ସ୍କୁଲ ଛାତ୍ରଛାତ୍ରୀଙ୍କ ଉପରେ ଚଢିଗଲା କାର, ଭାଇ-ଭଉଣୀ ସମେତ ୫ ମୃତ

ଯୋଧପୁର: ସ୍କୁଲରୁ ଘରକୁ ଫେରିବା ବାଟରେ ଚାଲିଗଲା ୫ ନିରିହ ଜୀବନ। ଘରକୁ ପହଞ୍ଚିବାର ମାତ୍ର ୧୦ ମିନିଟ ପୂର୍ବରୁ ମୃତଦେହ ପାଲଟିଗଲେ ଛାତ୍ରଛାତ୍ରୀ। ଏଭଳି ଏକ ଭୟାନକ ଦୁର୍ଘଟଣା ରାଜସ୍ଥାନ (Rajasthan) ର ଜାଲୋର ଜିଲ୍ଲା ରାନୀୱାରା ଅଞ୍ଚଳରେ ଘଟିଛି। ସ୍କୁଲରୁ ଘରକୁ ଫେରୁଥିବା ବେଳେ ଏକ କାର ଧକ୍କାରେ ୫ ଜଣ ଛାତ୍ରଛାତ୍ରୀଙ୍କ ମୃତ୍ୟୁ ହୋଇଛି।

ପୋଲିସର କହିବା ଅନୁସାରେ ଦୁର୍ଘଟଣା (Accident) ରେ ୩ ଛାତ୍ରୀଙ୍କ ସମେତ ୫ ଜଣଙ୍କ  ମୃତ୍ୟୁ ହୋଇଛି। ସେଥିରେ ଭାଇ ଭଉଣୀ ମଧ୍ୟ ଅଛନ୍ତି। ଅନ୍ୟଜଣେ ଗୁରୁତର ଅବସ୍ଥାରେ ହସ୍ପିଟାଲରେ ଚିକିତ୍ସିତ ହେଉଛନ୍ତି। ମୃତକମାନେ ଗୋଟିଏ ଗାଁର ଏବଂ ସେମାନେ ଷଷ୍ଠରୁ ଦଶମ ଶ୍ରେଣୀର ଛାତ୍ରଛାତ୍ରୀ। ସ୍କୁଲ ଛୁଟି ହେବା ପରେ ସେମାନେ ଘରକୁ ଫେରୁଥିବା ବେଳେ ଦୁର୍ଘଟଣାଟି ଘଟିଛି। ଗାଡିକୁ ଜବତ କରାଯାଇଥିବା ବେଳେ ଡ୍ରାଇଭରକୁ ଗିରଫ କରାଯାଇଛି।

Also Read: ସମସ୍ତ ଅଙ୍ଗନୱାଡି କେନ୍ଦ୍ର ବନ୍ଦ, ପୁଣି ରଣକ୍ଷେତ୍ରରେ ୱାର୍କର-ହେଲପର୍

ଅପରାହ୍ଣ ୪ଟାରେ ସ୍କୁଲ ଛୁଟି ହୋଇଥିଲା। ପିଲାମାନେ ନିକଟ ଗାଁରେ ରୁହନ୍ତି। ତେଣୁ ସେମାନେ ଠିକ ବାଟରେ ଚାଲିଚାଲି ଘରକୁ ଫେରୁଥିଲେ। ଏହି ସମୟରେ ଏକ କାର ଦୃତଗତିରେ ଆସି ଜଣେ ଛାତ୍ରଙ୍କୁ ପଛପଟୁ ଧକ୍କା ଦେଇଥିଲା। ପରେ ଅନିୟନ୍ତ୍ରୀତ ହୋଇ ଅନ୍ୟ ଛାତ୍ରଛାତ୍ରୀଙ୍କ ଉପରେ ମାଡି ଯାଇଥିଲା। ତେବେ ଘଟଣାସ୍ଥଳରେ ୪ ଜଣଙ୍କ ମୃତ୍ୟୁ ହୋଇଥିବା ବେଳେ ଜଣେ ହସ୍ପିଟାଲରେ ପ୍ରାଣ ହରାଇଛନ୍ତି। ଯେଉଁ ସ୍ଥାନରେ ଦୁର୍ଘଟଣା ଘଟିଲା ସେଠାରୁ ମାତ୍ର ୧୦ ମିନିଟର ଦୂରତାରେ ମୃତକଙ୍କ ଘର ଥିଲା ବୋଲି ପୋଲିସ କହିଛି। 

ସେପଟେ ଏହି ମର୍ମନ୍ତୁଦ ସଡକ ଦୁର୍ଘଟଣା (Road Accident) ରେ ମୁଖ୍ୟମନ୍ତ୍ରୀ ଅଶୋକ ଗେହେଲଟ (Ashok Gehlot)ଓ ଲୋକସଭା ବାଚସ୍ପତି ଓମ ବିର୍ଲା (Om Birla) ଶୋକ ପ୍ରକାଶ କରିଛନ୍ତି। ଆହତଙ୍କ ଆଶୁ ଆରୋଗ୍ୟ କାମନା କରିବା ସହ ପୀଡିତ ପରିବାକୁ ସମବେଦନା ଜଣାଇଛନ୍ତି। ତେବେ ସେମାନଙ୍କ ପକ୍ଷରୁ କୌଣସି ଆର୍ଥିକ ସହାୟତା ଘୋଷଣା କରାଯାଇନଥିବା ସୂଚନା ମିଳିଛି।