ନିଟ ପାଇଁ ବ୍ୟାପକ ପ୍ରସ୍ତୁତି, ଚାଲିବ ୪ଟି ସ୍ୱତନ୍ତ୍ର ଟ୍ରେନ

ଭୁବନେଶ୍ୱର: ଆସନ୍ତା କାଲି ନିଟ ପରୀକ୍ଷା. ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି. ଉଭୟ ଦିବ୍ୟାଙ୍ଗ ଓ କୋରୋନା ସଂକ୍ରମିତ ପରୀକ୍ଷାର୍ଥୀଙ୍କ ପାଇଁ ସ୍ୱତନ୍ତ୍ର ପରୀକ୍ଷା କୋଠରୀର ବ୍ୟବସ୍ଥା କରାଯାଇଛି. ଜେଇଇ ମେନ ଭଳି ନିଟ୍ ପରୀକ୍ଷା କେନ୍ଦ୍ରରେ ରହିବ ଆଇସୋଲେସନ ରୁମ୍ । ଅଧିକ ତାପମାତ୍ରା ବା ଅସୁସ୍ଥ ପରୀକ୍ଷାର୍ଥୀମାନେ ଏଠାରେ ପରୀକ୍ଷା ଦେବେ । ସେମାନଙ୍କ ଲାଗି ଦୁଇ ଜଣ ପରୀକ୍ଷା ନିୟନ୍ତ୍ରକ ପିପିଇ କିଟ୍ ପିନ୍ଧି ପରୀକ୍ଷା ପରିଚାଳନା କରିବେ । ଏହାସହ ଶାରୀରିକ ଭିନ୍ନକ୍ଷମ ପରୀକ୍ଷାର୍ଥୀଙ୍କ ପାଇଁ ମଧ୍ୟ ସ୍ୱତନ୍ତ୍ର ଗୃହର ବ୍ୟବସ୍ଥା କରାଯାଇଛି । 

ଚଳିତ ବର୍ଷ ପରୀକ୍ଷାର୍ଥୀଙ୍କ ଖାତାରେ ଟିପ ଚିହ୍ନ ଉଠାଇ ଦିଆଯାଇଥିବା ବେଳେ କେବଳ ଦସ୍ତଖତ ଦେବେ । ମୋଟାମୋଟି ଭାବେ ପରୀକ୍ଷାର୍ଥୀ ମାନଙ୍କ ସହ ପରୀକ୍ଷା ନିୟନ୍ତ୍ରକ ଓ ପରୀକ୍ଷା ସହ ଜଡିତ ସମସ୍ତ କର୍ମଚାରୀ କିଭିଳି ସୁରକ୍ଷିତ ରହିବେ ସେଥିପ୍ରତି ଗୁରୁତ୍ୱ ଦିଆଯାଇଥିବା ନିଟ୍ ରାଜ୍ୟ ସଂଯୋଜିକା ପଲ୍ଲୀ ପଟ୍ଟନାୟକ ସୂଚନା ଦେଇଛନ୍ତି । 

ସେହିପରି ନିଟ୍ ପକ୍ଷରୁ ମାସ୍କ ସମେତ ଖାଇବା ପାଇଁ ବିସ୍କୁଟ ପ୍ୟାକେଟ ପ୍ରଦାନ କରାଯିବ ବୋଲି କହିଛନ୍ତି । ଚଳିତ ବର୍ଷ ରାଜ୍ୟର ୭ଟି ସହରରେ ମୋଟ ୮୪ ପରୀକ୍ଷା କେନ୍ଦ୍ର କରାଯାଇଛି । ରାଜ୍ୟରୁ ମୋଟ ୩୬ ହଜାର ୪୫୯ ପରୀକ୍ଷାର୍ଥୀ ପରୀକ୍ଷା ଦେବେ । ଭୁବନେଶରରେ ୩୧ଟି ପରୀକ୍ଷା କେନ୍ଦ୍ର ସହ ବସରେ ଯାତାୟତ ବ୍ୟବସ୍ଥା କରାଯାଇଛି । ଏଥିପାଇଁ ୪ଟି ଜୋନରେ ୪ ଜଣ ଓଏଏସ ଅଧିକାରୀଙ୍କୁ ମଧ୍ୟ ଦାୟିତ୍ୱ ଦିଆଯାଇଛି । 

ସେହିପରି ପରୀକ୍ଷା ଦେବାକୁ ଆସୁଥିବା ଛାତ୍ରଛାତ୍ରୀଙ୍କ ପାଇଁ ଆସନ୍ତାକାଲି ୪ଟି ସ୍ପେଶାଲ ଟ୍ରେନ ଚଳାଇବ ରେଲୱେ। ଏହି ଟ୍ରେନ୍‌ ଗୁଡ଼ିକ ଖରିଆର ରୋଡ୍‌ରୁ ସମ୍ବଲପୁର ଭାୟା ଟିଟିଲାଗଡ଼, ରାୟଗଡ଼ାରୁ ସମ୍ବଲପୁର, ଭଦ୍ରକରୁ ଭୁବନେଶ୍ୱର ଭାୟା କଟକ ଓ କେନ୍ଦୁଝରରୁ ଭୁବନେଶ୍ୱର ଭାୟା କଟକ ଦେଇ ସ୍ପେଶାଲ ଟ୍ରେନ ଗୁଡ଼ିକ ଚାଲିବ। ଏହା ଦ୍ୱାରା ଛାତ୍ରଛାତ୍ରୀଙ୍କ ଯିବା ଓ ଆସିବା ବହୁମାତ୍ରାରେ ସମାଧାନ ହେବ ବୋଲି ଆଶା କରାଯାଉଛି।

ପରୀକ୍ଷା ପାଇଁ ପୂର୍ବାହ୍ନ ୧୧ଟା ରୁ ପ୍ରବେଶ ଆରମ୍ଭ ହୋଇ ୧.୩୦ରେ ଗେଟ୍ ବନ୍ଦ ହେବ ଏବଂ ଅପରାହ୍ନ ୨ଟାରୁ ୫ଟା ପର୍ଯ୍ୟନ୍ତ ପରୀକ୍ଷା ହେବ । ସେପଟେ ଏହି ଦିନ ଭୁବନେଶ୍ହର ୟୁନିଟ ୧ ହାଟକୁ ବନ୍ଦ କରିବା ଲାଗି ନିଷ୍ପତ୍ତି ନେଇଛି ବିଏମସି । ୟୁନିଟ ୧ରେ ଏକ ପରୀକ୍ଷା କେନ୍ଦ୍ର ରହୁଥିବାରୁ ଗହଳିକୁ ଦୃଷ୍ଟିରେ ରଖି ଗୋଟିଏ ଦିନ ପାଇଁ ସମ୍ପୂର୍ଣ୍ଣ ଭାବେ ୟୁନିଟ ୧ ହାଟକୁ ବନ୍ଦ ରଖିବାକୁ ନିର୍ଦ୍ଦେଶ ଦେଇଛି ବିଏମସି ।