କମିଶନରେଟ ପୋଲିସର ଅଭିଜ୍ଞତା କହିଲେ ଆଇପିଏସ ଅନୁପ ସାହୁ

ସରୋଜ ବେହେରା, ଭୁବନେଶ୍ୱର: କମିଶନରେଟ ପୋଲିସ ଅଧୀନରେ ୨ ବର୍ଷ ୪ ମାସ ରହିବା ପରେ ପଦୋନ୍ନତି ପାଇ ଗୁଇନ୍ଦା ଡିଆଇଜି ହୋଇଛନ୍ତି ଆଇପିଏସ ଅନୁପ ସାହୁ । ନୂଆ ପଦରେ ଯୋଗ ଦେବା ପୂର୍ବରୁ ଜୀ ଓଡିଶା ସହ ନିଜର କିଛି ଅନୁଭୂତି ବାଣ୍ଟିଛନ୍ତି ଅନୁପ ।

ରିପୋର୍ଟର:-ଭୁବନେଶ୍ୱରରେ କାମ କରିବା ଅନୁଭୂତି କିଭଳି ରହିଥିଲା ? 

ଅନୁପ ସାହୁ: ଭଦ୍ରକରୁ ବଦଳି ହେବା ପରେ ଡିସିପି ଭାବେ ଯୋଗ ଦେଇଥିଲି । ଭୁବନେଶ୍ୱରରେ କାମ କରିବା ଅନ୍ୟ ଜିଲ୍ଲା ତୁଳନାରେ ସବୁବେଳେ ଭିନ୍ନ । ଏଠାରେ ରାଜନୈତିକ ରାଲି, ଆଇନ ଶୃଙ୍ଖଳା, ଭିଆଇପି ସୁରକ୍ଷା, ଅପରାଧ, ଟ୍ରାଫିକ ଭଳି ସହରାଂଚଳର ବିଷୟ ସବୁ ବେଳେ ପୋଲିସ ପାଇଁ ଚ୍ୟାଲେଞ୍ଜ ସୃଷ୍ଟି କରିଥାଏ । ଏ ମଧ୍ୟରେ କମିଶନରେଟ ପୋଲିସରେ କାମ କରିବା ସୌଭାଗ୍ୟର କଥା । ମୋ ସମୟରେ ବହୁତ ଭଲ କାମ ହୋଇଛି । ଯିବା ପୂର୍ବରୁ ଅନେକ ସୁଖଦ ଅନୁଭବ ନେଇକି ଯାଉଛି । କିଛି କାମ ରହିଯାଇଛି ପରବର୍ତ୍ତୀ ଡିସିପି ତାହାକୁ ପୂରଣ କରିବେ ବୋଲି ଆଶା କରୁଛି । 

ରିପୋର୍ଟର: କମିଶନରେଟ ପୋଲିସରେ କାମ କରିବା କେତେ ଚ୍ୟାଲେଞ୍ଜିଂ ରହିଥିଲା ?

ଅନୁପ ସାହୁ: କୁଆଖାଇରେ ମିଳିଥିବା ଅର୍ଦ୍ଧଦଗ୍ଧ ମୃତଦେହ ମିଳିଥିଲା । ଏହି ମାମଲା ଦେଖାଇଥିଲା ଯେ, ଅର୍ବନ ପୋଲିସର କି କି ଚ୍ୟାଲେଞ୍ଜ ରହିଛି । ରାଜଧାନୀରେ କୌଣସି ଘଟଣା ଘଟିଲେ ତାହା ଉପରେ ମିଡିଆର ଚାପ ଓ ଲୋକଙ୍କ ଆଶା ଅଧିକ ରହିଥାଏ । ଏଭଳି ପରିସ୍ଥିତିରେ ପୋଲିସ ଉପରେ ଚାାପ ମଧ୍ୟ ବଢିଯାଇଥାଏ । ଅଧିକାଂଶ ମାମଲାର ସମାଧାନ କରିଥିବାରୁ ମୁଁ ଖୁସି । 

ରିପୋର୍ଟର: ପୋଲିସ ତଦନ୍ତରେ ମିଡିଆ ଟ୍ରାଏଲ କେତେ ଚାପ ଦେଇଥାଏ ?

ଅନୁପ ସାହୁ: ମିଡିଆ ଟ୍ରାଏଲ ଏବେ କେବଳ ଭୁବନେଶ୍ବର ନୁହଁ, ଜାତୀୟ ସ୍ତରରେ ପୋଲିସ ପାଇଁ ଚାପ ସୃଷ୍ଟି କରିଛି । ତଦନ୍ତକାରୀ ଅଧିକାରୀ ମିଡିଆ ଟ୍ରାଏଲ ଚାପରେ ନ ପଡି ନିଜ ଦକ୍ଷତାରୁ ତଥ୍ୟ, ପ୍ରମାଣ, ସତ୍ୟତା ବାହାର କରିବା ଜରୁରୀ ।

ରିପୋର୍ଟର: କମିଶନରେଟ ପୋଲିସରେ ଭଲ ଟିମ୍ କେତେ ଜରୁରୀ ? 

