ପୋଲିସରେ ଚାକିରି, ଡ୍ୟୁଟି ସରିଲେ ମାସ୍କ ତିଆରି

ଚିନମ ଜଗନ୍ନାଥ ପାତ୍ର, କଟକ: କୋରୋନା ମୁକାବିଲା କରୁଛି ଦେଶ । ଆଉ ଏନେଇ ସାମାଜିକ ଦୂରତାର ଆବଶ୍ୟକତା ରହିଛି । ଏହି ଦୂରତା ସହିତ ବିଭିନ୍ନ ସ୍ଥାନରେ ଲୋକେ ମାସ୍କର ବ୍ୟବହାର ଅଧିକା କରିବା ପାଇଁ ପରାମର୍ଶ ଦିଆଯାଉଛି । ଅନେକ ବେସାହାରା ଲୋକଙ୍କ ପାଖରେ ଏହି ମାସ୍କ ଯୋଗାଇବା ପାଇଁ ଏବେ ନୂଆ ବାଟ ଆପଣାଇଛନ୍ତି କଟକ ଆରପିଏଫର କନଷ୍ଟେବଳ କମଳ ଲୋଚନ ମହନ୍ତ । ନିଜ ହାତରେ ମାସ୍କ ତିଆରି କରୁଛନ୍ତି କମଲ । ଗୁରୁତ୍ୱପୂର୍ଣ୍ଣ କଥା ହେଉଛି, ଡ୍ୟୁଟି ପରେ କମଲ ସମୟ ବାହାର କରି ମାସ୍କ ତିଆରି କରୁଛନ୍ତି । 

ନାଁ କମଳ ଲୋଚନ ମହନ୍ତ । ବୃର୍ତ୍ତିରେ ପୋଲିସ । କଟକ ଆରପିଏଫ କାର୍ଯ୍ୟାଳୟରେ ସେ କନଷ୍ଚେବଳ ଅଛନ୍ତି । କଟକ ଷ୍ଟେସନରେ ନିଜ ଡ୍ୟୁଟି କରିବା ସମୟରେ ଅନେକ ଅସହାୟ  ଲୋକଙ୍କୁ ଦେଖିବାକୁ ପାଇଥାନ୍ତି । ଏହି ଲୋକଙ୍କୁ ମାସ୍କ ଯୋଗାଇବା ପାଇଁ ପ୍ରଥମେ ଥାନା ଅଧିକାରୀଙ୍କୁ ଅବଗତ କରାଇଥିଲେ କମଳ । ଥାନା ଅଧିକାରୀ କମଳଙ୍କ ଏହି ଚିନ୍ତାଧାରାକୁ ସ୍ୱାଗତ କରିବା ପରେ ଆରପିଏଫର ସମସ୍ତ କର୍ମଚାରୀଙ୍କ ପାଖରୁ କିଛି ଟଙ୍କା କଲେକ୍ସନ କରି କପଡା ଓ ସୂତା କିଣିଲେ । ଏହାପରେ ମାସ୍କ ପ୍ରସ୍ତୁତି କାର୍ଯ୍ୟ ଆରମ୍ଭ କରିଥିଲେ । ଡ୍ୟୁଟି ପର ସମୟରେ ଦେଖୁଦେଖୁ ନିଜ ହାତରେ ପ୍ରସ୍ତୁତ କରିସାରିଲେଣି ୩ଶହରୁ ଉର୍ଦ୍ଧ୍ୱ ମାସ୍କ । ଆହୁରି ଏବେ ବି ମାସ୍କ ପ୍ରସ୍ତୁତି ପ୍ରକ୍ରିୟା ଜାରି ରହିଛି ।

ଆରପିଏଫର କନଷ୍ଟେବଳ ଭାବେ କଟକ ଷ୍ଟେସନରେ ଅଧିକା ସମୟ ଦେବାକୁ ପଡ଼ିଥାଏ । ଏଥିପାଇଁ ଧାର୍ଯ୍ୟ ଡ୍ୟୁଟିକୁ କୌଣସି ମତେ ଖିଲାପ ବି କରନ୍ତି ନାହିଁ । ଏହି ଗୁରୁଦାୟିତ୍ୱ ଶେଷ ହେବା ପରେ ସମୟ ବାହାର କରି ମାସ୍କ ପ୍ରସ୍ତୁତ କରୁଛନ୍ତି । ନିଜ ଘରେ ରହିଥିବା ଏକ ସିଲେଇ ମେସିନ ସାହାର୍ଯ୍ୟରେ ଲାଗି ପଡିଥାନ୍ତି ମାସ୍କ ପ୍ରସ୍ତୁତିରେ । ଲକ୍‌ଡାଉନ ସମୟରେ କପଡା , ସୂତା କିଣିବା କଷ୍ଟକର ହୋଇଥିଲେ ମଧ୍ୟ କିଛି ସ୍ଥାନରୁ ଯୋଗାଡ଼ କରିଥିଲେ କମଲ । ପରେ କିଛି ସପ୍ତାହ ହେବ ମାସ୍କ ପ୍ରସ୍ତୁତିରେ ଲାଗିପଡିଛନ୍ତି । ଏହି ମାସ୍କ ପ୍ରସ୍ତୁତିରେ କମଳଙ୍କ ସହିତ ତାଙ୍କ ଧର୍ମପନ୍ତ୍ରୀ ଓ ପଡୋଶୀ ସହଯୋଗ କରନ୍ତି ।