ବିକାଶ ଦୁବେ ମାମଲାରେ ଆସିଲା ଚାଞ୍ଚଲ୍ୟକର ତଥ୍ୟ

ନୂଆଦିଲ୍ଲୀ: ଗ୍ୟାଙ୍ଗଷ୍ଟାର ବିକାଶ ଦୁବେ ମାମଲାରେ ବଡ଼ ଖୁଲାସା କରିଛି ୟୁପି ପୋଲିସ । ପୋଲିସ ତଦନ୍ତରୁ ବେଶ୍ ଗୁରୁତ୍ୱପୂର୍ଣ୍ଣ ଓ ସାଙ୍ଘାତିତ ତଥ୍ୟ ସାମ୍ନାକୁ ଆସିଛି । ବିକାଶ ଦୁବେ ଗ୍ୟାଙ୍ଗରେ ସାମିଲ ଥିଲେ ୨ ବହିଷ୍କୃତ ପୋଲିସ କର୍ମଚାରୀ । ଏମାନେ କଳାସାମ୍ରାଜ୍ୟ ପାଇଁ ବିକାଶକୁ ସାଥ୍ ଦେଉଥିଲେ । ୟୁପି ପୋଲିସର ଏସଟିଏଫ ଚିମ୍ ଗ୍ୟାଙ୍ଗଷ୍ଟାରର କଲ ରେକର୍ଡରୁ ଏଭଳି କିଛି ପ୍ରମାଣ ପାଇଛି । 

ତଦନ୍ତରୁ ଏକଥା ଜଣାପଡ଼ିଛି ଯେ, ଉଭୟ ବହିଷ୍କୃତ ପୋଲିସ କର୍ମଚାରୀ ଘଟଣା ଦିନ(ବିକାଶ ଦୁବେ ଗାଁରେ ହୋଇଥିବା ହମଲା) ଉପସ୍ଥିତ ନଥିଲେ । କିନ୍ତୁ ପୋଲିସର କାମ କରିବାର ତରିକା, ପୋଲିସ ବିଷୟରେ ସୂଚନା ଓ ଅନ୍ୟ କ୍ଷେତ୍ରରେ ବିକାଶ ଦୁବେକୁ ଏମାନେ କେତେଥର ସାହାଯ୍ୟ କରିଥିଲେ । ବେଆଇନ ଅସ୍ତ୍ରଶସ୍ତ୍ର କେଉଁଠୁ ମିଳିବ, ସେନେଇ ମଧ୍ୟ ବିକାଶ ଦୁବେକୁ ଜଣାଉଥିଲେ । କହିବାକୁ କଲେ, ଗ୍ୟାଙ୍ଗଷ୍ଟାରର କଳାସାମ୍ରାଜ୍ୟ ବିସ୍ତାର ପାଇଁ ପୁରା ସହଯୋଗ କରୁଥିଲେ ୨ ବହିଷ୍କୃତ ପୋଲିସ କର୍ମଚାରୀ । 

ୟୁପି ଏସଟିଏଫ ବିକାଶ ଦୁବେର CDRରୁ ଦୁଇ ବହିଷ୍କୃତ ପୋଲିସ କର୍ମଚାରୀଙ୍କୁ ନେଇ ଏଭଳି ସାଂଘାତିକ ପ୍ରମାଣ ପାଇଛି । ଉଭୟଙ୍କ ମୋବାଇଲ ନମ୍ବର ବିକାଶ ଦୁବେର CDRରୁ ମିଳିଛି । ଏସଟିଏଫ ଅଧିକ ତଦନ୍ତ ମଧ୍ୟ ଜାରିରଖିଛି । ଅନ୍ୟ କେଉଁ କେଉଁ ପୋଲିସ କର୍ମଚାରୀ ଏହି ଗ୍ୟାଙ୍ଗଷ୍ଟାର ସହ ଜଡ଼ିତ ଥିଲେ, ସେନେଇ ମଧ୍ୟ ତଦନ୍ତ ଚାଲିଛି । 

କେମିତି ଚାଲିଛି ତଦନ୍ତ ?

