 "ପ୍ରବାସୀ ଓଡ଼ିଆଙ୍କ ପାଇଁ କେଉଁ ମାର୍ଗଦର୍ଶିକା ଜାରି ହୋଇଛି ? ଆସନ୍ତୁ ଜାଣିବା")
ଯଯାତି ମହାନ୍ତି, ଭୁବନେଶ୍ୱର: ରାଜ୍ୟକୁ ଫେରୁଛନ୍ତି ହଜାର ହଜାର ପ୍ରବାସୀ ଓଡ଼ିଆ । ବାହାରେ ଫସିଥିବା ଓଡ଼ିଆଙ୍କ ଘର ବାହୁଡ଼ା ବ୍ୟାକୁଳତାକୁ ଦେଖି ସରକାର ଏମାନଙ୍କ ଫେରିବା ବାଟ କଲେ । ହେଲେ କିଛି ପ୍ରବାସୀ ସଙ୍ଗରୋଧ ନିୟମ ଭାଙ୍ଗି ସରକାରଙ୍କୁ ଅଡ଼ୁଆରେ ପକାଇବା ସହ ନିଜ ଅଞ୍ଚଳ ପାଇଁ ବିପଦର କାରଣ ହୋଇପାରନ୍ତି । ଏହାକୁ ନଜରରେ ରଖି ସଙ୍ଗରୋଧ ନିୟମ ଭଙ୍ଗ କଲେ କଡ଼ା କାର୍ଯ୍ୟନୁଷ୍ଠାନ ହେବ ବୋଲି ସରକାର କହିଛନ୍ତି । ତେବେ କେଉଁ ନିୟମକୁ ଭାଙ୍ଗିଲେ ମିଳିବ ଦଣ୍ଡ? ସଙ୍ଗରୋଧ ପାଇଁ କ’ଣ ରହିଛି ଗାଇଡ଼୍ଲାଇନ୍? ସ୍ୱାସ୍ଥ୍ୟ କର୍ମୀଙ୍କ ପାଇଁ କେଉଁ ନିୟମ କରିଛନ୍ତି ସରକାର ? ପ୍ରବାସୀ ଓଡ଼ିଆଙ୍କ ପାଇଁ କେଉଁ ମାର୍ଗଦର୍ଶିକା ଜାରି ହୋଇଛି? କାହାର କେଉଁ ଲକ୍ଷଣ ଥିଲେ କେଉଁଠି ରହିବେ ? ଆସନ୍ତୁ ନଜର ପକାଇବା ସରକାରଙ୍କ ନୂଆ ମାର୍ଗଦର୍ଶିକା ଉପରେ...
ବାହାର ରାଜ୍ୟରୁ ଓଡ଼ିଶାକୁ ଫେରୁଛନ୍ତି ଲକ୍ଷ ଲକ୍ଷ ପ୍ରବାସୀ ଓଡ଼ିଆ । ସେମାନଙ୍କ ମଧ୍ୟରେ ଅନେକ ଅତି ସଂକ୍ରମଣ ଅଞ୍ଚଳ ଯଥା ମହାରାଷ୍ଟ୍ର, ଗୁଜୁରାଟ, ଦିଲ୍ଲୀ, କୋଲକାତା ଭଳି ରାଜ୍ୟରୁ ଆସୁଛନ୍ତି । ସେମାନଙ୍କ ସଂକ୍ରମଣ ସ୍ଥିତି ଜଣାନଥିବାରୁ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ‘ଗୃହ ସଙ୍ଗରୋଧ’ ଓ ‘ଗୃହ ପୃଥକ ବାସ’ ସମ୍ବନ୍ଧିତ ମାର୍ଗଦର୍ଶିକା ଜାରି କରାଯାଇଛି । ଅନ୍ଲାଇନ୍ ପଞ୍ଜୀକରଣ ଓ ୧୪ ଦିନ ସଙ୍ଗରୋଧକୁ ବାଧ୍ୟତାମୂଳକ କରାଯାଇଛି । ସହରାଞ୍ଚଳରେ ଗୃହ ସଙ୍ଗରୋଧ ବା କିଛି ନିର୍ଦ୍ଧାରିତ ହୋଟେଲ ବା ଲଜ୍ରେ ନିଜ ଖର୍ଚ୍ଚରେ ରହିବାକୁ ପରାମର୍ଶ ଦିଆଯାଇଥିବା ବେଳେ ଗ୍ରାମାଞ୍ଚଳରେ ଆନୁଷ୍ଠାନିକ ସଙ୍ଗରୋଧ କେନ୍ଦ୍ରରେ ରଖିବା ପାଇଁ ସ୍ଥିର ହୋଇଛି । ଗୃହ ସଙ୍ଗରୋଧ ସମୟରେ ବ୍ୟକ୍ତିଙ୍କ ଘରେ ସଙ୍ଗରୋଧର ଷ୍ଟିକର ଲଗାଯିବ । ସଙ୍ଗରୋଧ ନିୟମ ସମ୍ପୃକ୍ତ ବ୍ୟକ୍ତି ଠିକ୍ ଭାବେ ପାଳନ କରୁଛନ୍ତି କି ନାହିଁ, ଏହାର ପ୍ରତିଦିନ ତଦାରଖ କରାଯିବ । ନିମୟ ଭଙ୍ଗକାରୀଙ୍କୁ ବିପର୍ଯ୍ୟୟ ପ୍ରଶମନ ଆଇନ ୨୦୦୫ ଏବଂ ସଂକ୍ରାମକ ରୋଗ ପ୍ରତିରୋଧ ଆଇନ ୧୮୯୭ ଆଧାରରେ ଦଣ୍ଡିତ କରାଯିବ ।
ଗୃହ ସଙ୍ଗରୋଧ ପାଇଁ ମୁକ୍ତ ବାୟୁ ଚଳାଚଳ ଅଲଗା କୋଠରୀ ସାଙ୍ଗକୁ ଅଲଗା ପାଇଖାନା ବ୍ୟବହାର କରିବାକୁ ପରାମର୍ଶ ଦିଆଯାଇଛି । ବୃଦ୍ଧ, ଶିଶୁ, ଗର୍ଭବତୀ ଏବଂ ଡ଼ାଇବେଟିସ୍, ଉଚ୍ଚରକ୍ତଚାପ, ହୃଦରୋଗୀ ପରିବାର ସଦସ୍ୟଙ୍କ ଠାରୁ ଦୂରେଇ ରହିବେ । ତାଙ୍କ ଦ୍ୱାରା ବ୍ୟବହୃତ ବିଛଣା, ଲୁଗାପଟା, ବାସନକୁଶନ ଅନ୍ୟ କେହି ବ୍ୟବହାର କରିବେ ନାହିଁ । ସର୍ବଦା ମାସ୍କର ବ୍ୟବହାର ସାଙ୍ଗକୁ ବାରମ୍ବାର ସାବୁନ୍ରେ ହାତ ଧୋଇବେ । ପରିବାରର ଜଣେ ସୁସ୍ଥ ସଦସ୍ୟଙ୍କୁ ସଙ୍ଗରୋଧରେ ଥିବା ସଦସ୍ୟାଙ୍କ ଖାଇବାପିଇବା, ଲୁଗାପଟା ସଫା କାମରେ ନିୟୋଜିତ ରହିବେ । ସଙ୍ଗରୋଧ କୋଠରୀ ଏବଂ ସେ ଛୁଇଁଥିବା ପ୍ରତ୍ୟେକ ବସ୍ତୁକୁ ନିୟମିତ ବିଶୋଧନ କରାଯିବ । ନିୟମ ବ୍ୟତୀତ ସ୍ୱାସ୍ଥ୍ୟ ପରୀକ୍ଷା ଓ ନମୁନା ସଂଗ୍ରହ ବାବଦରେ ମଧ୍ୟ ଗାଇଡ଼୍ଲାଇନ୍ ଜାରି ହୋଇଛି । ଅସ୍ଥାୟୀ ସ୍ୱାସ୍ଥ୍ୟ ଶିବିରରେ ସ୍ୱାସ୍ଥ୍ୟ କର୍ମୀମାନଙ୍କ ଦଳ ପରୀକ୍ଷା କରିବା ପାଇଁ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଏକ ଅଣୁ ଯୋଜନା ପ୍ରସ୍ତୁତ କରିବେ । ଟିମ୍ରେ ଆଶାକର୍ମୀଙ୍କ ସହ ସ୍ୱାସ୍ଥ୍ୟକର୍ମୀ ରହିବେ । ଯେଉଁଲୋକମାନେ ଜ୍ୱର,କାଶ ସହିତ ଶ୍ୱାସ,ପ୍ରଶ୍ୱାସରେ କଷ୍ଟ ଅନୁଭବ କରୁଥିବେ, ଯିଏ ଚିହ୍ନଟ ରୋଗୀଙ୍କ ସଂସ୍ପର୍ଶରେ ଆସିଥିବେ, ଯିଏ ଗତ ୧୪ ଦିନ ମଧ୍ୟରେ ସଂକ୍ରମଣ ଅଂଚଳକୁ ଯାଇଥିବେ, ଯେଉଁଠି ଗର୍ଭବତୀ ୫ଦିନ ମଧ୍ୟରେ ପ୍ରସବ କରିବାର ଥିବ, ୬୦ବର୍ଷରୁ ଅଧିକ ରୋଗାକ୍ରାନ୍ତ ବ୍ୟକ୍ତିକୁ ଅଲଗା କରି ପୃଥକୀକରଣ କରିବା ସଙ୍ଗେ ସଙ୍ଗେ ସ୍ୱାବ ନମୁନା ସଂଗ୍ରହ କରାଯିବ । ସାମାନ୍ୟ ଲକ୍ଷଣ ଥିଲେ କୋଭିଡ଼ କେୟାର ସେଣ୍ଟର, ଅତି ବେଶୀ ଲକ୍ଷଣ ନଥିଲେ ନିର୍ଦ୍ଧାରିତ କୋଭିଡ଼ ହେଲଥ୍ ସେଣ୍ଟର ଏବଂ ଅତି ବେଶୀ ଲକ୍ଷଣ ଥିଲେ ନିର୍ଦ୍ଧାରିତ କୋଭିଡ଼୍ ହସ୍ପିଟାଲକୁ ପଠାଯିବ । ସ୍ୱାସ୍ଥ୍ୟ ପରୀକ୍ଷାକାରୀ ଟିମ୍ ପାଖରେ ବିଷ୍ଳେଶଣ ପତ୍ର, ମାସ୍କ, ଗ୍ଲୋବସ୍, ସାନିଟାଇଜର୍, ଡ଼ିଜିଟାଲ୍ ଥର୍ମୋମିଟର ରଖିବେ । ବ୍ଲକ ଜନ ସ୍ୱାସ୍ଥ୍ୟ ଅଧିକାରୀ ଏହି ସମସ୍ତ ପ୍ରକ୍ରିୟାକୁ, ଜିଲ୍ଲା ସର୍ବେକ୍ଷଣ ସଂସ୍ଥା ତତ୍ୱାବଧାନରେ ତଦାରଖ କରିବେ । ସେହିପରି ମୋବାଇଲ୍ ବା ଭ୍ରାମ୍ୟମାଣ ନମୁନା ସଂଗ୍ରହକାରୀ ଟିମ୍ ପାଇଁ ମଧ୍ୟ ନିୟମାବଳୀ ଜାରି ହୋଇଛି । ପ୍ରତ୍ୟେକ ଚିହ୍ନଟ ରୋଗୀଙ୍କ ପଞ୍ଜୀକରଣ ବାଧ୍ୟତାମୂଳକ ହେବା ସାଙ୍ଗକୁ ରୋଗୀଙ୍କ ସମସ୍ତ ବ୍ୟକ୍ତିଗତ ତଥ୍ୟ ରହିବ । ପ୍ରତ୍ୟେକ ଟିମ୍ରେ ଦୁଇ ଜଣ ତାଲିମ ପ୍ରାପ୍ତ ଏଲ୍.ଟି, ଡ଼ାଟା ଏଂଟ୍ରି ଅପରେଟର, ସହାୟକ, ସଫେଇ କର୍ମଚାରୀ ରହିବେ । ତାଲିମ ପ୍ରାପ୍ତ କର୍ମଚାରୀ ବ୍ୟକ୍ତିଗତ ସୁରକ୍ଷା ଉପକରଣ ବ୍ୟବହାର କରି ନମୁନା ସଂଗ୍ରହ କରିବେ ଏବଂ ନମୁନା ସଂଗ୍ରହ ପରେ ହାତରୁ ଗ୍ଲୋବସ୍ ବାହାର କରିବା ସାଙ୍ଗକୁ ସାନିଟାଇଜର୍ରେ ବିଶୋଧନ କରିବେ । ପରବର୍ତ୍ତୀ ନମୁନା ସଂଗ୍ରହ କରିବା ପୂର୍ବରୁ ନୂଆ ଗ୍ଲୋବସ୍ ପିନ୍ଧିବେ । ସଙ୍ଗରୋଧ କେନ୍ଦ୍ରରେ ବିଶୃଙ୍ଖଳା କରିବା ଠିକ୍ ନୁହେଁ ବୋଲି କହିଛନ୍ତି ବିରୋଧି କଂଗ୍ରେସ ବିଧାୟକ ସୁର ରାଉତରାୟ ।
ସରକାରଙ୍କ ନୂଆ ଗାଇନ୍ଲାଇନ୍ ଜାରି ହେବା ସହ ସଙ୍ଗରୋଧ ନିୟମ ଉଲ୍ଲଙ୍ଘନକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ସରକାର ପ୍ରସ୍ତୁତ ହୋଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ କାର୍ଯ୍ୟାନୁଷ୍ଠାନ ବାବଦରେ ଟ୍ୱିଟ କରି ଜଣାଇଛନ୍ତି ।
)