କୋଭିଡ୍ ନିୟମ ଉଲ୍ଲଂଘନରୁ ପ୍ରାୟ ୧ କୋଟି ୪୦ ଲକ୍ଷ ଟଙ୍କା ଆଦାୟ କଲା ପୋଲିସ

ଭୁବନେଶ୍ୱର: କୋଭିଡ୍ ନିୟମ ଉଲ୍ଲଂଘନରୁ ପୋଲିସ ଆଦାୟ କଲାଣି ପାଖାପାଖି ୧ କୋଟି ୪୦ ଲକ୍ଷ ଟଙ୍କା । କେବଳ ମାସ୍କ ବ୍ୟବହାର ଉଲ୍ଲଂଘନରୁ ଆଦାୟ ହୋଇଛି ୧ କୋଟି ୨୫ ଲକ୍ଷ ୮୪ ହଜାର ୧୮୦ ଟଙ୍କା ତଣ୍ଡ । ସାମାଜିକ ଦୂରତ୍ୱ ଉଲ୍ଲଂଘନରେ ୧୧ ଲକ୍ଷ ୭୪ ହଜାର ୩୫୦ ଟଙ୍କା ଆଦାୟ କରାଯାଇଛି । ସେହିପରି ସାପ୍ତାହିକ ଲକ୍ ଡାଉନ୍ ଉଲ୍ଲଂଘନ ମାମଲାରେ ୩ ହଜାର ଟଙ୍କା ଏବଂ ରାତ୍ରୀକାଳୀନ କର୍ଫ୍ୟୁ ଉଲ୍ଲଂଘନ ପାଇଁ ୧ ଲକ୍ଷ ୩ ହଜାର ୮୦୦ ଟଙ୍କା ଆଦାୟ କରାଯାଇଛି । ଆଜି(ଶୁକ୍ରବାର) ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭିଡ଼ିଓ କନଫରେନ୍ସିଂ ବୈଠକରେ ପୋଲିସ ଡିଜି ଶ୍ରୀ ଅଭୟ ଏହି ସୂଚନା ଦେଇଛନ୍ତି ।

ଡିଜି କହିଛନ୍ତି ଯେ, ଲକଡାଉନ୍ ସମୟରେ ଘରୋଇ ହିଂସା ଅଭିଯୋଗ କ୍ରମେ ୯୨୦୫ ମହିଳାଙ୍କ ସହିତ ଫୋନରେ ଯୋଗାଯୋଗ କରାଯାଇଛି । ୫୩ଟି ମାମଲାରେ ଘରୋଇ ହିଂସାର ସୂଚନା ମିଳିଛି । ସାମଗ୍ରିକ ଭାବେ ପୋଲିସ ପକ୍ଷରୁ ବିଭିନ୍ନ କ୍ଷେତ୍ରରେ ସଚେତନତା କାର୍ଯ୍ୟକ୍ରମ, ବିଶେଷ କରି ମାସ୍କ ବ୍ୟବହାର ଓ ସାମାଜିକ ଦୂରତା ପାଳନ ପାଇଁ ଲୋକମାନଙ୍କୁ ସଚେତନ କରାଯାଉଛି ବୋଲି ଡିଜି କହିଛନ୍ତି ।