କୋରୋନା ମୃତକଙ୍କ ପରିବାରକୁ ସହାୟତାର ହାତ ବଢ଼ାଇଲେ ଅର୍ଦ୍ଧେନ୍ଦୁ

ଭୁବନେଶ୍ୱର: ଓଲିଉଡ ଅଭିନେତା ଅର୍ଦ୍ଧେନ୍ଦୁଙ୍କ ମହାନତା । ରାଜ୍ୟର ତୃତୀୟ କୋରୋନା ମୃତକଙ୍କ ପରିବାରବର୍ଗଙ୍କୁ ସହାୟତାର ହାତ ବଢ଼ାଇଛନ୍ତି ଅଭିନେତା ଅର୍ଦ୍ଧେନ୍ଦୁ ସୁନ୍ଦର ସାହୁ । ତାଙ୍କ ଘରକୁ ଯାଇ ୫୦ ହଜାର ଟଙ୍କାର ସହାୟତା ରାଶି ପ୍ରଦାନ କରିଛନ୍ତି । ଯେତେବେଳେ ଜଣେ ସଦସ୍ୟଙ୍କୁ ହରାଇ ପୁରା ପରିବାର ଭାଙ୍ଗିପଡ଼ିଛି, ଠିକ୍ ସେହି ସମୟରେ ମୃତକଙ୍କ ପରିବାର ସହ ଛିଡ଼ା ହୋଇଛନ୍ତି ଓଲିଉଡ଼ ଅଭିନେତା । 

କିଛି ଦିନ ପୂର୍ବରୁ ମଧ୍ୟ କୋରୋନା ମୁକାବିଲା ପାଇଁ ଆଗେଇ ଆସିଥିଲେ ଅଭିନେତା ଅର୍ଦ୍ଧେନ୍ଦୁ । ସେ ଏବଂ ତାଙ୍କ ପତ୍ନୀ ଡାକ୍ତର ପଲ୍ଲବୀ ମହାରଥୀ ମୁଖ୍ୟମନ୍ତ୍ରୀ ରିଲିଫ ଫଣ୍ଡଙ୍କୁ ୩ ଲକ୍ଷ ଟଙ୍କାର ସହାୟତା ପ୍ରଦାନ କରିଥିଲେ । ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କ ଉପସ୍ଥିତିରେ ଏହି ଟଙ୍କା ଦେଇଥିଲେ ଅର୍ଦ୍ଧେନ୍ଦୁ । 

କେବଳ ଏତିକି କାହିଁକି, ପୁଲୱାମା ଆକ୍ରମଣରେ ଶହୀଦ ହୋଇଥିବା ଯବାନଙ୍କ ପରିବାରବର୍ଗଙ୍କୁ ମଧ୍ୟ ସହାୟତାର ହାତ ବଢ଼ାଇଥିଲେ ଏହି ଓଲିଉଡ୍ ଅଭିନେତା । ତେବେ ତାଙ୍କର ଏହି ଅବଦାନ ପାଇଁ ସମଗ୍ର ରାଜ୍ୟ ସହିତ ସିନେତାରକା ପ୍ରଶଂସା କରିଛନ୍ତି ।