ବଢୁଛି ତାପମାତ୍ରା; ଆଗକୁ କାଳବୈଶାଖି ସମ୍ଭାବନା

ଭୁବନେଶ୍ବର: ପୁଣି ଫେରଛି ତାତି ଆଉ ଉପରମୁହାଁ ହୋଇଛି ପାରଦ। ରାଜ୍ୟରେ ଅସହ୍ୟ ହେଲାଣି ମୁଣ୍ଡଫଟା ଖରା। ଗତକାଲି ୧୦ ଟି ସ୍ଥାନରେ ତାପମାତ୍ରା ୩୮ ଡିଗ୍ରୀ ଉପରେ ରହିଥିବା ବେଳେ ବାରିପଦା, ଭୁବନେଶ୍ୱର ଏବଂ ମାଲକାନଗିରି ଠାରେ ଦିନର ସର୍ବୋଚ୍ଚ ତାପମାତ୍ରା ୪୦ ଡିଗ୍ରୀ ରେକର୍ଡ ହୋଇଥିଲା।

ଆସନ୍ତା ୩ ଦିନ ପର୍ଯ୍ୟନ୍ତ ରାଜ୍ୟରେ ପାଗ ଶୁଖିଲା ରହିବା ସହ ୨-୩ ଦିନ ମଧ୍ୟରେ ଆଭ୍ୟନ୍ତରୀଣ ଓଡିଶାରେ ଦିନର ସର୍ବୋଚ୍ଚ ତାପମାତ୍ରା ୨-୩ ଡିଗ୍ରୀ ବୃଦ୍ଧି ପାଇବ। ଏହାସହ ସମସ୍ତ ଜିଲ୍ଲାରେ ସର୍ବୋଚ୍ଚ ତାପମାତ୍ରା ସ୍ବାଭାବିକ ଠାରୁ ୩-୪ ଡିଗ୍ରୀ ଉପରେ ରହିବା ନେଇ ଆକଳନ କରିଛି ପାଣିପାଗ ବିଜ୍ଞାନ କେନ୍ଦ୍ର। ଆସନ୍ତା ୨୯ ତାରିଖ ଠାରୁ ଉତ୍ତର ଓଡ଼ିଶାରେ ପାଗ ବଦଳିବା ସହ ୨ ଦିନ ଧରି ଅଧିକାଂଶ ସ୍ଥାନରେ କାଳବୈଶାଖୀ (Thunderstorm) ବର୍ଷା କିମ୍ବା ବଜ୍ରପାତ (Lightning) ସମ୍ଭାବନା ରହିଛି। 

Also Read: ଉର୍ଦ୍ଧ୍ୱ ମୁହାଁ ହେଲା ପାରଦ; ଆଗକୁ ବର୍ଷା ସମ୍ଭାବନା

ମୟୂରଭଞ୍ଜ, ବାଲେଶ୍ଵର, ଭଦ୍ରକ, ଯାଜପୁର, କେନ୍ଦ୍ରାପଡା ଜିଲ୍ଲାରେ କାଳବୈଶାଖୀ ଯୋଗୁ ୟେଲୋ ୱାର୍ଣ୍ଣିଂ (Yellow Warning) ଜାରି କରାଯାଇଛି। ଏହାର ପ୍ରଭାବରେ ୩୦-୪୦ କିମି ବେଗରେ ପବନ ବହିବା ନେଇ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି। ଏହାକୁ ଦୃଷ୍ଟିରେ ରଖି ସମ୍ପୃକ୍ତ ଜିଲ୍ଲାକୁ ସତର୍କ ରହିବାକୁ ପରାମର୍ଶ ଦିଆଯାଇଛି।