ନିରଞ୍ଜନଙ୍କ ବିରୋଧରେ ବିଦ୍ରୋହ

ଗତ ତିରିଶ ତାରିଖ ବୁଧବାର ଦିନ ପାନ୍ଥନିବାସରେ ମେଳି ବାନ୍ଧିଥିଲେ ନିରଞ୍ଜନ ବିରୋଧୀ । ଦଳ ବର୍ତ୍ତମାନ ବିପର୍ଯ୍ୟସ୍ତ ପାଇଁ ନିରଞ୍ଜନଙ୍କୁ ଦାୟୀ କରିବା ସହ ତୁରନ୍ତ ପିସିସି ନେତୃତ୍ୱ ପରିବର୍ତ୍ତନ କରି ବିଧାୟକ ମହମ୍ମଦ ମୋକିମଙ୍କୁ ପିସିସି ସଭାପତି କରିବା ଦାବି କରି ବୈଠକରେ ଚର୍ଚ୍ଚା କରିଥିଲେ ।

ନିରଞ୍ଜନଙ୍କ ବିରୋଧରେ ବିଦ୍ରୋହ

ମଳୟ ମହାନ୍ତି, ଭୁବନେଶ୍ୱର: କଂଗ୍ରେସରେ ଚାଲିଛି ବିଦ୍ରୋହର ମହାନାଟକ । ନିରଞ୍ଜନଙ୍କ ପିସିସି ସଭାପତି ପଦରୁ ହଟାଇବା ପାଇଁ ଚାଲିଛି ମହାମେଳି । ମହାମେଳିର ମୂଳଦୂଆ ପାନ୍ଥନିବାସରେ ପଡିଥିବାବେଳେ ଆଜି ଘରୋଇ ହୋଟେଲରେ ରୁଦ୍ଧଦ୍ୱାର ବୈଠକ କରାଯାଇ ଦିଲ୍ଲୀରେ ହାଇକମାଣ୍ଡଙ୍କୁ ଅବଗତ କରାଇବାର ଯୋଜନା ହୋଇଛି । ଆସନ୍ତା ୧୨ ତାରିଖ ମଧ୍ୟରେ  ବିଦ୍ରୋହୀ ଗୋଷ୍ଠୀଙ୍କର ଏକ ୧୦ ଜଣିଆ ପ୍ରତିନିଧି ଦଳ ଦିଲ୍ଲୀ ଗସ୍ତ କରି ଏ ସବୁ ପ୍ରସ୍ତାବ ସଂପର୍କରେ ସୋନିଆଙ୍କୁ ଅବଗତ କରାଇବେ ।

ଗତ ତିରିଶ ତାରିଖ ବୁଧବାର ଦିନ ପାନ୍ଥନିବାସରେ ମେଳି ବାନ୍ଧିଥିଲେ ନିରଞ୍ଜନ ବିରୋଧୀ । ଦଳ ବର୍ତ୍ତମାନ ବିପର୍ଯ୍ୟସ୍ତ ପାଇଁ ନିରଞ୍ଜନଙ୍କୁ ଦାୟୀ  କରିବା ସହ ତୁରନ୍ତ ପିସିସି ନେତୃତ୍ୱ ପରିବର୍ତ୍ତନ କରି ବିଧାୟକ ମହମ୍ମଦ ମୋକିମଙ୍କୁ ପିସିସି ସଭାପତି କରିବା ଦାବି କରି ବୈଠକରେ ଚର୍ଚ୍ଚା କରିଥିଲେ ଏବଂ ଖୋଲାଖୋଲି ଗଣମାଧ୍ୟମକୁ ଏ ସଂପର୍କରେ ସୂଚନା ଦେଇଥିଲେ । 

