ହାଜତ ଭିତରେ ଅମିତ ଶାହଙ୍କ ନକଲି ସଚିବ

ନୂଆଦିଲ୍ଲୀ: ହେଲୋ, ମୁଁ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ବ୍ୟକ୍ତିଗତ ସଚିବ କହୁଛି । ପରିବହନ ନିରୀକ୍ଷକଙ୍କ ଯେଉଁ ବଦଳି ହୋଇଛି, ତାକୁ ବନ୍ଦ କର । ବାସ୍, ଏମିତି କିଛି ଢଙ୍ଗରେ ଗ୍ୱାଲିୟର ପରିବହନ କାର୍ଯ୍ୟାଳୟକୁ ଆସିଥିଲା ଫୋନ । ଆଉ ବଦଳିକୁ ବନ୍ଦ କରିବା ପାଇଁ ଫୋନ ମାଧ୍ୟମରେ ନିର୍ଦ୍ଦେଶ ଦେଉଥିଲେ ଉକ୍ତ ଯୁବକ । ସନ୍ଦେହ ହେଲା, ପୋଲିସକୁ ଖବର ଦିଆଗଲା । ଶେଷରେ ଏହେ ହାଜତରେ ଚକି ପେଶୁଛି ଶାହଙ୍କ ନକଲୀ ବ୍ୟକ୍ତିଗତ ସଚିବ । 

ଏବେ ପୁରା ଘଟଣା ବିଷୟରେ ଜାଣିବା । ଗତ ୩ ଜୁଲାଇ ୨୦୨୦ରେ ଏମିତି ଏକ ଫୋନ କଲ ଗ୍ୱାଲିଅର ପରିବହନ କାର୍ଯ୍ୟାଳୟକୁ ଆସିଥିଲା । ନିଜକୁ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ବ୍ୟକ୍ତିଗତ ସଚିବ ବୋଲି ପରିଚୟ ଦେଇ ଏକ ବଦଳିକୁ ବନ୍ଦ କରିବା ପାଇଁ କେହି ଜଣେ ନିର୍ଦ୍ଦେଶ ଦେଉଥିଲେ । ତେବେ ସନ୍ଦେହ ହେବାରୁ ଏନେଇ ସ୍ୱରାଷ୍ଟ୍ର ମନ୍ତ୍ରୀଙ୍କ ବ୍ୟକ୍ତିଗତ ସଚିବଙ୍କୁ ଜଣାଇଥିଲେ ସଡ଼କ ଓ ପରିବହନ ମନ୍ତ୍ରୀଙ୍କ ଆସିଷ୍ଟାଣ୍ଡ ପର୍ସନାଲ ସେକ୍ରେଟାରୀ ।

ଆଉ ଏହା ଜଣାବା ପରେ ଦିଲ୍ଲୀ ପୋଲିସ ଆୟୁକ୍ତଙ୍କ ପାଖରେ ଏତଲା ଦେଇଥିଲେ ସ୍ୱରାଷ୍ଟ୍ର ମନ୍ତ୍ରୀଙ୍କ ବ୍ୟକ୍ତିଗତ ସଚିବ । ପରେ ଦିଲ୍ଲୀ ପୋଲିସର କ୍ରାଇମବ୍ରାଞ୍ଚ ଏକ ମାମଲା ରୁଜୁ କରି ଘଟଣାର ତଦନ୍ତ କରିଥିଲେ । ତଦନ୍ତରୁ ଜଣାପଡ଼ିଥିଲା, ନିଜକୁ ଶାହଙ୍କ ବ୍ୟକ୍ତିଗତ ସଚିବ କହୁଥିବା ଉକ୍ତ ଯୁବକର ଅଭିଷେକ ଦ୍ୱିବେଦୀ । ତା ଘର ମଧ୍ୟପ୍ରଦେଶର ରୀୱା ଜିଲ୍ଲାରେ । ଏବେ ସେ Navi Mumbaiରେ ରହୁଥି୍ଲା । ଅଭିଯୁକ୍ତ ନାଁରେ ଏପ୍ରକାର ଅନେକ ମାମଲା ମଧ୍ୟ ପୂର୍ବରୁ ଥିବା ଜଣାପଡ଼ିଛି । ନିଜର ଜଣେ ସହଯୋଗୀ ସହ ସେ ଏପ୍ରକାର ଠକାମି କାମ କରୁଥିଲା । 

Add Zee News as a Preferred Source

ତେବେ ଦିଲ୍ଲୀ ପୋଲିସର କ୍ରାଇମବ୍ରାଞ୍ଚ ଏସବୁ ଜାଣିବା ପରେ ଅଭିଯୁକ୍ତ ଅଭିଷେକକୁ ଗିରଫ କରିବାକୁ Navi Mumbai ଯାଇଥିଲା । ତେବେ ସେତେବେଳେକୁ ଅଭିଯୁକ୍ତ ଫେରାର ହୋଇଯାଇଥିଲା । ପରେ ସେ ଇନ୍ଦୋରରେ ଥିବା ଜାଣି ସେଠିକାର ପୋଲିସ ସହାୟତାରେ ତାକୁ ଗିରଫ କରିଛି ଦିଲ୍ଲୀ ପୋଲିସ । ପରିବହନ କାର୍ଯ୍ୟାଳୟକୁ କଲ୍ କରିବା ବେଳେ ଯେଉଁ ଫୋନର ବ୍ୟବହାର କରିଥିଲା ଅଭିଯୁକ୍ତ ଅଭିଷେକ, ତାକୁ ମଧ୍ୟ ଜବତ କରାଯାଇଛି ।