ଲଭ, ସେକ୍ସ ଓ ଧୋକା: ଗର୍ଭପାତ କରାଇ ବନ୍ଧାହେଲେ ପ୍ରେମିକ ଓ କ୍ଲିନିକ ମାଲିକ

ପ୍ରିୟବ୍ରତ ସାହୁ, କନ୍ଧମାଳ: ଲଭ, ସେକ୍ସ ଓ ଧୋକାକୁ ନେଇ ଆଉ ଏକ ଅଭିଯୋଗ ଆସିଛି କନ୍ଧମାଳ ଜିଲ୍ଲାରୁ । ୭ ବର୍ଷ ପୂର୍ବରୁ ଆରମ୍ଭ ହୋଇଥିଲା ପ୍ରେମ କାହାଣୀ । ହେଲେ ପ୍ରେମିକାଙ୍କୁ ଧୋକା ଦେଇ ଅନ୍ୟ ଏକ ଯୁବତୀଙ୍କୁ ଦେଢ଼ ବର୍ଷ ତଳେ ବିବାହ କରିଥିଲା ଯୁବକ । କିନ୍ତୁ ନିଜର ପ୍ରଥମ ଭଲ ପାଇବାକୁ ଭୁଲି ନ ପାରି ଧମକ ଦେଇ ପ୍ରେମିକାଙ୍କ ସହ ଶାରୀରିକ ସମ୍ପର୍କରେ ରଖିଥିଲା । ଆଉ ପରବର୍ତ୍ତୀ ସମୟରେ ପ୍ରେମିକା ଗର୍ଭବତୀ ହେବା ପରେ ଗର୍ଭ ନଷ୍ଟ କରାଇଥିଲା ଅଭିଯୁକ୍ତ ଯୁବକ । ଶେଷରେ ଧୋକା ଦେଇ ଅଭିଯୁକ୍ତ ଚାଲିଯିବା ପରେ ନ୍ୟାୟ ପାଇଁ ପୀଡ଼ିତା ଥାନାର ଦ୍ୱାରାସ୍ତ ହୋଇଛନ୍ତି । ଆଉ ବନ୍ଧା ହୋଇଛି ଅଭିଯୁକ୍ତ ପ୍ରେମିକ ସହ ଗର୍ଭପାତ କରାଇଥିବା କ୍ଲିନିକ ମାଲିକ ।

ସୂଚନା ଅନୁସାରେ, କନ୍ଧମାଳ ଜିଲ୍ଲା ଦାରିଙ୍ଗବାଡି ଥାନା ଅଞ୍ଚଳର ୨୨ ବର୍ଷୀୟା ପୀଡ଼ିତା ୭ ବର୍ଷ ହେଲା ସ୍ଥାନୀୟ ଲାଇନପଡ଼ା ଗ୍ରାମର ଅଭିଯୁକ୍ତ ଆକାଶ ପ୍ରଧାନ ନାମକ ସହ ସମ୍ପର୍କ ରଖିଥିଲେ । ଉଭୟ ପରସ୍ପରକୁ ବେଶ ଭଲ ମଧ୍ୟ ପାଉଥିଲେ । କିନ୍ତୁ ଆକାଶ ଆଜକୁ ଦେଢ଼ ବର୍ଷ ତଳେ ପୀଡ଼ିତାଙ୍କୁ ଧୋକା ଦେଇ ଅନ୍ୟ ଏକ ଯୁବତୀଙ୍କୁ ବିବାହ କରିଥିଲା । ଫଳରେ ପ୍ରେମିକ ଆକାଶଠାରୁ ସେବେଠାରୁ ଦୂରେଇ ଯାଇ ଭୁବନେଶ୍ୱରର ନିଜ ଭାଇଙ୍କ ପାଖକୁ ଚାଲିଯାଇଥିଲେ ପୀଡ଼ିତା । 

