ଆଦିତ୍ୟଙ୍କ ସହ ବ୍ୟକ୍ତିଗତ ସମ୍ପର୍କ ନାହିଁ, ହେଲେ ମୃତ୍ୟୁ ଖବର ବ୍ୟଥିତ କରୁଛି: ମନ୍ତ୍ରୀ

ଭୁବନେଶ୍ୱର: ସମାଜସେବୀ ଆଦିତ୍ୟ ଦାଶଙ୍କ ରହସ୍ୟମୟ ମୃତ୍ୟୁକୁ ନେଇ ଏବେ ସୋସିଆଲ ମିଡିଆରେ ଅନେକ ପ୍ରଶ୍ନ ଉଠୁଛି । କାହିଁକି ଓ କେମିତି ଆଦିତ୍ୟଙ୍କ ମୃତ୍ୟୁ ହେଲା, ସେନେଇ ଏବେବି ପରଦା ହଟିନି । 'ମାନବପ୍ରେମୀ' ଯେ ଆତ୍ମହତ୍ୟା କରିଥିବେ, ଏକଥାକୁ କେହି ବିଶ୍ୱାସ କରିପାରୁନାହାଁନ୍ତି । ଆଉ ଏସବୁ ଭିତରେ ଏହାର ତଦନ୍ତ ନେଇ କଟକ ରେଳବାଇ ଆରକ୍ଷୀ ଅଧିକ୍ଷକ ଅଶୋକ ବିଶ୍ୱାଳଙ୍କ ସହ କଥା ହୋଇଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ । ବ୍ୟକ୍ତିଗତ ଭାବେ ତଦନ୍ତ ପ୍ରକ୍ରିୟାକୁ ତଦାରଖ କରିବା ପାଇଁ ସେ ରେଳବାଇ ଆରକ୍ଷୀ ଅଧିକ୍ଷକଙ୍କୁ ଅନୁରୋଧ କରିଛନ୍ତି । ନିଜ ପେସବୁକରେ ଏନେଇ ସୂଚନା ଦେଇଛନ୍ତି ମନ୍ତ୍ରୀ ସମୀର ଦାଶ । 

ସେ କହିଛନ୍ତି, ଆଦିତ୍ୟଙ୍କ ସହ ମୋର ବ୍ୟକ୍ତିଗତ ସମ୍ପର୍କ ନଥିଲା । କିନ୍ତୁ ତାଙ୍କ ମୃତ୍ୟୁ ଖବର ମୋତେ ବ୍ୟଥିତ ଓ ଦୁଃଖତ କରିଛି । ତାଙ୍କର ପରିବାର ବର୍ଗ ଓ ତାଙ୍କୁ ଭଲ ପାଉଥିବା ମଣିଷମାନଙ୍କୁ ପ୍ରଭୁ ଜଗନ୍ନାଥ ଧୋର୍ଯ୍ୟ ଦିଅନ୍ତୁ ବୋଲି ପ୍ରାର୍ଥନା କରିଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ । ସେହିପରି ତାଙ୍କ ସହଯୋଗୀମାନେ ଆଦିତ୍ୟର ଅଧୁରା କାର୍ଯ୍ୟକୁ ଜାରି ରଖନ୍ତୁ ବୋଲି ମନ୍ତ୍ରୀ କହିଛନ୍ତି । 

ସମୀର ଦାଶ ଆହୁରି ମଧ୍ୟ କହିଛନ୍ତି, ଆଦିତ୍ୟଙ୍କ ମୃତ୍ୟୁ ସମ୍ପର୍କରେ ପରିବାର ଲୋକ ଓ ଅନ୍ୟମାନେ ସନ୍ଦେହ ପ୍ରକଟ କରୁଛନ୍ତି । ସମସ୍ତଙ୍କ ମୁହଁରେ ସେହି ଗୋଟିଏ କଥା, ଆଦିତ୍ୟ ଆତ୍ମହତ୍ୟା କରିନପାରେ । ତେବେ ଏହାର ତଦନ୍ତ ରେଳବାଇ ପୋଲିସ ଜାରିରଖିଛି । ଓଡ଼ିଶାବାସୀଙ୍କୁ ଆଦିତ୍ୟଙ୍କ ମୃତ୍ୟୁ ନେଇ ସତ୍ୟାସତ୍ୟ ଅବଗତ କରିବା ଉପରେ ଗୁରୁତ୍ୱାରୋପ କରିଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ । ଏନେଇ କଟକ ରେଳବାଇ ଆରକ୍ଷୀ ଅଧିକ୍ଷକ ଅଶୋକ ବିଶ୍ୱାଳଙ୍କ ସହ ନିଜେ କଥା ହୋଇଥିବା ସୋସିଆଲ ମିଡ଼ିଆ ମାଧ୍ୟମରେ ଜଣାଇଛନ୍ତି । 

କହିରଖୁଛୁ, ଗତକାଲି ଲିଙ୍ଗରାଜ ଷ୍ଟେସନଠାରୁ କିଛି ଦୂର ରେଳଧାରଣାରୁ ଆଦିତ୍ୟ ଦାଶଙ୍କ ମୃତଦେହ ଉଦ୍ଧାର ହୋଇଥିଲା । ଗତ ମାସ ୯ ତାରିଖରେ ବିବାହ କରିଥିବା ଆଦିତ୍ୟଙ୍କ କେଉଁ କାରଣରୁ ମୃତ୍ୟୁ ହୋଇଛି, ତାହା ସ୍ପଷ୍ଟ ହୋଇପାରିନି । ତେବେ ଆଦିତ୍ୟ ଯେ ଆତ୍ମହତ୍ୟା କରିଥିବେ, ଏକଥା କେହି ବିଶ୍ୱାସ କରିପାରୁନାହାଁନ୍ତି ।