 "ଫର୍ମକୁ ଫେରୁଛି କୋରୋନା, କଟକରେ ଦୁଇ ଓମିକୋନ୍ ସନ୍ଦିଗ୍ଧ")
)
ଭୁବନେଶ୍ୱର: ଜାନୁଆରୀ ଶେଷ ସୁଦ୍ଧା ଦେଶରେ ପୁଣି କୋରୋନା ତାହାର କାୟା ବିସ୍ତାର କରିସାରିଥିବ। ବ୍ରିଟେନ, ଫ୍ରାନ୍ସ ଭଳି ଭାରତରେ ମଧ୍ୟ ଦୈନିକ ୧୪ ଲକ୍ଷ କୋରୋନା ସଂକ୍ରମିତ ଚିହ୍ନଟ ହେଉଥିବା ନିତି ଆୟୋଗ ସଦସ୍ୟଙ୍କ VK paulଙ୍କ ଏଭଳି ବୟାନ ପରେ ଓଡିଶାରେ ମଧ୍ୟ ସ୍ବାସ୍ଥ୍ୟ ବିଭାଗ ତତ୍ପରତା ପ୍ରକାର କରିଛି। ତୃତୀୟ ଲହର ପାଇଁ ଓଡିଶା ପ୍ରସ୍ତୁତ, ରୋଗୀ ଚିହ୍ନଟ ହେଲେ ତୁରନ୍ତ ଚିକିତ୍ସା ଯୋଗାଇ ଦିଆଯିବ ବୋଲି ସ୍ବାସ୍ଥ୍ୟ ବିଭାଗ ଆଶ୍ବସ୍ତ କରିଛି। ହେଲେ ଗତ କିଛି ଦିନ ହେବ ରାଜ୍ୟକୁ 'ଆଟ ରିସ୍କ କଣ୍ଟ୍ରି'ରୁ ଆସୁଥିବା ଯାତ୍ରୀ ପ୍ରଶାସନ ପାଇଁ ଚିନ୍ତା ବଢାଇଛନ୍ତି। ବିଦେଶରୁ ଆସିଥିବା ଲୋକଙ୍କ ଜେନମ ସିକ୍ୟୁଆନ୍ସିଂ କରିବାକୁ ନିର୍ଦ୍ଦେଶ ଦିଆଯାଇଛି।
ପ୍ରଥମେ କୋରୋନା, ତା ପରେ ଡେଲଟା ଭାରିଆଣ୍ଟ ଆଉ ଏବେ ଓମିକ୍ରନ। ଏହାକୁ ନେଇ ସାରା ଦେଶରେ ପୁଣି ଥରେ ହାହାକାର ଆରମ୍ଭ ହୋଇଛି। ବ୍ରିଟେନରେ ଯେମିତି ସଂକ୍ରମଣ ବଢ଼ୁଛି, ତୃତୀୟ ଲହର ସମ୍ଭାବନା ନିଶ୍ଚିତ। ଓମିକ୍ରନର ଏଭଳି ସଂକ୍ରମଣ ବ୍ୟାପିବା ପରେ ସାରା ଦେଶରେ କୋରୋନାର ତୃତୀୟ ଲହର ଆସିବା ଆଶଙ୍କା ବୃଦ୍ଧି ପାଇଛି। ଆସନ୍ତା ବର୍ଷ ପ୍ରଥମ ମାସ ଶେଷ ସୁଦ୍ଧା ଭାରତରେ ମଧ୍ୟ ବ୍ରିଟେନ, ଫ୍ରାନ୍ସ ଭଳି ଦେଶରେ ଦିନକୁ ୧୪ ଲକ୍ଷ ଲୋକ କୋରୋନା ସଂକ୍ରମିତ ହେବା ଆଶଙ୍କା ଦେଖାଦେବ। ସେମାନଙ୍କ ମଧ୍ୟରୁ କେତେ ଜଣ ଡେଲଟା ଭାରିଆଣ୍ଟରେ ସଂକ୍ରମିତ ହୋଇଥିବା ବେଳେ ଅନ୍ୟ କେତେ ଜଣ ଓମିକ୍ରନ ସଂକ୍ରମିତ ହୋଇଥିବେ। ଏ କଥା ନୀତି ଆୟୋଗର ସ୍ବାସ୍ଥ୍ୟ ବିଭାଗ ସଦସ୍ୟ VK paul କହିବା ପରେ ଚାରିଆଡେ ଚିନ୍ତା ବଢିଯାଇଛି। ନୀତି ଆୟୋଗ ଏଭଳି ତଥ୍ୟ ଦେବା ପରେ ଓଡିଶା ସ୍ବାସ୍ଥ୍ୟ ବିଭାଗ ନିଜ ଆଡୁ ସଫେଇ ଦେଇଛି।
ତୃତୀୟ ଲହରକୁ ମୁକାବିଲା କରିବା ଲାଗି ରାଜ୍ୟ ସରକାର ସମର୍ଥ ରହିଛନ୍ତି। ଯେତେ ରୋଗୀ ଚିହ୍ନଟ ହୁଅନ୍ତୁ ସମସ୍ତଙ୍କୁ ସ୍ବାସ୍ଥ୍ୟସେବା ଯୋଗାଇ ଦିଆଯିବ। ସରକାରଙ୍କ ନିୟମାବଳୀ ଅନୁସାରେ ଆନ୍ତର୍ଜାତିକ ଯାତ୍ରୀଙ୍କର ସର୍ଭେଲାନ୍ସ କରାଯାଉଛି। ଓମିକ୍ରନ ରୋଗୀଙ୍କ ଚିହ୍ନଟ ପାଇଁ ଜିନମ ସିକ୍ୱେନ୍ସିଂ ଆବଶ୍ୟକ। ତେଣୁ ସିକ୍ୱେନ୍ସିଂ ପାଇଁ ଯାଉଥିବା ନମୂନା ସଂଖ୍ୟା ବଢାଇବାକୁ କୁହାଯାଇଛି ବୋଲି ସ୍ବାସ୍ଥ୍ୟ ନିର୍ଦ୍ଦେଶକ, ଡ. ନିରଂଜନ ମିଶ୍ର କହିଛନ୍ତି। ବର୍ତ୍ତମାନ ଯାଏ ଆଟ ରିସ୍କ କଣ୍ଟ୍ରିରୁ ଓଡିଶାକୁ ୧୫ ଶହରୁ ଅଧିକ ଲୋକ ଆସିଛନ୍ତି। ସମସ୍ତଙ୍କ ଉପରେ ନଜର ରଖିବାକୁ କୁହାଯାଇଛି। ଦ୍ଵିତୀୟ ଲହରରେ ଯେଉଁ ଟ୍ରିଟମେଣ୍ଟ ଯେଭଳି ଥିଲା ଏବେ ବି ତାହା ରହିଛି। ଓମିକ୍ରନ ଯୋଗୁ ଯେଉଁ ପରିସ୍ଥିତି ସୃଷ୍ଟି ହେବ ତାକୁ ସମ୍ଭାଳିବା ଲାଗି ସ୍ବାସ୍ଥ୍ୟ ବିଭାଗର କ୍ଷମତା ରହିଛି। ରୋଗୀ ସଂଖ୍ୟା ବୃଦ୍ଧି ସହ ତାଳ ଦେଇ ଭିତ୍ତିଭୂମି ବଢ଼ାଯିବ। ପୂର୍ବ ପ୍ରସ୍ତୁତି ସହ ଅକ୍ସିଜେନ, ବେଡ଼, ଜରୁରୀ ଔଷଧ ମହଜୁଦ ରଖାଯାଉଛି ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି।
ଓଡିଶାର ପଡୋଶୀ ଦୁଇ ରାଜ୍ୟ ଆନ୍ଧ୍ରପ୍ରଦେଶ ଓ ପଶ୍ଚିମବଙ୍ଗରେ ଓମିକ୍ରନ ସଂକ୍ରମିତ ରୋଗୀ ଚିହ୍ନଟ ହେବା ପରେ ରାଜ୍ୟ ପାଇଁ ଆଶଙ୍କା ବଢିଯାଇଛି। ଏପଟେ ନାଇଜେରିଆରୁ କଟକ ଆସିଥିବା ଦୁଇ ସନ୍ଦିଗ୍ଧଙ୍କୁ ନେଇ ଭୟ ଦେଖାଦେଇଛି। ଦୁଇ ଜଣଙ୍କ ସମେତ ତାଙ୍କ ସଷ୍ପର୍ଶରେ ଆସିଥିବା ଅନ୍ୟ ୭ ଜଣ ମଧ୍ୟ କୋଭିଡ ପଜେଟିଭି ଚିହ୍ନଟ ହୋଇଛନ୍ତି। ସେ ସମସ୍ତେ ଓମିକ୍ରାନ ଆକ୍ରାନ୍ତ କି ନାହିଁ ତାହା ଜାଣିବା ପାଇଁ ସେମାନଙ୍କ ନମୂନା ଜିନମ ସିକୁ୍ୟାଏନ୍ସିଂ ପାଇଁ ଜିଲ୍ଲା ପ୍ରଶାସନ ପଠାଇଛି। ସମ୍ପୂର୍କ୍ତ ବ୍ୟକ୍ତି ଜଗତସିଂହପୁରରୁ କଟକ ଆସିଥିଲେ। ଏପର୍ଯ୍ୟନ୍ତ ବିଦେଶରୁ ଫେରି କଟକରେ ରହିଥିବା ଶହେରୁ ଅଧିକ ବ୍ୟକ୍ତିଙ୍କ ପରୀକ୍ଷା କରାଯାଇଥିବା ସିଡିଏମଓ ସତ୍ୟବ୍ରତ ଛୋଟରାୟ ସୂଚନା ଦେଇଛନ୍ତି।
ଯେଉଁଭଳି ଢଙ୍ଗରେ କୋରୋନା ସଂକ୍ରମଣ ପୁଣି ବଢିବାରେ ଲାଗିଛି ଆସନ୍ତା ମାସେ କିମ୍ବା ଦୁଇ ମାସ ମଧ୍ୟରେ ପୁଣି ସ୍ଥିତି ଗମ୍ଭୀର ହେବା ଆଶଙ୍କା କରାଯାଉଛି। ଏଥିପାଇଁ କୋରୋନାକୁ ରୋକିବା ପାଇଁ ମାସ୍କ ଓ ସୋସିଆଲ ଡିଷ୍ଟାନ୍ସିଂକୁ ଜାରି ରଖିବାକୁ ବାରମ୍ବାର ସ୍ବାସ୍ଥ୍ୟ ବିଭାଗ କହୁଛି। ଫେବୃଆରୀ ବେଳକୁ ତୃତୀୟ ଲହର ଆସିପାରେ ବୋଲି ବିଶ୍ୱ ସ୍ୱାସ୍ଥ୍ୟ ସଂଗଠନ ପୂର୍ବାନୁମାନ କରିଛି। ବର୍ତ୍ତମାନ ସୁଦ୍ଧା ଦେଶର ୧୨ଟି ରାଜ୍ୟରେ ଓମିକ୍ରମ ବ୍ୟପୀଛି। ୧୪୩ ଜଣ ଓମିକ୍ରୋନ ଭ୍ୟାରିଆଣ୍ଟରେ ଆକ୍ରନ୍ତ ଚିହ୍ନଟ ହୋଇଛନ୍ତି।
