ମଦ ଉପରୁ ସ୍ୱତନ୍ତ୍ର କୋଭିଡ ଶୁଳ୍କ ହ୍ରାସ

ଭୁବନେଶ୍ୱର: ସମଗ୍ର ଦେଶ ସମେତ ଓଡ଼ିଶା କୋରୋନା ସଙ୍କଟ ମଧ୍ୟ ଦେଇ ଗତି କରୁଛି । ଏହି ସମୟରେ ଦେଶର ଆର୍ଥିକ ଗତିବିଧି ଉପରେ ସବୁଠାରୁ ଅଧିକ ଖରାପ ପ୍ରଭାବ ପଡ଼ିଛି । ଫଳରେ ବିଭିନ୍ନ ରାଜ୍ୟ ସରକାର ନିଜ ନିଜ ରାଜ୍ୟରେ ମଦ ଉପରେ ଅତିରିକ୍ତ କୋଭିଡ ଶୁଳ୍କ ଲାଗୁ କରିଥିଲେ । ଯାହା ଫଳରେ ରାଜ୍ୟ ସରକାରଙ୍କୁ ଅତିରିକ୍ତ ରାଜସ୍ୱ ଆଦାୟ ହେଉଥିଲା । ଅନ୍ୟପକ୍ଷେ ଦେଶରେ ଲକଡାଉନ୍ ପରେ ଏବେ ଅନଲକ୍ ପ୍ରକ୍ରିୟା ଚାଲିଛି । ଏହି ସମୟରେ ବିଭିନ୍ନ ଉଦ୍ୟୋଗରେ କାର୍ଯ୍ୟ ଆରମ୍ଭ ହେବାରେ ଲାଗିଛି । ଏହାସହ ସୀମିତ ସଂଖ୍ୟା ବଳରେ ବିଭିନ୍ନ  ଆର୍ଥିକ ଗତି ଆରମ୍ଭ ହୋଇଛି । ଏହି ସମୟରେ ବିଭିନ୍ନ ରାଜ୍ୟ ସରକାର ମଦ ଉପରେ ଲାଗିଥିବା ଅତିରିକ୍ତ କୋଭିଡ ଶୁକ୍ଳକୁ ହ୍ରାସ କରିବାରେ ଲାଗିଛନ୍ତି । ଏହି କ୍ରମରେ ଓଡ଼ିଶା ସରକାର ମଧ୍ୟ ମଦ ଉପରୁ ସ୍ୱତନ୍ତ୍ର କୋଭିଡ ଶୁଳ୍କ ହ୍ରାସ କରିଛନ୍ତି । 
  
ରାଜ୍ୟ ସରକାରଙ୍କ ଏହି ନିଷ୍ପତ୍ତି ପରେ ରାଜ୍ୟରେ ମଦ ଶସ୍ତା ହେବ । ଅନ୍ୟ ପଡୋଶୀ ରାଜ୍ୟର ଅତିରିକ୍ତ ଶୁଳ୍କକୁ ଦେଖି ରାଜ୍ୟ ସରକାର ଏହି ନିଷ୍ପତ୍ତି ନେଇଛନ୍ତି । ବର୍ତ୍ତମାନ ରାଜ୍ୟରେ ଅତିରିକ୍ତ ୫୦ ପ୍ରତିଶତ ନୁହେଁ, ବରଂ  ୧୫ ପ୍ରତିଶତ ଶୁଳ୍କରେ ମିଳିବ ମଦ । ମଦ ଉପରେ ଅତିରିକ୍ତ କୋଭିଡ ଶୁଳ୍କରୁ ରାଜ୍ୟକୁ ମିଳିଛି ୨୦୦ କୋଟି ଟଙ୍କା ।