ଚାଲିଥିଲା ଗାଡି ଚେକିଂ, ମାଡିଗଲା ଟ୍ରକ

ଜସ୍ମିନ ମହନ୍ତ, ଭୁବନେଶ୍ୱର: କେନ୍ଦୁଝର ଟାଉନ ଥାନା ପୋକାରାପାଣିରେ ସଡ଼କ ଦୁର୍ଘଟଣା । ଏନଏଚ - ୨୦ ବାଇପାସ ରାସ୍ତାରେ MVIଯାଞ୍ଚ ବେଳେ  RTO କର୍ମଚାରୀଙ୍କ ଉପରେ ଚଢିଗଲା ୧୪ ଚକିଆ ଟ୍ରକ । ଫଳର ଘଟଣାସ୍ଥଳରେ ହିଁ  RTO ଅଫିସର ଡ୍ରାଇଭର ବିଜୟ କୁମାର ମହାନ୍ତଙ୍କ  ମୃତ୍ୟୁ ହୋଇଛି । ସେପଟେ ଘଟଣା ଘଟାଇଥିବା ଟ୍ରକଟି ଫେରାର ହୋଇଯାଇଛି । 

ସୂଚନା ମୁତାବକ, ଆଜି ବାଇପାସରେ ଏମଭିଆଇଙ୍କ ସମେତ ଆରଟିଓ କର୍ମଚାରୀ ଗାଡ଼ି ଚେକିଂ କରୁଥିଲେ । ଏହି ସମୟରେ ଦୃତ ଗତିରେ ଆସୁଥିବା ଏକ ୧୪ ଚକିଆ ଟ୍ରକକୁ ଆରଟିଓ ଗାଡ଼ି ଡ୍ରାଇଭର ଅଟକାଇବା ପାଇଁ ଚେଷ୍ଟା କରିଥିଲେ । ହେଲେ ଟ୍ରକଟି ନରହି ଆରଟିଓ ଡ୍ରାଇଭର ବିଜୟ କୁମାରଙ୍କୁ ଧକ୍କା ଦେଇ ଚାଲିଯାଇଥିଲା । ଫଳରେ ଘଟଣାସ୍ଥଳରେ ବିଜୟଙ୍କ ମୃତ୍ୟୁ ଘଟିଥିଲା । ଦୁର୍ଘଟଣା ସମ୍ପର୍କରେ ପୋଲିସକୁ ଖବର ନଦେଇ RTO କର୍ମଚାରୀ ମୃତ ଡ୍ରାଇଭରକୁ ଆଣି ଡାକ୍ତରଖାନାରେ ଭର୍ତ୍ତି କରିଥିଲେ । 

ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଛାନଭିନ ଆରମ୍ଭ କରିଛି । ଦୁର୍ଘଟଣା ଘଟଣା ଥିବା  ଟ୍ରକକୁ ଧରିବା ପାଇଁ ଉଦ୍ୟମ ଜାରି ରଖିଛି  । ତେବେ ଘଟଣାକୁ ଆରଟିଓ ଅଧିକାରୀ ଲୁଚେଇବାକୁ ଉଦ୍ୟମ କରୁଥିବା ସ୍ପଷ୍ଟ ହେଉଛି ।  ଆରଟିଓ କର୍ମଚାରୀଙ୍କ କହିବା ମୁତାବକ, ସେମାନେ କୌଣସି କାର୍ଯ୍ୟରେ ଆନନ୍ଦପୁର ଯାଉଥିବା ସମୟରେ ଡ୍ରାଇଭର ଗାଡ଼ି ରଖି ରାସ୍ତାର ଅପରପାର୍ଶ୍ୱକୁ ଯାଇଥିଲେ ।  ରାସ୍ତା ପାର ହେଉଥିବା ବେଳେ ଦୁର୍ଘଟଣା ଘଟିଛି । 

ସେପଟେ ଗାଡ଼ି ଚେକିଂ ସମୟରେ ଏପରି ଘଟଣା ଘଟିଥିବା କହିଛନ୍ତି ସ୍ଥାନୀୟ ଲୋକେ । ତେବେ ଆରଟିଓ କର୍ମଚାରୀ କାହିଁକି ଏହାକୁ ଲୁଚେଇବାକୁ ଚେଷ୍ଟା କରୁଛନ୍ତି ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।