ବିକାଶ ଦୁବେ ଗ୍ୟାଙ୍ଗରେ ସାମିଲ ଥିବା ଲୋକଙ୍କୁ ଧରିବାପାଇଁ ଏସଟିଏଫ ଟିମ୍ ଧରପଗଡ଼ ଚଲାଇଛି । ବିକାଶର CDRରୁ ୨ ସନ୍ଦିଗ୍ଧଙ୍କ ନମ୍ବର ମିଳିଥିଲା । ପରେ ଜଣାପଡ଼ିଥିଲା, ଉଭୟ ୟୁପି ପୋଲିସର ବହିଷ୍କୃତ କର୍ମଚାରୀ । ଉଭୟଙ୍କୁ କିଛି ବର୍ଷ ପୂର୍ବରୁ ହିଁ ୟୁପି ପୋଲିସ ବାହାର କରିଦେଇଥିଲା । ତେବେ ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ଦୁଇ ବହିଷ୍କୃତ ପୋଲିସ କର୍ମଚାରୀ ଏବେ କେଉଁଠି ଅଛନ୍ତି ସେନେଇ କୌଣସି ସୂଚନା ମିଳିପାରିନାହିଁ । କିନ୍ତୁ ବିକାଶ ଦୁବେ ସହ ଏମାନଙ୍କର ଅନେକ ଥର ବାର୍ତ୍ତାଳାପ  ହୋଇଥିବା ଏବେ ପୋଲିସ ଜାଣିବାକୁ ପାଇଛି । ଆଉ ଉଭୟଙ୍କୁ ଧରିବା ପାଇଁ ଉଦ୍ୟମ ଆରମ୍ଭ ହୋଇଛି । କୁହାଯାଉଛି, ପୋଲିସ ବିଭାଗରୁ ବହିଷ୍କୃତ ହେବା ପରେ ଏମାନେ ପ୍ରତିଶୋଧ ପରାୟଣ ହୋଇଥିଲେ । 

ବିକାରୁ ଗାଁରେ ପୋଲିସ ଟିମ୍ ଉପରେ ହମଲା ପୂର୍ବରୁ ଉଭୟ ବହିଷ୍କୃତ ପୋଲିସ କର୍ମଚାରୀ ଅନେକ ଥର ବିକାଶ ଦୁବେ ସହ ବାର୍ତ୍ତାଳାପ କରିଥିଲେ । ଏହାରପ ପ୍ରମାଣ ଏସଟିଏଫ ହାତରେ ଲାଗିଛି । ଯାହା ଜଣାପଡ଼ିଛି, ବିକାଶ ସହ ଉଭୟଙ୍କ ସମ୍ପର୍କ ଦୀର୍ଘ ବର୍ଷ ଧରି ରହିଆସିଛି । ତେଣୁ କଲ ରେକର୍ଡକୁ ଗୋଟି ଗୋଟି କରି ତଦନ୍ତ କରାଯାଉଛି । 

ଜଣେ ପୋଲିସ ଅଧିକାରୀ କହିଛନ୍ତି, ଉଭୟ ବହିଷ୍କୃତ ପୋଲିସ କର୍ମଚାରୀଙ୍କ ଏବେ ଅନୁସନ୍ଧାନ କରାଯାଉଛି । ଉଭୟଙ୍କୁ ଗିରଫ କରିବା ପରେ ଆହୁରି ଅନେକ ତଥ୍ୟ ସାମ୍ନାକୁ ଆସିପାରେ । ବିକାଶ ଦୁବେର ପୁରା ନେଟୱାର୍କ ଉପରେ ଖୁଲାସା କରିବ ୟୁପି ପୋଲିସ ।