ସେପ୍ଟମ୍ବର ୧୩ରୁ NEET EXam, ପରୀକ୍ଷାର୍ଥୀଙ୍କ ସ୍ୱାସ୍ଥ୍ୟ ରକ୍ଷା ଉପରେ ଗୁରୁତ୍ୱ

ଭୁବନେଶ୍ୱର(ଶାନ୍ତସ୍ୱରୂପ ରାଉତ): କୋରୋନା ସଂକଟ ମଧ୍ୟରେ ଆରମ୍ଭ ହେବାକୁ ଯାଉଛି ନିଟ୍ ପରୀକ୍ଷା (NEET Exam) । ଆସନ୍ତା ୧୩ ତାରିଖ ରବିବାର ଏନଟିଏ (NTA-National Testing Agency) ପକ୍ଷରୁ ଅନୁଷ୍ଠିତ ହେବାକୁ ଯାଉଛି ଏହି ଜାତୀୟସ୍ତରର ପରୀକ୍ଷା (National Lable Test) । ବାଦ ବିବାଦ ପରେ ପରୀକ୍ଷା କରିବା ନେଇ ସୁପ୍ରିମକୋର୍ଟ ଶୁଣାଣୀ କରିବା ପରେ ରାଜ୍ୟ ସରକାର ପରୀକ୍ଷାର୍ଥୀଙ୍କ ସମସ୍ତ ଦାୟିତ୍ୱ ନେଇଛନ୍ତି ଜେଇଇ ମେନ୍ ପରୀକ୍ଷା (JEE Main Exam) ଭଳି ନିଟ୍ ପାଇଁ ମଧ୍ୟ ସମସ୍ତ ବ୍ୟବସ୍ଥା କରିବେ ରାଜ୍ୟ ସରକାର । 

ରାଜଧାନୀ ଭୁବନେଶ୍ୱରରେ ସର୍ବାଧିକ ପରୀକ୍ଷାର୍ଥୀ ପରୀକ୍ଷା ଦେଉଥିବାରୁ ସେମାନଙ୍କ ଗମନାଗମନ ଓ ରହଣି ପାଇଁ ଆଜି ମହାନଗର ନିଗମ ପକ୍ଷରୁ ବିଡିଏ କାର୍ଯ୍ୟାଳୟରେ ଏକ ପ୍ରସ୍ତୁତି ବୈଠକ ବସିଥିଲା । ଦୁଇ ଦିନ ପରେ ସର୍ବଭାରତୀୟ ମେଡିକାଲ ପ୍ରବେଶିକା ନିଟ୍ । ରାଜ୍ୟରେ ପରୀକ୍ଷା ଦେବେ ୩୭ ହଜାରରୁ ଅଧିକ ପରୀକ୍ଷାର୍ଥୀ ଛାତ୍ରଛାତ୍ରୀ । କେବଳ ଭୁବନେଶ୍ୱରରେ ୩୧ଟି ପରୀକ୍ଷା କେନ୍ଦ୍ରରେ ପରୀକ୍ଷା ଦେବେ ୧୫ ହଜାରରୁ ଅଧିକବ ଛାତ୍ରଛାତ୍ରୀ । ଏଥିପାଇଁ ବିଡିଏ କାର୍ଯ୍ୟାଳୟରେ ବିଏମସି କମିଶନର ପ୍ରେମ ଚନ୍ଦ୍ର ଚୌଧୁରୀଙ୍କ ଅଧ୍ୟକ୍ଷତାରେ ରାଜ୍ୟ ନୋଡାଲ ଅଫିସରଙ୍କୁ ନେଇ ପ୍ରସ୍ତୁତି ବୈଠକ ବସିଥିଲା । 

