ଅନଲାଇନ ପାଠପଢା ଯୋଗୁଁ ସ୍ୱାସ୍ଥ୍ୟଗତ ସମସ୍ୟା ନେଇ ଏନସିପିସିଆର ଅଧ୍ୟକ୍ଷଙ୍କୁ ଅଭିଯୋଗ କଲା ଓଡିଶା ଅଭିଭାବକ ମହାସଂଘ

ଭୁବନେଶ୍ୱର:- କୋରୋନା ସଙ୍କଟ କାରଣରୁ ବର୍ତ୍ତମାନ ସମସ୍ତ ଶିକ୍ଷାନୁଷ୍ଠାନ ବନ୍ଦ ରହିଛି । ଅନ୍ୟପଟେ ଏହି ସମୟରେ ଅନଲାଇନ ପାଠପଢା ଚାଲୁ ରହିଛି । ଅନଲାଇନ୍ ପାଠପଢା ଯୋଗୁଁ ମୋବାଇଲ ସ୍କ୍ରିନକୁ ଅଧିକ ସମୟ ଦେଖିବା ହେତୁ ବ୍ଲୁ ଲାଇଟ ରେଡ଼ିଏସନ ଦ୍ୱାରା ଛୋଟ ପିଲାମାନଙ୍କ ଆଖିରେ ସମସ୍ୟା ଓ ମୁଣ୍ଡବ୍ୟଥା ତଥା ବେକ ଓ ପିଠିରେ ଯନ୍ତ୍ରଣା ହେବାର ଅନେକ ଅଭିଯୋଗ ଅଭିଭାବକ ମାନଙ୍କଠାରୁ ବହୁମାତ୍ରାରେ ମିଳୁଛି । କିଛି କ୍ଷେତ୍ରରେ ଅଭିଭାବକମାନେ ପିଲାଙ୍କୁ ଚିକିତ୍ସା କରି ପାରୁଛନ୍ତି ଓ କିଛି କ୍ଷେତ୍ରରେ ମଧ୍ୟ ବନ୍ଦ ଓ  କୋରୋନା କାରଣରୁ ଚିକିତ୍ସା ସମ୍ଭବ ହେଉନାହିଁ । ଆଗକୁ ଏହା ଏକ ଗୁରୁତର ସମସ୍ୟା ଭାବରେ ମୁଣ୍ଡ ଟେକିବ । ଏହାକୁ କିପରି ସୁପରିଚାଳନା କରାଯିବା ତାହାର କିଛି ନିର୍ଦ୍ଧିଷ୍ଟ ନିୟମ ନକରି ଅତି ତରବରିଆ ଭାବେ ମାନବ ସମ୍ବଳ ବିକାଶ ମନ୍ତ୍ରାଳୟ ଏକ ଗାଇଡଲାଇନ ଅନଲାଇନ କ୍ଳାସର ୪ ମାସ ପରେ ଘୋଷଣା କଲେ । ଏହା କୌଣସି ବିନା ଏକ୍ସପର୍ଟଙ୍କ ପରାମର୍ଶରେ କରାଯାଇଛି ବୋଲି ଅଭିଭାବକ ମହାସଂଘର ଅଧ୍ୟକ୍ଷ ବାସୁଦେବ ଭଟ୍ଟ ଅଭିଯୋଗ କରିଛନ୍ତି ।

ଭଟ୍ଟ କହିଛନ୍ତି ଯେ, ଏନସିପିସିଆର ଏପ୍ରିଲ ୧୭ ତାରିଖରେ ଯେଉଁ ଗାଇଡଲାଇନ ଅନଲାଇନ ସବୁ ରାଜ୍ୟସରକାର ମାନଙ୍କୁ ପଠାଇଥିଲା ତାହାର ଏହି ମାନବ ସମ୍ବଳ ବିକାଶ ମନ୍ତ୍ରାଳୟର ଗାଇଡଲାଇନ ବିପରୀତ ଓ ପିଲାଙ୍କ ଅଧିକାର ବିରୋଧୀ । 

ସେପଟେ ସରକାରଙ୍କ ଦ୍ୱାରା ନିର୍ଦ୍ଧାରିତ ଆପକୁ ପ୍ରାଇଭେଟ ସ୍କୁଲମାନେ ଅନଲାଇନ୍  ପାଠପଢ଼ାରେ ବ୍ୟବହାର ନକରି ଅନ୍ୟାନ୍ୟ ବେସରକାରୀ କମ୍ପାନୀ ଆପକୁ ବ୍ୟବହାର କରୁଛନ୍ତି । ଯାହା ଦ୍ୱାରା ଅଭିଭାବକ ମାନଙ୍କର ସମସ୍ତ ତଥ୍ୟ ସେହି ଆପ କମ୍ପାନୀ ପାଖରେ ରହୁଛି । ଏହା ମଧ୍ୟ ଆଗାମୀ ଦିନରେ ବିଭିନ୍ନ ସାଇବର ଠକେଇକୁ ପ୍ରୋତ୍ସାହନ ଦେବାରେ ସହାୟକ ହେବ । ଛୋଟ ପିଲାମାନଙ୍କୁ ମୋବାଇଲ ଠାରୁ ଦୂରେଇ ରଖିବାକୁ ସମସ୍ତ ସ୍ୱାସ୍ଥ୍ୟ ବିଶେଷଜ୍ଞ ଓ ଡାକ୍ତର ପରାମର୍ଶ ଦେଇଛନ୍ତି । ସରକାରଙ୍କ ଅନଲାଇନ କ୍ଲାସ ପାଇଁ ଦେଇଥିବା ସମୟ ଅବଧିକୁ ମଧ୍ୟ ପ୍ରାଇଭେଟ ସ୍କୁଲମାନେ ନ ମାନି ପଇସା ପାଇବା ଆଶାରେ  ଘଣ୍ଟା ଘଣ୍ଟା  ଧରି କ୍ଲାସ କରାଉଛନ୍ତି ।

ଶିଶୁମାନେ ଦେଶର ଭବିଷ୍ୟତ । ସେମାନଙ୍କ ଉତ୍ତମ ସ୍ୱାସ୍ଥ୍ୟ ଆମକୁ ଏକ ସୁସ୍ଥ ମାନବ ସମ୍ବଳ ଗଠନ କରିବାରେ ସହାୟକ ହେବ । ତେଣୁ ଉପରୋକ୍ତ ସମସ୍ତ ସମସ୍ୟାକୁ ଆଖି ଆଗରେ ରଖି  ତରବରିଆ ଭାବେ କୌଣସି ପଦକ୍ଷେପ ନ ନେଇ ଶିଶୁ ସ୍ୱାସ୍ଥ୍ୟ ବିଶେଷଜ୍ଞ ମାନଙ୍କ ପରାମର୍ଶ ନେଇ ଏ ସଂକ୍ରାନ୍ତରେ ଉଚିତ ପଦକ୍ଷେପ ନେବାକୁ ମହାସଂଘ ଏନସିପିସିଆର ଅଧ୍ୟକ୍ଷଙ୍କୁ ନିବେଦନ କରିଛି । ଏହାକୁ ଅତ୍ୟନ୍ତ ଗୁରୁତର ସହ ବିଚାର କରି ମାନବ ସମ୍ବଳ ବିକାଶ ମନ୍ତ୍ରଣାଳୟ, ଏନସିଏର୍ଟି, ରାଜ୍ୟ ଶିକ୍ଷା ସଚିବ ଓ ଏସସିଏର୍ଟିକୁ ନୋଟିସ ଜାରି କରିବାକୁ ଅନୁରୋଧ କରାଯାଇଛି । ଏହାଦ୍ୱାରା ଦେଶର ୧୫ କୋଟି ପିଲା ଅନଲାଇନ ଅସୁବିଧାରୁ ମୁକ୍ତ ହେବେ ବୋଲି ସହ ଅଧକ୍ଷ୍ୟ ପ୍ରସନ୍ନ ବିଷୋୟୀ କହିଛନ୍ତି ।