ବିରୋଧୀରେ ବର୍ଷିବାର ଦିନକ ପରେ ଅର୍ଥାତ ଗୁରୁବାର ଦିନ କଂଗ୍ରେସ ପକ୍ଷରୁ କରାଯାଇଥିବା ସ୍ମିତାରାଣୀ ମୃତ୍ୟୁ ଘଟଣାରେ ରାଜଭବନ ଘେରାଉ ପ୍ରସଙ୍ଗରେ ବିରୋଧୀମାନେ ଗୋଟିଏ ମଞ୍ଚରେ  ନିରଞ୍ଜନଙ୍କ ସହ ବସିଲେ । ଏପରିକି ନିରଞ୍ଜନଙ୍କ ସହ ହସିଖୁସି କଥା ମଧ୍ୟ ହେଲେ । ଏହାର ଦିନକ ପରେ ଅର୍ଥାତ ନଭେମ୍ବର ୧ତାରିଖ ଶୁକ୍ରବାର ଦିନ ଅଚାନକ ଭାବେ ନିରଞ୍ଜନ ବିରୋଧୀ ନେତାଙ୍କୁ ନିରଞ୍ଜନଙ୍କ ବାସଭବନରେ ଦେଖିବାକୁ ମିଳିଥିଲା  । 

ନିରଞ୍ଜନଙ୍କ ସହ ଦୀର୍ଘ ସମୟ ଧରି ରୁଦ୍ଧଦ୍ୱାର ବୈଠକ ସାରି ବାହାରିବା ପରେ ନିରଞ୍ଜନଙ୍କୁ ଭୀଷ୍ମ ପିତାମହ ଆଖ୍ୟା ଦେବା ସହ ବିରୋଧୀମାନେ ନିରଞ୍ଜନଙ୍କୁ ଉପଦେଷ୍ଟା ପଦ ଦେବା ସହ ପସିସି ସଭାପତି ପାଇଁ ମୋକିମଙ୍କ ନାମ କହିଲେ । ଘଟଣାର ଚତୁର୍ଥ ଏପିସୋଡରେ ବହୁ ନିରଞ୍ଜନ  ବିଦ୍ରୋହୀ ନେତା ଭୁବନେଶ୍ୱର ଏକ ଘରୋଇ ହୋଟେଲରେ ଏକାଠି ହେବା ସହ ଦୁଇ ଘଣ୍ଟା ଧରି ଆଲୋଚନା କରିଥିଲେ । 
ଏହା ପରେ ଆସନ୍ତା ୧୨ ତାରିଖ ମଧ୍ୟରେ  ଦିଲ୍ଲୀରେ ସୋନିଆ ଗାନ୍ଧୀଙ୍କୁ ଦେଖା କରି ମହମ୍ମଦ ମୋକିମଙ୍କୁ ପିସିସି ସଭାପତି କରିବା ପ୍ରସ୍ତାବ ସହ ଓଡିଶା କଂଗ୍ରେସକୁ ଦୃଢ କରିବା ପାଇଁ ବହୁ ପ୍ରସ୍ତାବ ଉପରେ ମୋହର ବାଜିଛି । ଅନ୍ୟପକ୍ଷରେ ନିରଞ୍ଜନଙ୍କ ବିରୋଧରେ ମେଳି କରାଯିବା ଦ୍ୱାରା  ଲୋକଙ୍କ ପାଖକୁ ଭୁଲ ବାର୍ତ୍ତା ଯାଉଥିବା କଂଗ୍ରେସ ବିଧାୟକ ସୁରେଶ ରାଉତରାୟ କହିଛନ୍ତି । 

ମହମ୍ମଦ ମୋକିମ ପିସିସି ସଭାପତି ହେଲେ କିଛି ଅସୁବିଧା ନାହିଁ କିନ୍ତୁ ଏ କଥା ସୋନିଆ ଗାନ୍ଧୀ ନିଷ୍ପତ୍ତି ନେବେ । ତେଣୁ ଏ ସଂପର୍କରେ ବାରମ୍ବାର ବୈଠକ କଲେ ତୃଣମୂଳ ସ୍ତରକୁ ଖରାପ ବାର୍ତ୍ତା ଯାଉଥିବା କୁହାଯାଇଛି । ଅନ୍ୟପକ୍ଷେ ପିସିସି ସଭାପତି ନିରଞ୍ଜନଙ୍କ କହିବା କଥା ଗୋଟିଏ ପରିବାର, ଦେଶ ଏବଂ ରାଜନୈତିକ ଦଳରେ ଶୃଙ୍ଖଳା ଭଲ ରହିଲେ ଏହା ଆଗେଇବ ନ ହେଲେ ଆଗେଇବ ନାହିଁ ।

Tags: