ଭେଣ୍ଟିଲେଟରର ବିକଳ୍ପ ପରିକଳ୍ପନା

ବିକ୍ରମ ସାହୁ, ନୂଆଦିଲ୍ଲୀ: ବି.ଟେକ୍ ଛାତ୍ରଙ୍କ କମାଲ । କୋରୋନା ରୋଗୀଙ୍କୁ ମିଳିବ ନୂଆ ଜୀବନ । ମହାମାରୀର ଏଭଳି ଅଭାବୀ ସମୟରେ ଭେଣ୍ଟିଲେଟର ବିକଳ୍ପ ପରିକଳ୍ପନା କରିଛନ୍ତି ଭୁବନେଶ୍ୱର ଆଇଆଇଟିର ମେଧାବୀ ଛାତ୍ର ଅନନ୍ୟ ପ୍ରମୟ । ଅତ୍ୟାଧୁନିକ ଜ୍ଞାନ କୌଶଳରେ ପ୍ରସ୍ତୁତ କରିଛନ୍ତି ଏକ ଡବଲ ହେଲମେଟ ଭଳି ଭେଣ୍ଟିଲେଟର ଡିଭାଇସ । ଯାହାର ନାମ ରଖିଛନ୍ତି ଶ୍ୱାସ୍ନେର । ନିଜ ସହପାଠୀଙ୍କ ସହାୟତାରେ ୫ ମାସର ଗବେଷଣା ପରେ ଏହି ଭେଣ୍ଟିଲେଟର ଡିଭାଇସକୁ ପ୍ରସ୍ତୁତ କରିଛନ୍ତି ସେ । ଯାହା ସ୍ୱଳ୍ପ ଖର୍ଚ୍ଚରେ ରୋଗୀଙ୍କ ଜୀବନ ବଞ୍ଚାଇବାରେ ସହାୟକ ହୋଇପାରିବ ବୋଲି ଦାବି କରିଛନ୍ତି ଅନନ୍ୟ । 

ଚିକାଗୋ ଔଷଧ ମହାବିଦ୍ୟାଳୟର ଗବେଷଣା ଅନୁଯାୟୀ, ରୋଗୀ ଭେଣ୍ଟିଲେଟର ଅପେକ୍ଷା ଏହି ଡିଭାଇସ ଦ୍ୱାରା ତୀବ୍ର ଗତିରେ ସୁସ୍ଥ ହେଉଛନ୍ତି । ଯାହାକୁ ଆଧାର କରି ସ୍ୱଦେଶୀ ଜ୍ଞାନ କୌଶଳରେ ନିର୍ମିତ ଏହି ଡିଭାଇସରେ ବ୍ୟବହୃତ ସମସ୍ତ ପ୍ଲାଷ୍ଟିକ ସାମଗ୍ରୀକୁ ମଧ୍ୟ ସିପେଟ ସ୍ୱୀକୃତି ଦେଇଛି । 

ସେପଟେ ଏସଟିପିଆଇ ସହାୟତାରେ କଟକର ଦୁଇଟି ହସପିଟାଲରେ ଏହି ଡିଭାଇସର ପରୀକ୍ଷଣ ଚାଲିଥିବା ବେଳେ, ଅନନ୍ୟଙ୍କ ଏଭଳି ପ୍ରୟାସକୁ ନେଇ ଅଭିଭାବକ ଓ ଶୁଭେଛୁ ଗର୍ବ ଅନୁଭବ କରିଛନ୍ତି । ଭେଣ୍ଟିଲେଟରର ବିକଳ୍ପ ପରିକଳ୍ପନାକୁ ସ୍ୱାସ୍ଥ୍ୟ ବିଭଗର ସ୍ୱୀକୃତି ସହ ଆଗାମୀ ଦିନରେ କେତେ ସଫଳତା ମିଳୁଛି ତାହା ଦେଖିବାର କଥା ।