ପୂର୍ଣ୍ଣିମା ପାଇଁ ଖସୁନି ବନ୍ୟାଜଳ: ଜଳସମ୍ପଦ ବିଭାଗ ଯନ୍ତ୍ରୀ

ମଳୟ ରଞ୍ଜନ ମହାନ୍ତି, ଭୁବନେଶ୍ୱର: ବର୍ଷା କମିଲା, ବନ୍ୟାଜଳ ଆସିବା ବି କମିଲା, କିନ୍ତୁ ବନ୍ୟାଜଳ ସମୁଦ୍ରକୁ ଯାଉନି। ଏଭଳି କିଛି ଦୟନୀୟ ସ୍ଥିତି ସୃଷ୍ଟି ହୋଇଛି। ପୂର୍ଣିମା ଥିବାରୁ ସମୁଦ୍ରକୁ ଆଦୌ ବନ୍ୟାଜଳ ନିଷ୍କାସିତ ହୋଇପାରୁ ନ ଥିବା ଜଳସଂପଦ ବିଭାଗ କହିଛି। ପୂର୍ଣମୀ ଯୋଗୁ ଜୁଆର ଠେଲିକି ରଖିଛି। ଫଳରେ ବନ୍ୟା ଜଳ ସଠିକ ଭାବେ ସମୁଦ୍ରକୁ ଯାଇ ପାରୁନି ବୋଲି ଜଳସମ୍ପଦ ବିଭାଗ କହିଛି। ଏଥିପାଇଁ କେନ୍ଦ୍ରାପଡାଠାରୁ ଆରମ୍ଭ କରି ଜଗତସିଂହପୁର, ଭଦ୍ରକ, ପୁରୀ ସହ ବିଭିନ୍ନ ଜିଲ୍ଲାରେ ବନ୍ୟାଜଳ ଜମି ରହିଛି। 

ଏପରିକି ଅତି କମରେ ତିନି ଦିନ ଧରି ଏଭଳି ସ୍ଥିତି ଜାରି ରହିବ ବୋଲି ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଜ୍ୟୋତିର୍ମୟ ରଥ କହିଛନ୍ତି। ଉପରମୁଣ୍ଡରେ ଆଦୌ ବର୍ଷା ନ ଥିବାରୁ ହୀରାକୁଦକୁ ବନ୍ୟାଜଳ ପ୍ରବେଶ ବହୁ ପରିମାଣରେ କମିଯାଇଛି। କିନ୍ତୁ ହୀରାକୁଦରୁ ଛଡାଯାଇଥିବା ବନ୍ୟାଜଳ ମୁଣ୍ଡୁଳିରେ ସେକେଣ୍ଡ ପ୍ରତି ୯ ଲକ୍ଷରୁ ଅଧିକ ଘନଫୁଟରେ ପ୍ରବାହିତ ହେଉଛି। ଧୀରେଧୀରେ ଏହା କମିବ। ଅନ୍ୟପକ୍ଷରେ ସବୁଠୁ ବଡ କଥା ହେଉଛି ଜଳସଂପଦ ବିଭାଗ ଅଭିଜ୍ଞ ଯନ୍ତ୍ରୀଙ୍କ ଉଦ୍ୟମ ଯୋଗୁଁ ରାଜ୍ୟରେ ହୋଇଥିବା ୩୬ଟି ଘାଇ ଅପରିବର୍ତ୍ତିତ ରହିଛି। ଆଉ ଅଧିକ ଘାଇ ହୋଇନି ବୋଲି ସେ କହିଛନ୍ତି। 

ଏପରିକି ବନ୍ୟାଜଳ ଯୋଗୁ ବିଭିନ୍ନ ନଦୀବନ୍ଧରେ ସୃଷ୍ଟି ହୋଇଥିବା ୭୨୯ ଘଳିଆକୁ ବିଭିନ୍ନ ବାଟରେ ବନ୍ଦ କରି ବହୁ ଘାଇକୁ ଅଟକା ଯାଇପାରିଥିବା କୁହାଯାଇଛି। ଏପରିକି ବିଭିନ୍ନ ସ୍ଥାନରେ ଘାଇ ମରାମତି କାର୍ଯ୍ୟ ଆରମ୍ଭ ହୋଇଛି। ଯାଜପୁରର ଦତ୍ତପୁରରେ ଘାଇ ମରାମତି କାର୍ଯ୍ୟ ଆରମ୍ଭ ହୋଇଥିବା ବେଳେ ମୟୂରଭଞ୍ଜରେ ବର୍ଷା ଯୋଗୁ ଘାଇ ମରାମତି କାର୍ଯ୍ୟ ସାମାନ୍ୟ ବିଳମ୍ବ ହୋଇଥିବା ଜଳସଂପଦ ବିଭାଗ ପକ୍ଷରୁ କୁହାଯାଇଛି। ମହାନଦୀ ସିଷ୍ଟମକୁ ଛାଡିଲେ ବୈତରଣୀ, ବ୍ରାହ୍ମଣୀ ଏବଂ ସୁବର୍ଣରେଖା ସିଷ୍ଟମରେ ବନ୍ୟା ସ୍ଥିତି ନିୟନ୍ତ୍ରଣକୁ ଆସିଛି। ଏପରିକି ବିଭିନ୍ନ ସ୍ଥାନରେ ହୋଇଥିବା ଘାଇକୁ ତୁରନ୍ତ ମରାମତି କରିବା ସହ କଟ ଅଫ ରୋଡକୁ ସଜାଡିବା ପାଇଁ ଜଳସଂପଦ ଯନ୍ତ୍ରୀ ଏବଂ ଅଧିକାରୀମାନେ ପ୍ରସ୍ତୁତ ହୋଇ ରହିଛନ୍ତି। ଅନ୍ୟପକ୍ଷରେ ପୂର୍ଣିମା ପରେ ପରେ ବନ୍ୟାଜଳ ସମୁଦ୍ରକୁ ନିଷ୍କାସିତ ହୋଇଯିବ ବୋଲି କୁହାଯାଇଛି।