ଅନୁପ ସାହୁ: କୌଣସି ମାମଲାର ସମାଧାନ ଓ କେତେ ସମୟ ମଧ୍ୟରେ ଏହା କରାହୋଇଛି ପୋଲିସ ପାଇଁ ଚାପ ଦେଇଥାଏ । ଭଲ ଟିମ୍ ଥିଲେ ଏହି ଦୁଇଟି କଥାକୁ ନଜରରେ ରଖି ମାମଲାର ସମାଧାନ ହେବା ଆବଶ୍ୟକ । କମିଶନରେଟ ପୋଲିସରେ ଦକ୍ଷ ଅଧିକାରୀ ରହିଛନ୍ତି । ସବୁ ବେଳେ ସେମାନେ ନିଜ ଶତ ପ୍ରତିଶତ କାର୍ଯ୍ୟ ଦେଇଥାନ୍ତି । 

ରିପୋର୍ଟର: ଅପରାଧୀଙ୍କ ପାଇଁ ପୋଲିସର କି ପଦକ୍ଷେପ ରହିବା ଆବଶ୍ୟକ ?

ଅନୁପ ସାହୁ: କୌଣସି ଗୋଟାଏ ସୁସ୍ଥ ସମାଜ ପାଇଁ ଅପରାଧ ମୁକ୍ତ ପରିବେଶ ଆବଶ୍ୟକ । ଏଭଳି ନ ହେଲେ ପୋଲିସ ଉପରେ ଲୋକଙ୍କ ଭରସା ତୁଟି ଯାଇଥାଏ । ଯିଏ ଯେଭଳି ଅପରାଧ କରୁଛି ତାହାକୁ ସେଭଳି ଦଣ୍ଡ ମିଳିବା ଜରୁରୀ । ଏନକାଉଣ୍ଟର ପାଇଁ ପୋଲିସ ବିଭାଗରେ ସେଭଳି କୌଣସି ପଲିସି ନାହିଁ । ହଁ ପରିସ୍ଥିତି ଦେଖି ପୋଲିସକୁ କାର୍ଯ୍ୟାନୁଷ୍ଠାନ ନେବାକୁ ପଡିଥାଏ । ରବି ରାଓ ଯେତେ ବେଳେ ରାଜଧାନୀରେ ଲୁଟ ପାଟ ଚଲାଇଥିଲା ତାହାକୁ ଧରିବା ପୋଲିସ ପାଇଁ ଚ୍ୟାଲେଞ୍ଜ ହୋଇଥିଲା । ଧରିବା ବେଳେ ପୋଲିସ ଉପରକୁ ଗୁଳି କରବା ବେଳେ ପୋଲିସ ମଧ୍ୟ ତାହାର ଉଚିତ ଜବାବ ଦେଇଥିଲା । 

ରିପୋର୍ଟର: ଫିଟ୍ ରହିବା ପୋଲିସ ଅଧିକାରୀଙ୍କ ପାଇଁ କେତେ ଜରୁରୀ ?

ଅନୁପ ସାହୁ: ପୋଲିସ ଅଧିକାରୀ ନିଜକୁ କିମ୍ବା ପରିବାରକୁ ସମୟ ଦେବା କାଠିକର ପାଠ । ଏହା ପରେ ବି ପୋଲିସ ଅଧିକାରୀ ନିଜ ବ୍ୟବହାର ବଦଳାଇବା ଦରକାର । 

ରିପୋର୍ଟର: ଗୁଇନ୍ଦା ବିଭାଗର ନୂଆ କାମକୁ କିଭଳି ଦେଖୁଛନ୍ତି ?

ଅନୁପ ସାହୁ: ଜିଲ୍ଲା ଗୁଇନ୍ଦା, ରାଜ୍ୟ ଗୁଇନ୍ଦା ମଧ୍ୟରେ ବହୁତ ଭିନ୍ନ । ପ୍ରଥମ ଥର ପାଇଁ ଏଭଳି ଏକ ପଦପଦବୀରେ ଯୋଗ ଦେବା ପରେ ନିଶ୍ଚିତ ପୂର୍ବପରି କାମ କରିବାକୁ ଚେଷ୍ଟା କରିବି ।

 ସମ୍ପୂର୍ଣ୍ଣ ଇଣ୍ଟରଭ୍ୟୁ ଦେଖିବା ପାଇଁ ତଳେ ଦିଆଯାଇଥିବା ଲିଙ୍କକୁ କ୍ଲିକ୍ କରନ୍ତୁ:-