କୁଖ୍ୟାତ ଏଟିଏମ ଲୁଟେରା ସମ୍ଭବ ଆଚାର୍ଯ୍ୟ ଗିରଫ

ସରୋଜ ବେହେରା, ଭୁବନେଶ୍ୱର:-କମିଶନରେଟ ପୋଲିସ ହାତରେ ଲାଗିଛି କୁଖ୍ୟାତ ଏଟିଏମ ଲୁଟେରା (ATM Lootera) ସମ୍ଭବ ଆଚାର୍ଯ୍ୟ (Sambhav Acharya ) । ତାଙ୍କ ନିକଟରୁ ୪୨ ହଜାର ଟଙ୍କା ଓ ଏଟିଏମ କାର୍ଡ ଜବତ ହୋଇଛି । ଭୁବନେଶ୍ୱର ଇନଫୋସିଟି ଥାନା ଅଂଚଳରେ ଏଟିଏମରୁ ଲୁଟ୍ ଅଭିଯୋଗ ପରେ ସ୍ପେଶାଲ ସ୍କ୍ୱାଡ ପୋଲିସ ତାଙ୍କୁ ଗିରଫ କରିଛି । ସମ୍ଭବ ନାଁରେ ଓଡିଶା ତଥା ଓଡିଶା ବାହାର ରାଜ୍ୟରେ ଏକାଧିକ ଏଟିଏମ ଲୁଟ୍ ମାମଲା ରହିଛି । ୨୦୧୮ରେ ମୁମ୍ବାଇର ସାକିନାକା ଅଂଚଳରୁ ମହାରାଷ୍ଟ୍ର ପୋଲିସ ତାଙ୍କୁ ଗିରଫ କରିଥିବା ବେଳେ ପୂର୍ବରୁ ତାଙ୍କୁ କମିଶନରେଟ ପୋଲିସ ୨୦୧୭ରେ ସ୍ପେଶାଲ ସ୍କ୍ୱାଡ଼ ସମ୍ଭବକୁ ଗିରଫ କରିଥିଲା । ସମ୍ଭବଙ୍କ ଗିରଫଦାରୀ ପରେ ଲୋକଙ୍କ ଅସାବଧାନତା ଯୋଗୁ ଏ ସବୁ ଲୁଟ୍ ହେଉଥିବା ପୋଲିସ ଜାଣିବାକୁ ପାଇଛି ।  

ଏଟିଏମରୁ ଟଙ୍କା ବାହାର କରୁଛନ୍ତି କି । ତା ହେଲେ ହୋଇ ଯାଆନ୍ତୁ ସାବଧାନ । ଏଟିଏମ ହ୍ୟାକର ଆପଣଙ୍କ ଆକାଉଣ୍ଟ ଉପରେ ରଖିଥାଇପାରେ ନଜର । ଯେତେ ବେଳେ ବି ଟଙ୍କା ବାହାର କରୁଛନ୍ତୁ ସାବଧାନ ରୁହନ୍ତୁ ନେଚେତ ଏଟିଏମ ଲୁଟେରାଙ୍କ ଜାଲରେ ପଡି ଆପଣ ବି ହୋଇ ପାରନ୍ତି ସର୍ବହରା । ଏଭଳି ଜଣେ କୁଖ୍ୟାତ ଏଟିଏମ ଲୁଟେରାଙ୍କୁ ଧରିବାରେ ସଫଳ ହୋଇଛି କମିଶନରେଟ ପୋଲିସର ସ୍ପେଶାଲ ସ୍କ୍ବାଡ । ଗିରଫ ଅଭିଯୁକ୍ତ ଆଉ କେହି ନୁହଁ ପୂର୍ବରୁ ମୋଷ୍ଟ ୱାଣ୍ଟେଡ ଥିବା ସମ୍ଭବ ଆଚାର୍ଯ୍ୟ । ଦୁଇ ବର୍ଷ ତଳେ ମୁମ୍ବାଇର ସାକିନାକା ଅଂଚଳରୁ ଗିରଫ ହେବା ପରେ ଚର୍ଚ୍ଚାକୁ ଆସିଥିଲେ ସମ୍ଭବ । ସାକିନାକା ସମେତ ବାନ୍ଦ୍ରା, ସାଣ୍ଟାକ୍ରୁଜ, ବୋରିବଲି, ଅନ୍ଧେରି ଭଳି ଅଂଚଳରେ ଲୁଟ କରିବା ପରେ ଗିରଫ ହୋଇଥିଲା ସମ୍ଭବ । ୨ ମାସ ତଳେ ଇନଫୋସିଟି ଥାନା ଅଂଚଳରେ ଜଣେ ବରିଷ୍ଠ ନାଗରିକଙ୍କ ଏଟିଏମରୁ ଟଙ୍କା ନେବା ପରେ ସିସିଟିଭିରେ କଏଦ ହୋଇଥିଲା ସମ୍ଭବଙ୍କ ଫୁଟେଜ । ସେବେଠାରୁ କମିଶନରେଟ ପୋଲିସର ସ୍ୱତନ୍ତ୍ର ଟିମ୍ ସମ୍ଭକକୁ ଧରିବା ପାଇଁ ଜୋର ଲଗାଇ ଦେଇଥିଲା ।  

