସନ୍ତା ୫ ଦିନ ପର୍ଯ୍ୟନ୍ତ ଖରା କିମ୍ବା ବର୍ଷା ଜନିତ କୌଣସି ସତର୍କ ସୂଚନା ଜାରି କରାଯାଇନାହିଁ। ହେଲେ ରବିବାର ଠାରୁ କ୍ରମାଗତ ଭାବେ ତାପମାତ୍ରା ବୃଦ୍ଧି ପାଇବା ନେଇ ଆକଳନ କରିଛି ଭୁବନେଶ୍ବର ସ୍ଥିତ ପାଣିପାଗ ବିଜ୍ଞାନ କେନ୍ଦ୍ର।

Also  Read: ତାତିରୁ ମିଳିବ ଆଶ୍ୱସ୍ତି, ଘୂର୍ଣ୍ଣିବଳୟ ପ୍ରଭାବରେ ହାଲୁକା ବର୍ଷା ସମ୍ଭାବନା

ରାଜ୍ୟର ଅଧିକାଂଶ ସ୍ଥାନରେ ଆସନ୍ତା ୨-୩ ଦିନ ମଧ୍ୟରେ ଦିନର ସର୍ବୋଚ୍ଚ ତାପମାତ୍ରା ୪-୫ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବ ବୋଲି ପୂର୍ବାନୁମାନ କରାଯାଇଛି। ଆସନ୍ତା ୫ ଦିନ ମଧ୍ୟରେ ରାତିର ସର୍ବନିମ୍ନ ତାପମାତ୍ରା ଅପରିବର୍ତ୍ତିତ ରହିବ। ଏହା ସହ ଆଗାମୀ ୨୪ ଘଣ୍ଟା ମଧ୍ୟରେ ପାଗ ଶୁଖିଲା ରହିବା ସହ ରାଜ୍ୟ ରାଜଧାନୀ ଭୁବନେଶ୍ବରରେ ଅପରାହ୍ନ ସମୟରେ ଆଂଶିକ ମେଘୁଆ ପାଗ ରହିବା ନେଇ ପୂବାନୁମାନ କରାଯାଇଛି।