ଚାକିରି ଲୋଭରେ ବାପାଙ୍କୁ ହତ୍ୟା କଲା ପୁଅ

କରିମନଗର: ତେଲେଙ୍ଗାନାର ଏକ ଗାଁରେ ଅନୁକମ୍ପା ନିଯୁକ୍ତି ପାଇବା ଲୋଭରେ ଜଣେ ଯୁବକ ନିଜ ବାପାଙ୍କୁ ହତ୍ୟା କରିଛି । ଯୁବକର ଏହି ଷଡଯନ୍ତ୍ରରେ ତାଙ୍କ ମା' ଓ ସାନ ଭାଇ ମଧ୍ୟ ସହଯୋଗ ଦେଇଥିବା ଅଭିଯୋଗ ହୋଇଛି । ପୋଲିସ ଏହି ସୂଚନା ଦେଇଛି । ପୋଲିସ କହିଛି ଯେ, ପଲିଟେକ୍ନିକରେ ଡିପ୍ଲୋମା କରିଥିବା ୨୫ ବର୍ଷ ବୟସ୍କ ଯୁବକ ତାଙ୍କ ବାପାଙ୍କୁ ମୁହଁ ଚାପି ହତ୍ୟା କରିଥିଲେ । ମା' ନିଖୋଜ ଥିବା ବେଳେ ଉଭୟ ପୁଅଙ୍କୁ ପୋଲିସ ଗିରଫ କରିଛି । ଏହାସହ ପୋଲିସ ଦୁଇଟି ମୋବାଇଲ୍ ଫୋନ୍ ଏବଂ ଅପରାଧରେ ବ୍ୟବହୃତ ଟାୱେଲ୍ ଉଦ୍ଧାର କରିଛି ।

ପୋଲିସ ଅନୁସାରେ, ଯୁବକଙ୍କର ବାପା ପେଡାପାଲ୍ଲୀ ଜିଲ୍ଲାର ଗୋଦାବରୀଖାନୀରେ ଥିବା ସରକାରୀ ସଙ୍ଗାରେନି କୋଇଲା ଖଣିରେ ଏକ ପମ୍ପ ଅପରେଟର ଥିଲେ । ଅନୁକମ୍ପା ଆଧାରରେ ନିଯୁକ୍ତି ପାଇବା ପାଇଁ ୩ ଜଣ ଷଡ଼ଯନ୍ତ୍ର କରିଥିଲେ । ବଡ ପୁଅ ରାତିରେ ବାପାଙ୍କୁ ହତ୍ୟା କରିଥିଲା ​​। ପରଦିନ ପରିବାର ସମସ୍ତଙ୍କୁ କହିଥିଲେ ଯେ ସେ ହୃଦଘାତରେ ମୃତ୍ୟୁ ବରଣ କରିଛନ୍ତି ଓ ଅନ୍ତିମ ସଂସ୍କାର ପାଇଁ ପ୍ରସ୍ତୁତି ଆରମ୍ଭ କରିଦେଇଥିଲେ ।

କିଛି ଲୋକଙ୍କୁ ସନ୍ଦେହ ହୋଇଥିଲା । ପୁଅକୁ ଚାପ ପକାଇ ପୋଲିସକୁ ଜଣାଇବା ପରେ ମୃତଦେହକୁ ପୋଷ୍ଟମର୍ଟମ ପାଇଁ ପଠାଯାଇଥିଲା । ଏହାସହ ତଦନ୍ତ ଆରମ୍ଭ ହୋଇଥିଲା । ପୋଲିସ ଅନୁସନ୍ଧାନରୁ ଜାଣିବାକୁ ପାଇଲା ଯେ, ଯୁବକ ଜଣକ ଯୋଜନା କରିଥିଲେ । ତାଙ୍କ ମା ଓ ଭାଇ ଏଥିରେ ସମ୍ମତି ଜଣାଇଥିଲେ । ଯାହା ପରେ ଯୁବକ ଏହି ଘଟଣା ଘଟାଇଥିଲେ । ସରକାରୀ ସଙ୍ଗାରେନି କୋଇଲା ଖଣିରେ ଚାକିରୀ ପାଇବା ପାଇଁ ଯୁବକ ନିଜ ବାପାଙ୍କୁ ହତ୍ୟା କରିଥିବା ଶନିବାର ରାମଗୁଣ୍ଡ ପୋଲିସ କମିଶନର ଭି ସତ୍ୟନାରନ୍ କହିଛନ୍ତି । ସେ କହିଛନ୍ତି ଯେ ଏହି ତିନିଜଣଙ୍କ ବିରୋଧରେ ଏକ ମାମଲା ରୁଜୁ ହୋଇଛି ।

Add Zee News as a Preferred Source