ଖାତା ଦେଖା କାମରେ ନିୟୋଜିକ ଶିକ୍ଷକଙ୍କୁ 'କୋରୋନା ଯୋଦ୍ଧା'ରେ ସାମିଲ କରିବାକୁ ଦାବି

ଜଗନ୍ନାଥ ପାତ୍ର, କଟକ: ଆସନ୍ତା ୨୦ ତାରିଖରେ ମାଟ୍ରିକ ଉତ୍ତରଖାତା ମୂଲ୍ୟାୟନକୁ ନେଇ ବୋର୍ଡର ନୂତନ ବ୍ୟବସ୍ଥାକୁ ଦୃଢ ଭାବେ ବିରୋଧ କରିଛି ଓଡିଶା ଶିକ୍ଷକ ମହାସଂଘ । ଖାତା ମୂଲ୍ୟାୟନ ଲାଗି ଅଧିକ ଶିକ୍ଷକ ସାଙ୍ଗକୁ ଏକ୍ସଟେନ୍ସନ ସେଣ୍ଟର ଆଦି ବ୍ୟବସ୍ଥାକୁ ନେଇ ସନ୍ତୁଷ୍ଟ ନୁହେଁ ଶିକ୍ଷକ ସଂଘ । ଖାତା ମୂଲ୍ୟାୟନରେ ନିୟୋଜିତ ଶିକ୍ଷକ ଓ ଶିକ୍ଷୟତ୍ରୀଙ୍କୁ କୋରୋନା ଯୋଦ୍ଧାରେ ସାମିଲ କରିବା ସହିତ ୫୦ ଲକ୍ଷ ଟଙ୍କାର ବୀମା ରାଶି ପ୍ରଦାନ କରିବା ପାଇଁ ଦାବି କରିଛି ସଂଘ । ତା ସହିତ ମୂଲ୍ୟାୟନ କେନ୍ଦ୍ର ବୃଦ୍ଧି ସହିତ ଅନ୍ୟୁନ ଗୋଟିଏ ବ୍ଲକରେ ଦୁଇଟି ପରୀକ୍ଷା କେନ୍ଦ୍ର କରିବା ଆବଶ୍ୟକତା ରହିଛି । 

ଏତତ୍‌ ବ୍ୟତୀତ ଗୋଟିଏ ଉତ୍ତରଖାତାକୁ ଏକାଧିକ ଶିକ୍ଷକ ଶିକ୍ଷୟତ୍ରୀଙ୍କ ବଦଳରେ ଜଣଙ୍କ ଦ୍ୱାରା ମୂ୍ଲ୍ୟାୟନ କରିବା ପାଇଁ ଦାବି କରିଛି । ଏହି ୩ଟି ଦାବି ନ ମାନିଲେ ସି.ବି.ଏସ.ଇ ଭଳି ମାଧ୍ୟମିକ ଶିକ୍ଷା ପରିଷଦ ମଧ୍ୟ ହୋମ ଇଭାଲ୍ୟୁସନ ବା ଶିକ୍ଷକ ଶିକ୍ଷୟତ୍ରୀ ଘରେ ଉତ୍ତର ଖାତା ମୂଲ୍ୟାୟନ କରିବା ଲାଗି ବ୍ୟବସ୍ଥା କରାଯାଉ ବୋଲି ଦାବି କରାଯାଇଛି । ଏହି  ଦାବି ବାବଦରେ ରାଜ୍ୟ ସରକାରଙ୍କ ନିକଟରେ ଉପସ୍ଥାପନ କରାଯାଇଥିବା ମଧ୍ୟ କୌଣସି ବିଚାର କରାଯାଉନଥିବା ଅଭିଯୋଗ କରିଛି ଶିକ୍ଷକ ସଂଘ । ଆସନ୍ତା ଦିନରେ ଏ ବାବଦରେ ସରକାର କୌଣସି ନିଷ୍ପତ୍ତି ନ ନେଲେ ଖାତା ମୂଲ୍ୟାୟନରୁ ଶିକ୍ଷକ ଶିକ୍ଷୟତ୍ରୀ ଆସହଯୋଗ କରିବେ ବୋଲି ଚେତାବନୀ ଦେଇଛି ଓଷ୍ଟା ସମ୍ପାଦକ ।

Add Zee News as a Preferred Source