ପଶୁ ସେବାରେ ସମର୍ପିତ ତାରାକାନ୍ତ

ଯଯାତି ମହାନ୍ତି, ଭୁବନେଶ୍ୱର: ଲକଡାଉନ୍ ବେଳେ ସାଧାରଣ ରୋଗୀଟିଏ ମେଡ଼ିକାଲ ଯିବାକୁ ଡରୁଛି । ଯେତେବେଳେ ମଣିଷ କୋରୋନାକୁ ଡରି ଘରୁ ବାହାରୁନାହିଁ, ସେତେବେଳେ ଗାଈଗୋରୁଙ୍କ ରୋଗ କଥା କିଏ ବା ପଚାରେ ? ରାଜଧାନୀରେ ବୁଲା ଗାଈଗୋରୁଙ୍କୁ ଖାଦ୍ୟ ଦେବାକୁ ଯଦିଓ ବିଏମ୍‌ସି ପକ୍ଷରୁ ବ୍ୟବସ୍ଥା ହୋଇଛି, ହେଲେ ତାହା ପର୍ଯ୍ୟାପ୍ତ ନୁହେଁ । ତା ସାଙ୍ଗକୁ ଗାଈ, ଷଣ୍ଡଙ୍କ ରୋଗ କଥା କିଏ ବୁଝିବ ? ହେଲେ ଏମିତି ବି ଲୋକ ଅଛନ୍ତି, ଯେଉଁମାନେ କେବଳ ଗାଈଗୋରୁଙ୍କ ଖାଦ୍ୟ କଥା ନୁହେଁ, ବରଂ ମାଙ୍କଡ଼, କୁକୁରଙ୍କୁ ଖାଦ୍ୟ ଦେବା ସଙ୍ଗେ ସଙ୍ଗେ ସେମାନଙ୍କ ରୋଗର ଚିକିତ୍ସା ବି କରୁଛନ୍ତି । ଭୁବନେଶ୍ୱର ଚନ୍ଦ୍ରଶେଖରପୁର ହାଉସିଙ୍ଗ ବୋର୍ଡ଼ କଲୋନୀର କିଛି ଯୁବକ ନିସ୍ୱାର୍ଥପର ଭାବେ ପଶୁଙ୍କ ସେବା କରୁଛନ୍ତି । କାହାକୁ କେତେବେଳେ କେଉଁ ଖାଦ୍ୟ ଦିଆଯିବ? କାହାର କେଉଁ ଚିକିତ୍ସା କରାଯିବ? କାହାର କେତେବେଳେ ଡ଼୍ରେସିଙ୍ଗ କରାଯିବ? ନିଜ ଓ ନିଜ ପରିବାର କଥା ବୁଝିବା ଭଳି ଏହି ଯୁବକମାନେ ଗାଈଗୋରୁଙ୍କ ସେବା ବି କରି ଚାଲିଛନ୍ତି । .

ଚନ୍ଦ୍ରଶେଖରପୁରର ହାଉସିଙ୍ଗ ବୋର୍ଡ଼ କଲୋନୀର ୱାର୍ଡ଼ ନମ୍ବର ୮ । ରାଜଧାନୀର ସବୁଠାରୁ ବଡ଼ ରେସିଡ଼େନ୍ସିଆଲ୍ ଏରିଆ । ଏ ଅଞ୍ଚଳରେ ଅନେକ ବୁଲା ଗାଈଗୋରୁ ସାଙ୍ଗକୁ କୁକୁର, ମାଙ୍କଡ଼ଙ୍କ ସଂଖ୍ୟା ବି କିଛି କମ୍ ନୁହେଁ । କୋରୋନା ଲକ୍ ଡ଼ାଉନ୍ ସମୟରେ ଏମାନଙ୍କ କଥା ବୁଝିବାକୁ ଅଣ୍ଟା ଭିଡ଼ିଛନ୍ତି ଏ ଅଞ୍ଚଳର ଯୁବକମାନେ । ଏମାନଙ୍କ ମଧ୍ୟରୁ ତାରାକାନ୍ତ ବେହେରାଙ୍କୁ ଗାଈଗୋରୁଙ୍କ ଫାଟୁଆ ରୋଗ ଚିକିତ୍ସା ବିଷୟରେ ମାଲୁମ୍ ଅଛି । ପେଷାରେ ଶିକ୍ଷକ, ହେଲେ ନିଶା ତାଙ୍କର ଗୋ ସେବା । ଦୀର୍ଘ ୧୭ ବର୍ଷ ହେଲା ଗୋସେବା କରି ଆସୁଛନ୍ତି । ଏମାନଙ୍କୁ ମିଳିଛି ହାଉସିଙ୍ଗ ବୋର୍ଡ଼ର ଉତ୍ସାହୀ ଯୁବକଙ୍କ ସହଯୋଗ । କାରଣ ଜଣେ ଲୋକ ଚାହିଁଲେ ଫାଟୁଆ ରୋଗର ଚିକିତ୍ସା କରିବା କଷ୍ଟକର । ହେଲେ ସମର୍ପିତ ଯୁବକଙ୍କ ସହଯୋଗରେ ଲକ୍ ଡ଼ାଉନ୍ ସମୟରେ ପ୍ରାୟ ୩୦ ଷଣ୍ଢ, ଗାଈଙ୍କର ଫାଟୁଆ ରୋଗ ଭଲ କଲେଣି । ଗାଈଗୋରୁଙ୍କ କ୍ଷତାକ୍ତ ସ୍ଥାନକୁ ସଫା କରିବା, ଔଷଧ ଲଗାଇବା, ଡ଼୍ରେସିଂ କରିବା ସାଙ୍ଗକୁ ପ୍ରତିଦିନ ଏହାର ଯତ୍ନ ନେବା ଭଳି ମହତ କାର୍ଯ୍ୟ କରୁଛନ୍ତି ଏମାନେ । ସମାଜକୁ ଏକ ବାର୍ତା ମଧ୍ୟ ଦେଇଛନ୍ତି-କଥା କହିପାରୁନଥିବା ଜୀବଙ୍କ ସେବା କରିବାରେ ଆନନ୍ଦ ମିଳେ । ଏମାନେ ବି ପ୍ରକୃତିର ସୃଷ୍ଟି । ପ୍ରକୃତିକୁ ଆମେ କ୍ଷତ ବିକ୍ଷତ କରିଥିବାରୁ ଆମକୁ କୋରୋନା ଭଳି ରୋଗର ସାମ୍ନା କରିବାକୁ ପଡ଼ୁଛି ବୋଲି ଏମାନଙ୍କ ଚିନ୍ତାଧାରା ।

