 "VIMSAR ସୁରକ୍ଷା ଦାୟିତ୍ବରେ ଥିବା ଠିକା ସଂସ୍ଥା ନାଁରେ ସାଂଘାତିକ ଅଭିଯୋଗ")
ସମ୍ବଲପୁର: ବିଭିନ୍ନ କାରଣ ପାଇଁ ଚର୍ଚ୍ଚାରେ ରହିଥାଏ ବୁର୍ଲା ଭୀମସାର। ଏଥର କିନ୍ତୁ ଏଠାରେ ଦାୟିତ୍ବରେ ଥିବା ସିକ୍ଯୁରିଟି ସଂସ୍ଥା ଏକଜୁକୁଟିଭଙ୍କ ନାଁରେ ଆସିଛି ସାଂଘାତିକ ଅଭିଯୋଗ। ଭୀମସାରରେ ସିକ୍ଯୁରିଟି ଗାର୍ଡ ସୁପରଭାଇଜର ପଦବୀ ପାଇଁ ପଇସା କାରବାର ଅଭିଯୋଗ। ଚାକିରି କରାଇଦେବା ପାଇଁ "ଏକଜୁକୁଟିଭ ସିକ୍ଯୁରିଟି ସଂସ୍ଥା" ପଇସା ନେଇଥିବା ସହ ଜାତିଆଣ ଆକ୍ଷେପ କରିଥିବା ନେଇ ବୁର୍ଲା ଥାନାରେ ମାମଲା ରୁଜୁ ହେବା ପରେ ଏବେ ଏହା ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି।
ସିକ୍ଯୁରିଟି ସଂସ୍ଥା ପକ୍ଷରୁ VIMSARରେ ନିୟୋଜିତ ବିଭିନ୍ନ ପଦବୀ ପାଇଁ ଗତ ୫ ତାରିଖରେ ନୋଟିଫିକେସନ ଆସିଥିଲା। ବହୁ ଆଶାୟୀ ଏଥି ପାଇଁ ଆବେଦନ କରିଥିଲେ। ନାରାୟଣ ବାରିକ ନାମକ ଜଣେ ବ୍ଯକ୍ତି ସୁପରଭାଇଜର ପଦବୀ ପାଇଁ ଆବେଦନ କରିଥିଲେ। ତେବେ ଚାକିରି ପାଇଁ ତାଙ୍କୁ ୫୦ ହଜାର ଟଂକା ମଗାଯାଇଥିବା ବେଳେ ସେ ୩୦ ହଜାର ଟଂକା ଧାର ଉଧାର କରି ଦେଇଥିବା କହିଛନ୍ତି। ସଂସ୍ଥାର ବସନ୍ତ ପାତ୍ରଙ୍କ କହିବା ପରେ ସେ ମହେଶ୍ବର ନାଏକଙ୍କୁ କଣ୍ଟ୍ରାକ୍ଚର କଲୋନୀରେ ପଇସା ଦେଇଥିବା ଅଭିଯୋଗ କରିଛନ୍ତି। ହେଲେ ଚାକିରି ନହେବାରୁ ସେ ପଇସା ମାଗିବାରୁ ତାଙ୍କୁ ଜାତିଆଣ ଆକ୍ଷେପ (Atrocity) କରିଥିବା ନେଇ ନାରାୟଣ ବୁର୍ଲା ଥାନା (Burla Police) ରେ ଲିଖିତ ଅଭିଯୋଗ କରିଛନ୍ତି।
ଏନେଇ ବୁର୍ଲା ଥାନାରେ ଠକେଇ ଅଭିଯୋଗରେ ଆଇପିସି ୪୨୦ ଓ ଜାତିଆଣ ଆକ୍ଷେପ ନେଇ ମାମଲା ରୁଜୁ ହୋଇଛି। ଏହି ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରିବା ସହିତ ଦୋଷୀ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବୁର୍ଲା ଏସଡିପିଓ (Burla SDPO) ଙ୍କ ତରଫରୁ ସୂଚନା ପ୍ରଦାନ କରାଯାଇଛି। ସେପଟେ ଏକଜୁକୁଟିଭ୍ ସିକରୁରୀଟି ସଂସ୍ଥାର ବୁର୍ଲା ୟୁନିଟ ହେଡ ଏହି ଘଟଣାକୁ ଅସ୍ବୀକାର କରିଛନ୍ତି।
)