ବୁର୍ଲାରେ ୫ଟି ୱାର୍ଡରେ ଦୁଇଦିନିଆ ସଟଡାଉନ

ସମ୍ବଲପୁର: ଜିଲ୍ଲାରେ କୋରୋନା ସଂକ୍ରଣର ବୃଦ୍ଧିକୁ ଦୃଷ୍ଟିରେ ରଖି ଆଜି ଓ ଆସନ୍ତା କାଲି ୨ ଦିନ ଧରି ବୁର୍ଲା ସହରର ୫ଟି ୱାର୍ଡକୁ ସଟଡାଉନ ଘୋଷଣା କରିଛି ଜିଲ୍ଲା ପ୍ରଶାସନ। ବୁର୍ଲା ସହରର ୩,୪,୫,୬,୭ ନମ୍ବର ୱାର୍ଡକୁ ସମ୍ପୂର୍ଣ୍ଣ ସଟ ଡାଉନ କରି ଦିଆଯାଇଛି। ଗତକିଛି ଦିନ ଭିତରେ ଭିସୁଟରୁ ୮ଟି ସ୍ଥାନୀୟ ସଂକ୍ରମଣ ବାହାରିବାରୁ ଜିଲ୍ଲା ପ୍ରଶାସନ ପକ୍ଷରୁ ଏମିତି ନିଷ୍ପତ୍ତି ନିଆଯାଇଛି। ବୁର୍ଲା ଭୀମସାର ମେଡ଼ିକାଲ ସଟଡାଉନରୁ ବାଦ ରହିବ। ଚିକିତ୍ସା ସେବା ସ୍ୱଭାବିକ ରହିବ। ଯେଉଁ ଲୋକମାନେ ସଟଡାଉନ କଟକଣା ଉଲ୍ଲଂଘନ କରିବେ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦିଆଯାଇଛି। 

ତେବେ ସବୁ ବେସରକାରୀ ହସ୍ପିଟାଲ, ଔଷଧ ଦୋକାନ, କ୍ଷୀର ଦୋକାନ, ଗଣମାଧ୍ୟମ, ଅତ୍ୟାବଶ୍ୟକ ସେବାରେ ଥିବା ସରକାରୀ କର୍ମଚାରୀ, ଏଟିଏମ କଟକଣା ମୁକ୍ତ ରହିବ। ତେବେ ବିବାହ ଅଥବା ଯେକୌଣସି ସମାଜିଜ କାର୍ଯ୍ୟ ପାଇଁ ସ୍ଥାନୀୟ ଅଧିକାରୀଙ୍କ ଠାରୁ ଅନୁମତି ନିଆଗଲା ପରେ ହିଁ କିଛି କରାଯାଇ ପାରିବ। ଗୋଷ୍ଠୀ ସଂକ୍ରମଣ ଉପରେ ରୋକ ଲଗାଇବାକୁ ଜିଲ୍ଲା ପ୍ରଶାସନ ପକ୍ଷରୁ ନିଆଯାଇଥିବା ଏହି ପଦକ୍ଷେପକୁ ଜିଲ୍ଲାବାସୀ ସ୍ୱାଗତ କରିଛନ୍ତି। ତେବେ ଏହି ସଟଡାଉନରେ ଦୋକାନ ବଜାର ବନ୍ଦ ରହିବା ସହ ରାସ୍ତାଘାଟ ଶୂନଶାନ ରହିଛି । ବୁର୍ଲା ଗଳିକନ୍ଦିରେ ପୋଲିସ ମୁତୟନ ହୋଇଛନ୍ତି । ସେପଟେ ବୁର୍ଲା ଫାୟାର ଷ୍ଟେସନକୁ ମଧ୍ୟ ସିଲ କରି ଦିଆଯାଇଛି, ଜଣେ ଫାୟାରମ୍ୟାନ କୋଭିଡ ପଜିଟିଭ୍ ଆସିବା ପରେ ଏପରି ନିଷ୍ପତ୍ତି ନିଆଯାଇଛି । 

ଏହା ସହ ସମ୍ପୃକ୍ତ ଅଞ୍ଚଳକୁ କଣ୍ଟେନମେଣ୍ଟ ଜୋନ୍ ଭାବେ ଘୋଷଣା କରାଯାଇଛି । ବୁର୍ଲା ଷ୍ଟେସନର ସବୁ ଅଧିକାରୀ ଓ କର୍ମଚାରୀଙ୍କୁ କ୍ୱାରେଣ୍ଟାଇନକୁ ପଠାଇ ଦିଆଯାଇଛି । ତେବେ ପଜିଟିଭ୍ ଆସିଥିବା ଫାୟାରମ୍ୟାନ ଜଣକ ଅମ୍ଫାନ ଡ୍ୟୁଟି ସାରି କିଛି ଦିନ ତଳେ ପଶ୍ଚିମବଙ୍ଗରୁ ଫେରିଥିଲେ । ତେବେ ଭୁବନେଶ୍ୱରରେ କ୍ୱାରେଣ୍ଟାଇନରେ ରହିବା ସହ ଦୁଇଥର ନେଗେଟିଭ୍ ଆସିବା ପରେ ସେ ଗତ ଜୁଲାଇ ୪ ତାରିଖରେ ବୁର୍ଲାରେ ଡ୍ୟୁଟିରେ ଯୋଗ ଦେଇଥିଲେ । ତେବେ ବର୍ତ୍ତମାନ ସେ ପଜିଟିଭ୍ ଆସିବାରୁ ବିଭାଗର ଅକଲ ଗୁଡୁମ ହୋଇଯାଇଛି ।