ନିଖୋଜ ବିନୋଦଙ୍କ ନଗ୍ନ ମୃତଦେହ ଉଦ୍ଧାର

ଗଜପତି: ଶେଷରେ ମିଳିଲା ବିନୋଦ ଜେନା ଓରଫ ଅମୂଲ୍ୟଙ୍କ ମୃତଦେହ। ନଗ୍ନ ଅବସ୍ଥାରେ ପାରଳାଖେମୁଣ୍ଡି ଥାନା ଅନ୍ତର୍ଗତ ସିଧାମଡଙ୍ଗ ନିକଟ ଏକ ଆମ୍ବତୋଟାରୁ ତାଙ୍କର ମୃତଦେହକୁ ଉଦ୍ଧାର କରାଯାଇଛି। ୪ ଦିନ ପୂର୍ବେ ସେ ହସ୍ପିଟାଲରୁ ନିଖୋଜ ହୋଇଯାଇଥିବା ନେଇ ଥାନାରେ ରିପୋର୍ଟ ଲେଖାଯାଇଥିଲା।

ଗୁରାଣ୍ଡି (Gurandi) ଅନ୍ତର୍ଗତ ମହାଦେଇପୁର ଗ୍ରାମରେ ୪୦ ବର୍ଷୀୟ ମୃତ ବିନୋଦଙ୍କ ଘର। ଅସୁସ୍ଥତା ଯୋଗୁଁ ତାଙ୍କୁ ପାରଳାଖେମୁଣ୍ଡି ମେଡିକାଲ (Paralakhemundi hospital) ରେ ଭର୍ତ୍ତି କରାଯାଇଥିଲା। ଅଧିକ ଚିକିତ୍ସା ପାଇଁ ଡାକ୍ତର ବିନୋଦଙ୍କୁ ବ୍ରହ୍ମପୁର (MKCG) ରେଫେର କରିଥିଲେ। ଆଉ ଏହାରି ପରେ ସେ ୪ ଦିନ ପୂର୍ବେ ହଠାତ ହସ୍ପିଟାଲରୁ ନିଖୋଜ ହୋଇଯାଇଥିଲେ।

ବିନୋଦଙ୍କ ନିଖୋଜ ହେବା ନେଇ ପାରଳାଖେମୁଣ୍ଡି ଥାନା (Paralakhemundi Police) ରେ ରିପୋର୍ଟ ଲେଖାଯାଇଥିଲା। ବିଭିନ୍ନ ସ୍ଥାନରେ ବିନୋଦଙ୍କ ନିଖୋଜ ପୋଷ୍ଟର (Missing Poster) ମଧ୍ୟ ଲଗାଯାଇଥିଲା। କିନ୍ତୁ ବୁଧବାର ତାଙ୍କର ମୃତଦେହ ସିଧାମଡଙ୍ଗ ନିକଟ ଏକ ଆମ୍ବତୋଟାରୁ ମିଳିଛି। ବିନୋଦ ମୁହଁମାଡି ପଡିଥିବା ବେଳେ ତାଙ୍କ ମୁହଁରେ କ୍ଷତ ହୋଇଛି। ପାରିପାର୍ଶ୍ୱୀକ ସ୍ଥିତିରୁ ଏହା ଏକ ହତ୍ୟା ଭଳି ସନ୍ଦେହ କରାଯାଇଛି। ତେବେ ରୋଗରୁ ବିନୋଦଙ୍କ ମୃତ୍ୟୁ ହୋଇଥାଇ ପାରେ ବୋଲି ମଧ୍ୟ ଅନୁମାନ କରାଯାଉଛି। 

ସେପଟେ ପାରଳାଖେମୁଣ୍ଡି ପୋଲିସ ମୃତଦେହକୁ ଜବତ କରି ପୋଷ୍ଟମର୍ଟମ ପାଇଁ ପଠାଇଛି। ପ୍ରାଥମିକ ପର୍ଯ୍ୟାୟରେ ଅପମୃତ୍ୟୁ ମାମଲା ରୁଜୁକରି ତଦନ୍ତ ଆରମ୍ଭ କରିଛି। ତବେ ପୋଷ୍ଟମର୍ଟମ ରିପୋର୍ଟ ଆସିଲା ପରେ ମୃତ୍ୟୁର କାରଣ ଜଣା ପଡିବା ସହ ତଦନ୍ତକୁ ନୂଆ ଦିଗ ମିଳିବ ବୋଲି ପୋଲିସ କହିଛି। ଅନ୍ୟପଟେ ନିଖୋଜ ରିପୋର୍ଟ (Missing Reports) ଲେଖାଯିବା ପରେ ମଧ୍ୟ ପୋଲିସ କେମିତି ବିନୋଦଙ୍କୁ ଖୋଜି ପାଇଲା ନାହିଁ ବୋଲି ସାଧାରଣରେ ପ୍ରଶ୍ନ ଉଠୁଛି।