ଧର୍ମକ୍ଷେତ୍ରରେ ବଡ଼ ଅଧର୍ମ: ୫ ବର୍ଷର ଶିଶୁକନ୍ୟାକୁ ଦୁଷ୍କର୍ମ

ପୁରୀ: ଜିଲ୍ଲାରେ ଜଣେ ୫ ବର୍ଷର ଶିଶୁକୁ ଦୁଷ୍କର୍ମ ଅଭିଯୋଗ । ଦିନ ଦ୍ୱିପହରରେ ଟାଉନ୍ ଥାନା ଅଂଚଳରେ ଶିଶୁକୁ ଦୁଷ୍କର୍ମ କରି ଦୁର୍ବୃତ ଫେରାର ହୋଇଯାଇଛି । ନାବାଳିକାକୁ ଗୁରୁତର ଅବସ୍ଥାରେ ପ୍ରଥମେ ପୁରୀ ସଦର ହସ୍ପିଟାଲ ଓ ପରେ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି । ଅଭିଯୁକ୍ତ ମହେଶ ମହାନ୍ତି ବୋଲି ଜଣାପଡ଼ିଛି । ସେ ଜଣେ ଡ୍ରାଇଭର ବୋଲି ପୋଲିସ କହିଛି । ଏହି ଘଟଣାକୁ ନେଇ ଟାଉନ୍ ଥାନା ପୋଲିସ ଏକ ଦୁଷ୍କର୍ମ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଅଭିଯୁକ୍ତ ମହେଶକୁ ଧରିବା ପାଇଁ ଚାରିଟି ଟିମ୍ ଗଠନ କରାଯାଇଛି । 

ଶ୍ରୀକ୍ଷେତ୍ର ପୁରୀ (Puri) ରେ ଜଣେ ୫ ବର୍ଷର ନାବାଳିକାଙ୍କୁ ଦୁଷ୍କର୍ମ ଅଭିଯୋଗ ହୋଇଛି । ଗତକାଲି ଦିନ ୧୧ଟା ୪୫ ମିନିଟ ସମୟରେ ଅଭିଯୁକ୍ତ ମହେଶ ମହାନ୍ତି, ନିଶାଶକ୍ତ ଅବସ୍ଥାରେ ଘଟାଇଥିଲା ଏହି ଜଘନ୍ୟକାଣ୍ଡ । ପୀଡ଼ିତା ନାବାଳିକାଙ୍କୁ ପ୍ରଥମେ ପୁରୀ ସଦର ହସପିଟାଲ ଓ ପରେ କଟକ ଏସସିବି ମେଡିକାଲକୁ ସ୍ଥାନାନ୍ତର କରାଯାଇଛି । ଟାଉନ ଥାନା ପୋଲିସ ଏକ ମାମଲା ରୁଜୁ କରିବା ସହ ଅଭିଯୁକ୍ତକୁ ଧରିବା ପାଇଁ ୪ଟି ଟିମ୍ ଗଠନ କରିଛି ।ରବିବାରଠୁ ବିଭିନ୍ନ ସ୍ଥାନରେ ତନାଘନା ଚଳାଇଛି ପୋଲିସ । ଅଭିଯୁକ୍ତର ଘର ଜଗତସିଂହପୁର ହୋଇଥିବାବେଳେ ପୈତୃକ ଘର , ପାରାଦୀପରେ ଥିବା ସଂପର୍କୀୟଙ୍କ ଘର , ପୁରୀର ଛଇତନା , ବ୍ରହ୍ମଗିରି, ପେଣ୍ଠକଟା ଆଦି ବିଭିନ୍ନ ସ୍ଥାନରେ ଚଢାଉ କରିଥିଲେ ମଧ୍ୟ ପୋଲିସ ଅଭିଯୁକ୍ତକୁ ଗିରଫ କରିବାରେ ବିଫଳ ହୋଇଛି। 

ଘଟଣାକୁ ୨୪ଘଣ୍ଟା ବିତିଯାଇଥିଲେ ବି ପୋଲିସ ହାତ ଖାଲି ରହିବା ଯୋଗୁଁ ସାଧାରଣରେ ଅସନ୍ତୋଷ ଦେଖାଦେଇଛି। ରବିବାର ନିଶାସକ୍ତ ଅବସ୍ଥାରେ ମହେଶ ମହାନ୍ତି, ପୀଡ଼ିତାଙ୍କୁ ତିନିମହଲା ଉପରକୁ ନେଇ ଦୁଷ୍କର୍ମ କରିଥିଲା । ପୀଡ଼ିତା ଚିତ୍କାର କରିବାରୁ ତାଙ୍କ ମା' ଯାଇ ଦେଖିଲା ବେଳକୁ ମହେଶ ଫେରାର ହୋଇଯାଇଥିଲା । ପୀଡ଼ିତା ଭଡ଼ାରେ ରହୁଥିବା ଜଣେ ରାଜମିସ୍ତ୍ରୀଙ୍କ ଝିଅ । ସେହି ଘର ଭଡ଼ାରେ ପୂର୍ବରୁ ରହୁଥିଲା ମହେଶ । ପୂର୍ବରୁ ସ୍ତ୍ରୀ ଛାଡ଼ି ପଳାଇଥିବାବେଳେ ଏବେ ଭଉଣୀ ଓ ଭାଣିଜି ସହ ରହୁଥିଲା । ଅଭିଯୁକ୍ତ ମହେଶ (Accused Mahesh) ଅସ୍ଥାୟୀ ଡ୍ରାଇଭର ଭାବେ କାମ କରି ଚଳୁଥିବା ସୂଚନା ମିଳିଛି ।

ପୁରୀରେ ଏଭଳି ଘଟଣା, ସାଧାରଣରେ ଅସନ୍ତୋଷ ସୃଷ୍ଟି କରିଛି । ଯଥାଶୀଘ୍ର ଅଭିଯୁକ୍ତକୁ ଗିରଫ କରି ଦୃଢ କାର୍ଯ୍ୟାନୁଷ୍ଠାନ (Police Action) ଗ୍ରହଣ କରିବାକୁ ଦାବି ଜୋର ଧରିଛି ।