ବିଜେପିକୁ ମହାରଥୀଙ୍କ ପାଲଟା ଆକ୍ରମଣ

ସୋମବାର ବିଜେପି ଅଭିଯୋଗ ଆଣି କହିଥିଲା ଯେ ସାଧାରଣ ଲୋକଙ୍କ ଜମି ସହ ଚାଷ ଜମିକୁ ଜଳ ସେଚନ ପାଇଁ ହୋଇଥିବା କେନାଲକୁ ମାଡି ବସି ଫାର୍ମ ହାଉସ କରିଛନ୍ତି ମହାରଥୀ । ସେ ପ୍ରାୟ ଶହେ କୋଟିରୁ ଉର୍ଦ୍ଧ୍ୱ ଟଙ୍କାର ଜମି ମାଡି ବସିଛନ୍ତି ।

ବିଜେପିକୁ ମହାରଥୀଙ୍କ ପାଲଟା ଆକ୍ରମଣ
ଫାଇଲ ଫଟୋ

ଭୁବନେଶ୍ୱର: ପିପିଲି ବିଧାୟକ ପ୍ରଦୀପ ମହାରଥିଙ୍କ ବିରୋଧରେ ଜମି ଦୁର୍ନୀତିର ଅଭିଯୋଗ ଆଣିଥିଲା ବିଜେପି । ଯାହାର ଜବାବ ରଖିଛନ୍ତି ମହାରଥି । ବିଜେପିକୁ ଚ୍ୟାଲେଞ୍ଜ ଦେଇ ସେ କହିଛନ୍ତି ଯେ, ୧୦୦ କୋଟି ତ ଦୂରର କଥା, ୧୦୦ ଟଙ୍କାର ଜମି ଯଦି ମୁଁ ପିପିଲି କି ଡେଲାଙ୍ଗରେ ରେକର୍ଡ ରେଜିଷ୍ଟ୍ରି କରିଥିବା ପ୍ରମାଣିତ ହୁଏ, ତେବେ ମୁଁ ଵିଧାନସଭା ଆସିବି ନାହିଁ । ବିଜେପି ନିର୍ବାଚନ ହାରିବା ପରେ କେବଳ ବିକଳ ହୋଇ ଏଭଳି ମିଥ୍ୟା ଅଭିଯୋଗ ଆଣୁଛି ବୋଲି ସେ କହିଛନ୍ତି ।

ସୋମବାର ବିଜେପି ଅଭିଯୋଗ ଆଣି କହିଥିଲା ଯେ ସାଧାରଣ ଲୋକଙ୍କ ଜମି ସହ ଚାଷ ଜମିକୁ ଜଳ ସେଚନ ପାଇଁ ହୋଇଥିବା କେନାଲକୁ ମାଡି ବସି ଫାର୍ମ ହାଉସ କରିଛନ୍ତି ମହାରଥୀ । ସେ ପ୍ରାୟ ଶହେ କୋଟିରୁ ଉର୍ଦ୍ଧ୍ୱ ଟଙ୍କାର ଜମି ମାଡି ବସିଛନ୍ତି ।  ଏହାକୁ ନେଇ ବିଜେପି ଅଭିଯୋଗ କରିବା ପରେ ବିଭାଗୀୟ ମନ୍ତ୍ରୀ ମଧ୍ୟ ମୁହଁ ଖୋଲି କହିଥିଲେ ଯେ, ଅଭିଯୋଗ ଆସିଲେ ତଦନ୍ତ କରାଯିବ ଓ ଏହା ଉପରେ କାର୍ଯ୍ୟାନୁଷ୍ଠାନ ନିଆଯିବ ।

ବିଜେପି ଆହୁରି କହିଥିଲା ଯେ, ପାଖାପାଖି ଶହେ କୋଟିରୁ ଉର୍ଦ୍ଧ ଟଙ୍କାର ଜମି ହଡପ କରିଛନ୍ତି ମହାରଥୀ । ଏହି ବିବାଦୀୟ ଫାର୍ମ ହାଉସଟି ପିପିଲି ନିକଟ ହୁଙ୍କେଇପୁରରେ ରହିଛି । ଫାର୍ମ ହାଉସ କରିବା ପାଇଁ ଲୋକଙ୍କୁ ଧମକ ଦେଇ ଜମି ହଡପ କରିଛନ୍ତି ସେ । ଏ ଘଟଣାକୁ ନେଇ ହାଇକୋର୍ଟଙ୍କ ନିର୍ଦ୍ଦେଶ ପରେ ମଧ୍ୟ ଜିଲ୍ଲାପାଳ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରି ନାହାନ୍ତି । ଏ ଘଟଣା ଉପରେ ରାଜ୍ୟ ସରକାର କଡା କାର୍ଯ୍ୟାନୁଷ୍ଠାନ ପାଇଁ ଦାବି କରିଛି ବିଜେପି । 

କେତେବେଳେ ବେବିନା ଗଣ ଦୁଷ୍କର୍ମ ମାମଲାର ଅଭିଯୁକ୍ତ ଲୁଚି ରହିବା ଘଟଣା,  ଆଉ କେତେବେଳେ ନିର୍ବାଚନ ସମୟରେ ଟଙ୍କା ବଣ୍ଟାକୁ ଧରିଥିବା ନିର୍ବାଚନ ଅଧିକାରୀଙ୍କୁ ମାଡମରା ଘଟଣା । ସବୁବେଳେ ଚର୍ଚ୍ଚାରେ ପୂର୍ବତନ ମନ୍ତ୍ରୀ ପ୍ରଦୀପ ମହାରଥୀ ଓ ତାଙ୍କ ବିବାଦୀୟ ଫାର୍ମ ହାଉସ । ସାଧାରଣ ଲୋକଙ୍କ ଜମି ସହ ଜଳସେଚନ କେନାଲକୁ ପୋତି ଫାର୍ମ ହାଉସ କରିଛନ୍ତି ମହାରଥୀ ବୋଲି ବିଜେପି କହିଛି ।