ଜେଇଇ ମେନ୍ ଭଳି ନିଟ ପରୀକ୍ଷାର୍ଥୀଙ୍କୁ ରାଜ୍ୟ ସରକାର ସମସ୍ତ ସାହାଯ୍ୟ କରିବାକୁ ଘୋଷଣା କରିଥିବା ବେଳେ ବିଏମସି ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଛି । ବିଭିନ୍ନ ଜିଲ୍ଲାରୁ ପରୀକ୍ଷା ଲାଗି ଭୁବନେଶ୍ୱର ଆସିବା ପାଇଁ ବର୍ତ୍ତମାନ ସୁଦ୍ଧା ୧୩ ଶହ ଛାତ୍ରଛାତ୍ରୀ ପଞ୍ଜୀକରଣ କରିଛନ୍ତି । ଶନିବାର ଠାରୁ ଛାତ୍ରଛାତ୍ରୀ ଆସି ୫ଟି ଇଞ୍ଜିନିୟରିଂ କଲେଜରେ କରାଯାଇଥିବା ରହଣି ସ୍ଥାନରେ ରହିବେ । ରହିବା, ଖାଇବା ସହ ହଷ୍ଟେଲରୁ ପରୀକ୍ଷା କେନ୍ଦ୍ରକୁ ଯିବା ପାଇଁ ସ୍ୱତନ୍ତ୍ର ବସର ବ୍ୟବସ୍ଥା ହୋଇଛି ବୋଲି କମିଶନର କହିଛନ୍ତି ।

ଏହାସହ ପରୀକ୍ଷା କେନ୍ଦ୍ର ବାହାରେ ଟ୍ରାଫିକ୍ ଓ ଭିଡ଼ ନିୟନ୍ତ୍ରଣ ଲାଗି ପୋଲିସ ପ୍ରଶାସନ ମୁତୟନ ହେବେ । ବିଏମସି ପକ୍ଷରୁ ସ୍ୱଚ୍ଛତା ଉପରେ ଧ୍ୟାନ ଦିଆଯିବା ସହ ପରୀକ୍ଷା କେନ୍ଦ୍ର ବାହାରେ ମାଇକ ଦ୍ୱାରା ଗହଳି ନକରିବାକୁ ନିବେଦନ କରାଯିବ । ଜେଇଇ ପରୀକ୍ଷାର୍ଥୀଙ୍କ ପରି ନିଟ୍ ପରୀକ୍ଷାର୍ଥୀଙ୍କ ମଧ୍ୟ ଥର୍ମାଲ ସ୍କ୍ରିନିଂ (Thermal Screening) କରାଯିବ । ଏପରିକି ରହଣି ସ୍ଥଳରେ ସାନିଟାଇଜେସନ (Sanitization), ହ୍ୟାଣ୍ଡ ୱାସ୍ (Hand Wash) ସହ ମେଡିକାଲ ଟିମ (Medical Team) ମଧ୍ୟ ମୁତୟନ ହେବ । ଛାତ୍ରଛାତ୍ରୀ ଯେ କୌଣସି ସୂଚନା ପାଇଁ ନୋଡାଲ ଅଫିସରଙ୍କ ପରାମର୍ଶ ନେଇପାରିବେ । 

ଆସନ୍ତା ୧୩ ତାରିଖ ରବିବାର ଠାରୁ ଆରମ୍ଭ ହେବାକୁ ଏହି ପରୀକ୍ଷାରେ ସାରାଦେଶରେ ୧୫ ଲକ୍ଷ ଛାତ୍ରଛାତ୍ରୀ ପରୀକ୍ଷା ଦେବେ । ଏଥିପାଇଁ ସାରା ରାଜ୍ୟରେ ମୋଟ ୮୩ଟି ପରୀକ୍ଷା କେନ୍ଦ୍ର କରାଯାଇଛି । କୋରୋନା ସଂକଟ (Corona Crisis) ବେଳେ ସମସ୍ତ କଟକଣା ସହ ଛାତ୍ରଛାତ୍ରୀ କିଭଳି ସୁରକ୍ଷିତ ରହିବା ସହ ପରୀକ୍ଷା ଦେବେ ସେଥିପାଇଁ ସମସ୍ତ ବ୍ୟବସ୍ଥା କରିଛି ନ୍ୟାସନାଲ୍ ଟେଷ୍ଟିଂ ଏଜେନ୍ସିଂ (National Testing Agency) ।