Bangladesh news:ବାଂଲାଦେଶରେ ହିନ୍ଦୁଙ୍କ ସହିତ ବର୍ବରତା,ମନ୍ଦିର ଭାଙ୍ଗିବା ସହ ହିନ୍ଦୁଙ୍କ ଘର ଜାଳିଲେ

Bangladesh news:

ବାଂଲାଦେଶରେ ପୁଣିଥରେ ହିନ୍ଦୁଙ୍କ ଉପରେ ଆକ୍ରମଣ ହୋଇଛି। ମୁସଲିମ୍ ମୌଳବାଦୀ ସରସ୍ୱତୀ ପୂଜାଦିନ ହିନ୍ଦୁଙ୍କ ଉପରେ ଆକ୍ରମଣ କରିବା ସହିତ ପୂଜାମଣ୍ଡପ ଓ ମନ୍ଦିରରେ ଭଙ୍ଗାରୁଜା କରିଛନ୍ତି। ଗୋଟିଏ ସ୍ଥାନରେ କିଛି ଦୁର୍ବୃତ୍ତ ସରସ୍ୱତୀ ପୂଜା ମଣ୍ଡପ ଉପରେ ଆକ୍ରମଣ କରି ମା'ଙ୍କ ମୂର୍ତ୍ତି ଭାଙ୍ଗି ଦେଇଥିଲେ। ଦ୍ୱିତୀୟ ମାମଲାରେ କିଛି ମୁସଲମାନ ମୌଳବାଦୀ ଜୋରଜବରଦସ୍ତ ହିନ୍ଦୁ ପରିବାରଠାରୁ ଜମି ଓ ଘର ଛଡାଇ ନେବା ପାଇଁ ଆକ୍ରମଣ କରିଥିଲେ।ସେହିଭଳି ଅନ୍ୟ ଏକ ଘଟଣାରେ ସରସ୍ୱତୀ ପୂଜା ମଣ୍ଡପ ଭାଙ୍ଗିବାକୁ ନେଇ ହିନ୍ଦୁ ଓ ମୁସଲମାନ ଛାତ୍ରଛାତ୍ରୀଙ୍କ ମଧ୍ୟରେ ସଂଘର୍ଷ ହୋଇଛି। ଖାଲି ସେତିକି ନୁହେଁ, ଗୋଟିଏ ଅଞ୍ଚଳରେ କିଛି ଦୁର୍ବୃତ୍ତ ଜଣେ ହିନ୍ଦୁଙ୍କ ଘରେ ନିଆଁ ଲଗାଇ ଦେଇଛନ୍ତି।

ପ୍ରଥମ ଘଟଣାଟି ବ୍ରାହ୍ମଣବାରିଆ ଜିଲ୍ଲା ପାଇକପଡ଼ା ଅଞ୍ଚଳରେ ଘଟିଛି । ସେଠାରେ କିଛି ଅଜଣା ଦୁର୍ବୃତ୍ତ ସରସ୍ୱତୀ ପୂଜା ମଣ୍ଡପ ଉପରେ ଆକ୍ରମଣ କରିଥିଲେ। ସେମାନେ ମା' ସରସ୍ୱତୀଙ୍କ ମୂର୍ତ୍ତି ଭାଙ୍ଗି ଦେଇଥିଲେ। ଏନେଇ ଥାନାରେ ମାମଲା ରୁଜୁ ହୋଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା ଅଭିଯୋଗ ହୋଇଛି। କାହାରିକୁ ଗିରଫ କରାଯାଇ ନାହିଁ। ଯାହାକୁ ନେଇ ବାଂଲାଦେଶର ହିନ୍ଦୁମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।

ଦ୍ୱିତୀୟ ଘଟଣା ପଟୁଆଖାଲି ଜିଲ୍ଲାରେ ଘଟିଥିଲା । ସେଠାକାର ଘୁର୍ଚାଟି ଗାଁର କିଛି ହିନ୍ଦୁ ପରିବାରଙ୍କୁ ଜମି ଓ ଘର ଛାଡିବାକୁ ମୁସଲିମ୍ ମୌଳବାଦୀ  ଧମକ ଦେଇଥିଲେ।  ମୁସଲିମ୍ ମୌଳବାଦୀ ମହମ୍ମଦ ହାରୁନ୍ ଏବଂ ଅଲ୍-ଅମିନ୍ ହିନ୍ଦୁ ପରିବାରଗୁଡ଼ିକୁ ସେମାନଙ୍କ ଘର ଓ ଜମି ଛାଡ଼ିବାକୁ ଧମକ ଦେଇଥିଲେ। ସେମାନେ ମଧ୍ୟ ଗାଁରେ ରହିବାକୁ ହିନ୍ଦୁ ପରିବାରଙ୍କଠାରୁ ଟଙ୍କା ମାଗିଥିଲେ। ଜମି ଓ ଘର ନଛାଡିଲେ ସେମାନଙ୍କୁ  ଦେଶ ଛାଡିଯିବାକୁ ଧମକ ଦେଇଥିଲେ ମୌଳବାଦୀ।

ତୃତୀୟ ଘଟଣା ଘଟିଛି ଦିନାଜପୁର ଜିଲ୍ଲାରେ। ବାଂଶେରହାଟସ୍ଥିତ ହାଜି ଦାନେଶ ବିଜ୍ଞାନ ଓ ବୈଷୟିକ ବିଶ୍ୱବିଦ୍ୟାଳୟର ସରସ୍ୱତୀ ପୂଜା ମଣ୍ଡପରେ କିଛି ମୁସଲମାନ ଛାତ୍ର ଭଙ୍ଗାରୁଜା କରିବା ପରେ ହିନ୍ଦୁ ଓ ମୁସଲମାନ ଛାତ୍ରଛାତ୍ରୀଙ୍କ ମଧ୍ୟରେ ସାମାନ୍ୟ ଧସ୍ତାଧସ୍ତି ହୋଇଥିଲା।

ବାଂଲାଦେଶର ଫିରୋଜପୁର ଜିଲ୍ଲାରୁ ଚତୁର୍ଥ ଘଟଣା ସାମ୍ନାକୁ ଆସିଛି । ଏଠାରେ କିଛି ଦୁର୍ବୃତ୍ତ ଡୁମୁରିତାଳା ଶରିକ୍ତାଲା ସଂଘର ହିନ୍ଦୁ ଘରେ ନିଆଁ ଲଗାଇ ଦେଇଛନ୍ତି। ଫଳରେ ସମୀର ସାହା ଓ କଳା ସାହାଙ୍କ ଘର ଭସ୍ମୀଭୂତ ହୋଇଥିଲା। କିଛି ଦିନ ପରେ ସମୀର ସାହାଙ୍କ ଝିଅର ବିବାହ ସ୍ଥିର ହୋଇଛି। ଅଗ୍ନିକାଣ୍ଡରେ ସମୀର ଝିଅ ବାହାଘର ପାଇଁ ରଖିବା ସବୁ ଟଙ୍କା ଓ ଗହଣା ଜଳି ଯାଇଥିବା ଜଣା ପଡ଼ିଛି।