ବୀମା ରାଶି ପରିବାରକୁ ମିଳିବ ବୋଲି ନିଜର ହତ୍ୟା କରାଇଲେ ବ୍ୟବସାୟୀ

ନୂଆଦିଲ୍ଲୀ: ଦିଲ୍ଲୀ ପୋଲିସ କଡ଼କଡ଼ଡୁମାରୁ ନିଖୋଜ ଥିବା ଜଣେ ବ୍ୟବସାୟୀଙ୍କ ହତ୍ୟା ମାମଲାର ସମାଧାନ କରିଛି । ଏହି ମାମଲାରେ ନାବାଳିକାଙ୍କ ସମେତ ୪ ଜଣଙ୍କୁ ଗିରଫ କରାଯାଇଛି । ପୋଲିସ କହିଛି ଯେ ଋଣଗ୍ରସ୍ତ ବ୍ୟବସାୟୀ ନିଜ ପରିବାରକୁ ବହୁ ପରିମାଣର ବୀମା ରାଶି ଦେବା ପାଇଁ ନିଜର ହତ୍ୟାର ସୁପାରି ଦେଇଥିଲେ । ପରେ ଯୋଜନା ଅନୁଯାୟୀ ସେହି ୪ ଜଣ ତାଙ୍କୁ ହତ୍ୟା କରିଥିଲେ । ଜୁନ୍ ୧୦ରେ ବ୍ୟବସାୟୀଙ୍କ ମୃତଦେହ ଦିଲ୍ଲୀର ରଣହୌଲା ଅଞ୍ଚଳରୁ ଏକ ଗଛରେ ଝୁଲୁଥିବାର ଦେଖିବାକୁ ମିଳିଥିଲା ​​। ତାଙ୍କ ହାତ ପଛରେ ବନ୍ଧା ହୋଇଥିଲା ।

ବାସ୍ତବରେ ଜୁନ୍ ୧୦ରେ ଆଇପି ଏକ୍ସଟେନ୍ସନ୍ ଅଞ୍ଚଳରେ ରହୁଥିବା ଶାନୁ ବନସଲ ଆନନ୍ଦ ବିହାର ପୋଲିସ ଷ୍ଟେସନରେ ଅଭିଯୋଗ କରିଥିଲେ ଯେ ତାଙ୍କ ୩୭ ବର୍ଷୀୟ ସ୍ୱାମୀ ଗୌରବ ବନସଲ କଡ଼କଡ଼ଡୁମାରେ ଗ୍ରୋସରୀର ହୋଲସେଲର ଭାବରେ କାମ କରନ୍ତି । ସେ ଜୁନ୍ ୯ରେ ଦୋକାନକୁ ଯାଇଥିଲେ କିନ୍ତୁ ଆଉ ଫେରି ନଥିଲେ । ବ୍ୟବସାୟିକ କ୍ଷତି ହେତୁ ଗୌରବ ଅବସାଦ ବା ଡିପ୍ରେସନରେ ଥିଲେ । ତାଙ୍କର ଚିକିତ୍ସା ମଧ୍ୟ କରାଯାଇଥିଲା । ଚଳିତ ବର୍ଷ ଫେବୃଆରୀରେ ଗୌରବ ୬ ଲକ୍ଷ ଟଙ୍କାର ବ୍ୟକ୍ତିଗତ ଋଣ ନେଇଥିଲେ । ଯାହା ପରେ ତାଙ୍କ କ୍ରେଡିଟ୍ କାର୍ଡରୁ ତାଙ୍କ ଅଜ୍ଞାତରେ ୩.୫୦ ଲକ୍ଷ ଟଙ୍କା ଦେୟ କରାଯାଇଥିଲା । ଏହାର ସୂଚନା ମୟୂର ବିହାର ପୋଲିସ ଷ୍ଟେସନରେ ଦିଆଯାଇଥିଲା । 

ଅଭିଯୋଗରେ କୁହାଯାଇଛି ଯେ ଗୌରବଙ୍କ କାହା ସହ ଝଗଡା ନାହିଁ । ପ୍ରକାଶ ଥାଉକି, ଏହି ଅଭିଯୋଗ ଦେବା ପୂର୍ବରୁ ଜୁନ୍ ୧୦ ତାରିଖ ସକାଳ ପ୍ରାୟ ସାଢ଼େ ୮ଟା ବେଳେ ବାହାର ଦିଲ୍ଲୀର ରାଣାହୁଲା ଅଞ୍ଚଳରେ ଥିବା ଏକ ହ୍ରଦ ନିକଟରେ ଥିବା ଏକ ଗଛରେ ଗୌରବ ବନସଲଙ୍କ ମୃତଦେହ ଝୁଲୁଥିବା ଦେଖିବାକୁ ମିଳିଥିଲା । ତାଙ୍କ ଦୁଇ ହାତ ପଛରେ ବନ୍ଧା ହୋଇଥିଲା ।

Add Zee News as a Preferred Source