ଏତିକିରେ ସରିନଥିଲା କାହାଣୀ । କୋରୋନା ପାଇଁ ଲକଡାଉନ ଜାରି ହେବାରୁ ଗତ ମାର୍ଚ୍ଚ ୨୦ ତାରିଖରେ ପୀଡ଼ିତା ପୁଣି ନିଜ ଗାଁକୁ ଚାଲିଆସିଲେ । ଆଉ ଏ ଖବର ପାଇ ଆକାଶ ପୁଣି ପୁରୁଣା ପ୍ରେମିକାକୁ ଭେଟି ଜୋର ଜବରଦସ୍ତ ଧମକ ଦେଇ ସମ୍ପର୍କ ରଖିବାକୁ ବାଧ୍ୟ କରିଥିଲା । ପରବର୍ତ୍ତୀ ସମୟରେ ପୀଡ଼ିତା ଗର୍ଭବତୀ ମଧ୍ୟ ହୋଇଥିଲେ । କିନ୍ତୁ ଲଜ୍ଜାରେ ନିଜ ପରିବାର ଲୋକଙ୍କୁ ମଧ୍ୟ ଜଣାଇ ନ ଥିଲେ । ଅନ୍ୟପଟେ ପୀଡ଼ିତାଙ୍କ ଗର୍ଭନଷ୍ଠ କରାଇଥିଲା ଆକାଶ । 

ପୀଡ଼ିତା ନିଜ ଭଉଣୀଙ୍କ ଘର ଦାରିଙ୍ଗବାଡି ବସଷ୍ଟାଣ୍ଡରେ ଆସି ରହୁଥିଲେ । ଗତ ୧୪ ତାରିଖ ଦିନ ଆକାଶ ଜଣେ କ୍ଲିନିକ ବାଲାକୁ ନେଇ ପୀଡ଼ିତାଙ୍କ ଭଉଣୀ ଘରେ ପହଞ୍ଚିଥିଲା । ପୀଡ଼ିତାଙ୍କୁ ୩ ଟି ଇଞ୍ଜେକ୍ସନ ଓ ଦୁଇଟି ଟାବଲେଟ ଖାଇବାକୁ ଦେଇଥିଲା । ଏହା ସହ ପୁଣି ୧୬ ତାରିଖ ଦିନ ସେହି କ୍ଲିନିକ ବାଲାକୁ ଆକାଶ ଆଣି ଦୁଇଟି ଇଞ୍ଜେକ୍ସନ ଓ ଦୁଇଟି ଟାବଲେଟ ଖାଇବାକୁ ଦେଇଥିଲା । ଫଳରେ ପୀଡ଼ିତାଙ୍କ ଗର୍ଭ ନଷ୍ଟ ହେବା ସହ ସେ ଗୁରୁତର ଅସୁସ୍ଥ ହୋଇପଡ଼ିଥିଲେ । ସଙ୍ଗେ ସଙ୍ଗେ ତାଙ୍କୁ ଆକାଶ ଦାରିଙ୍ଗବାଡ଼ି ମେଡିକାଲରେ ଭର୍ତ୍ତି କରାଇଥିଲା ।

ଆଉ ଏବେ ପୀଡ଼ିତା ଜଣକ ନ୍ୟାୟ ଦାବି କରି ଦାରିଙ୍ଗବାଡି ଥାନାର ଦ୍ୱାରାସ୍ତ ହୋଇଛନ୍ତି । ଅଭିଯୁକ୍ତ ଆକାଶକୁ ଦଣ୍ଡ ଦିଆଯାଉ ନଚେତ ମୁଁ ଆତ୍ମହତ୍ୟା କରିବି ବୋଲି କହିଛନ୍ତି ପୀଡ଼ିତା । ଦାରିଙ୍ଗବାଡ଼ି ପୋଲିସ ମହିଳାଙ୍କ ଅଭିଯୋଗ ଅନୁଯାଇ ୮୧/୨୦ ମାମଲା ରୁଜୁ କରିବା ସହ ତଦନ୍ତ କରିଥିଲା । ଅଭିଯୁକ୍ତ ଆକାଶ ପ୍ରଧାନ ଏବଂ କ୍ଲିନିକ ମାଲିକ ଅଶୋକ ସାହୁକୁ ଗିରଫ କରି କୋର୍ଟ ଚାଲାଣ କରାଯାଇଛି । ଏନେଇ ଥାନା ଅଧିକାରୀ କୌଶିକ ମାଝୀ ସୂଚନା ଦେଇଛନ୍ତି ।