ଅଧିକ ପଢ଼ନ୍ତୁ:-ଉତ୍ତର ପ୍ରଦେଶରେ କଂଗ୍ରେସକୁ ମଜଭୁତ କରିବା ପାଇଁ ଗୁପ୍ତ ଭାବେ ଏହି କାମ କରୁଛନ୍ତି ପ୍ରିୟଙ୍କା

ସମ୍ଭବଙ୍କ ଏଟିଏମ ଲୁଟ କରିବା ତରିକା ମଧ୍ୟ ପୁରା ସିଧାସାଧା । ଏଟିଏମ ଭିତରେ ରହି ପୂର୍ବରୁ ସମ୍ଭବ ନିଜ ଶୀକାରକୁ ଅପେକ୍ଷା କରିଥାଏ । ବିଶେଷ କରି ମହିଳା, ଯୁବତୀ ଓ ବୟୋଜେଷ୍ଠ ବ୍ୟକ୍ତିଙ୍କୁ ସେ ଟାର୍ଗେଟ କରିଥାଏ । ଗ୍ରାହକ ଭିତରେ ପଶିବା ପରେ କାର୍ଡ ପୁରେଇବା ପରେ ମେଶିନ ଖରାପ ଥିବା କହି ସମ୍ଭବ ଲୋକଙ୍କ ସିକ୍ରେଟ ପିନ କୋଡ ଜାଣିପାରିଥାଏ । ଏହା ପୂର୍ବରୁ ସେ ଏଟିଏମରେ କୌଣସି ଏକ ଚିପ ଲଗାଇ ଦେଇଥାଏ । ଗ୍ରାହକ ସେଠାରୁ ଫେରିବା ପରେ କ୍ଷଣିକ ମଧ୍ୟରେ ଭିତରେ ଥିବା ଚିପ ଜରିଆରେ ଟଙ୍କା ବାହାର କରି ନେଇଥାଏ । ଗତ ମେ ମାସରେ ଏଭଳି ଏକ ଘଟଣାରେ ଜଣେ ଯୁବତୀଙ୍କ ଆକାଉଣ୍ଟରୁ ୩୦ ହଜାର ଟଙ୍କା ନେଇ ଫେରାର ହେବାରେ ସଫଳ ହୋଇଥିଲା ସମ୍ଭବ । ଟଙ୍କା କେହି ବାହାର କରି ନେଇଥିବା ଜାଣି ଯୁବତୀ ଜଣକ ପ୍ରତିବାଦ କରିବାରୁ ତାଙ୍କ ଧକ୍କା ମାରି ଫେରାର ହୋଇଯାଇଥିଲା ସମ୍ଭବ । 

ସମ୍ଭବ ଆଚାର୍ଯ୍ୟଙ୍କ ନାଁରେ ପ୍ରାୟ ୬ଟି ରାଜ୍ୟରେ ଏଟିଏମ ଲୁଟ ମାମଲା ରହିଥିବା ଜଣାପଡିଛି । ପୂର୍ବରୁ ୨୦୧୭ରେ ଆଇନକ୍ସ ନିକଟରୁ ପୋଲିସ ତାଙ୍କୁ ଗିରଫ କରିଥିଲା । ଜେଲରୁ ବାହାରିବା ପରେ ସେ ପ୍ରଥମେ ଗୁଜରାଟ ଓ ପରେ ମହାରାଷ୍ଟ୍ର ଯାଇ ଲୁଟ ଆରମ୍ଭ କରିଦେଇଥିଲା । ସେଠାରେ ବାରମ୍ବାର ଗିରଫ ହେବା ପରେ ପୁଣି ଓଡିଶା ଫେରି ଏଟିଏମ ଲୁଟ ଶିକାର ଆରମ୍ଭ କରିଦେଇଛି । ସେପଟେ ଲୋକଙ୍କୁ ବାରମ୍ବାର ସଚେତନ କରିବା ପରେ ବି ବାରମ୍ବାର ଏଭଳି ଘଟଣା ଘଟିବା ବ୍ୟଙ୍କର ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।