କେବଳ ତାରାକାନ୍ତ ନୁହନ୍ତି, ହାଉସିଙ୍ଗ ବୋର୍ଡ଼ର ଅନ୍ୟ ଯୁବକମାନେ ଗାଈଗୋରୁଙ୍କ ସେବା କରିବାରେ ନିଜକୁ ନିୟୋଜିତ କରିଛନ୍ତି । ଚାରିଆଡ଼ୁ ଅର୍ଥ ଓ ଖାଦ୍ୟ ସାମଗ୍ରୀ ଯୋଗାଡ଼ କରି ଗାଈଗୋରୁଙ୍କ ପାଇଁ ରୋଷେଇ ଚାଲିଛି । ଅପରାହ୍ନରେ ଚାଲିଛି ଖାଦ୍ୟ ବିତରଣ କାମ । ଶୈଳଶ୍ରୀ ବିହାର, ନିଳାଦ୍ରୀବିହାର, ଇନ୍‌ଡ଼ୋସିଟି, ଡ଼ମଣା, ପଟିଆ, ଶିଖରଚଣ୍ଡୀ ଅଞ୍ଚଳରେ କୁକୁର, ମାଙ୍କଡ଼ଙ୍କ ସହିତ ବୁଲା ଗାଈ, ଷଣ୍ଡମାନଙ୍କୁ ମୁଲି ବୁଲି ଖାଦ୍ୟ ଯୋଗାଇବା ସହ ଚିକିତ୍ସା ବି ଜାରି ରଖିଛନ୍ତି । ପୂର୍ବତନ କର୍ପୋରେଟର ମନୋଜ ସାହୁ ମଧ୍ୟ ଏମାନଙ୍କୁ ସହାୟତାର ହାତ ବଢାଇଛନ୍ତି । ଏହା ସହ ବିଭିନ୍ନ ବସ୍ତିରେ ରହୁଥିବା ଗରିବ ଲୋକମାନଙ୍କୁ ଶୁଖିଲା ଖାଦ୍ୟ ବି ବିତରଣ କରାଯାଉଛି ।

ମାନବସେବାକୁ ଅନେକ ବ୍ୟକ୍ତି ବିଶେଷ ଓ ସ୍ୱେଚ୍ଛାସେବୀ ଅନୁଷ୍ଠାନ ପ୍ରାଥମିକତା ଦେଉଥିବା ବେଳେ ଗୋସେବା ପାଇଁ ଯୁବଗୋଷ୍ଠୀ ଆଗଭର ହେବା, ସମର୍ପିତ ମନୋଭାବ ନେଇ ସେବା କରିବା, ନିଶ୍ଚିତ ଭାବରେ ସମାଜ ପାଇଁ ଏକ ଭଲ ଖବର । ପୁଣି ଲକ୍‌ଡ଼ାଉନ୍ ଭଳି କଟକଣା ସମୟରେ ଏମାନେ ଦୀର୍ଘ ଦିନ ଧରି ଏହାକୁ ଜାରି ରଖିବା ମଧ୍ୟ ଆନନ୍ଦର କଥା ।