କଟକ ଆଇଟିଆଇର ଉଦ୍ୟମ, 'Kiosk'ରେ କୋରୋନା ଟେଷ୍ଟ

ଜଗନ୍ନାଥ ପାତ୍ର, କଟକ: କୋରୋନା ପାଇଁ ସବୁଠି ଚିନ୍ତା । କୋରୋନା ରୋଗୀଙ୍କ ଚିହ୍ନଟ ପାଇଁ ସ୍ଲାବ ଟେଷ୍ଟ ହିଁ ଏକ ମାତ୍ର ମାଧ୍ୟମ । ଏହି ସ୍ଲାବ ସଂଗ୍ରହ ପାଇଁ ବିଭିନ୍ନ ମେଡିକାଲରେ ସ୍ୱତନ୍ତ୍ର ବ୍ୟବସ୍ଥା କରୁଛନ୍ତି ରାଜ୍ୟ ସରକାର । ତେବେ ଏହି ଟେଷ୍ଟ କରିବା ପାଇଁ ଆବଶ୍ୟକୀୟ ଭିତ୍ତିଭୂମି ସବୁ ସ୍ଥାନରେ ପହଞ୍ଚିବାର ଆବଶ୍ୟକତା ରହିଛି । ତେଣୁ ଏହି ସମସ୍ୟାକୁ ଦୂର କରିବା ପାଇଁ କଟକ ଆଇଟିଆଇ କଲେଜର ୪ଟି ବିଭାଗର ଟେକନିସିଆନମାନେ ପ୍ରସ୍ତୁତ କରିଛନ୍ତି କୋଭିଡ ନମୁନା ସଂଗ୍ରହ କିଓସ୍କ । 

କେବଳ ଯେ ମେଡିକାଲରେ ହିଁ ସ୍ଲାବ ଟେଷ୍ଟ ହେବ ତାହା ନୁହେଁ । ଏଣିକି ଆପଣଙ୍କ ପାଖରେ ବି ପହଞ୍ଚି ପାରିବ ସ୍ଲାବ ନମୁନା ସଂଗ୍ରହ କେନ୍ଦ୍ର । ଏଭଳି କିଛି ନୂଆ ସ୍ୱପ୍ନକୁ ବାସ୍ତବରେ କରି ଦେଖାଇବାରେ ସଫଳ ହୋଇଛନ୍ତି କଟକ ଆଇଟିଆଇ କଲେଜର ୪ଟି ବିଭାଗର ଟ୍ରେନିଂ ଅଫିସର । ଆଉ ଏ ହେଉଛି ସେହି ନମୁନା ସଂଗ୍ରହ କେନ୍ଦ୍ର । ଏହାର ନାଁ ରହିଛି କୋଭିଡ ନମୁନା ସଂଗ୍ରହ କିଓସ୍କୋ । ଏହି କିଓସ୍କରେ ନମୁନା ସଂଗ୍ରହ କରୁଥିବା ବ୍ୟକ୍ତି ଓ ସ୍ଲାବ ଦେଉଥିବା ବ୍ୟକ୍ତିଙ୍କ ମଧ୍ୟରେ ଯେପରି ସଂକ୍ରମଣ ସମ୍ଭାବନା ରହିବ ନାହିଁ, ତା ଉପରେ ମଧ୍ୟ ଅଧିକ ଗୁରୁତ୍ୱ ଦିଆଯାଇଛି । ଏହାର ସମ୍ମୁଖ ଭାଗରେ ଏକ ଉନ୍ନତମାନର କାଚର ସିଲ କରାଯାଇଛି । ଏହି କାଚ ମଧ୍ୟ ଭାଗରେ ଦୁଇଟି  ହାତ ଗ୍ଲୋବସ୍ ରହିଛି, ଯାହା ମାଧ୍ୟମରେ ହାତ ରଖି ନମୁନା ସଂଗ୍ରହ କରାଯିବାର ବ୍ୟବସ୍ଥା ରହିଛି । ସବୁ ଠାରୁ ବଡ କଥା ଏହି ନମୁନା କେନ୍ଦ୍ରକୁ ଗୋଟିଏ ସ୍ଥାନରୁ ଆଉ ଗୋଟିଏ ସ୍ଥାନକୁ ନେବା ଆଣିବା କରି ହେବ ।

କିଓସ୍କ ପ୍ରସ୍ତୁତ କରିବା ପାଇଁ ଡିଟିଇଟି ନିର୍ଦ୍ଦେଶକଙ୍କ ନିର୍ଦ୍ଦେଶ ଆସିବା ପରେ ଆଇଟିଆଇ କଲେଜର କାରପେଣ୍ଟର, ଇଲେକ୍ଟ୍ରିସିଆନ, ଫିଟର ଓ ପେଣ୍ଟର ବିଭାଗର ଟ୍ରେନିଂ ଅଫିସରମାନଙ୍କୁ ନେଇ ଏକ ଟିମ ଗଠନ କରାଯାଇଥିଲା । ଏହି ଟିମ ଗତ ସପ୍ତାହ ଠାରୁ କାମ ଆରମ୍ଭ କରିଥିଲା । ତେବେ ଏହି ପ୍ରଜେକ୍ଟ କରିବା ପାଇଁ ଅଧିକ ଚ୍ୟାଲେଞ୍ଜ ରହିଥିଲା ଲକଡାଉନ ସମୟରେ ସମସ୍ତ ସାମଗ୍ରୀ ସଂଗ୍ରହ କରିବା । କିଛି ସାମଗ୍ରୀ ସଂଗ୍ରହ କରିବା ସଫଳ ହେବା ସହିତ ପୂର୍ବରୁ ଥିବା ବିଭିନ୍ନ ଅନାବଶ୍ୟକ ସାମଗ୍ରୀକୁ ସଂଗ୍ରହ କରାଯାଇଥିଲା । କେଉଁ ଶୈଳୀରେ ଏହା ପ୍ରସ୍ତୁତ ହେବ ସେଥିପାଇଁ ସାଉଥ କୋରିଆର ଏକ ଭିଡିଓକୁ ଅନଲାଇନରେ ଦେଖିବା ପରେ ଆରମ୍ଭ ହୋଇଥିଲା ମରାମତି କାର୍ଯ୍ୟ । ଯଦି ସାମଗ୍ରୀ ଯୋଗାଇ ଦିଆଯାଏ, ତେବେ ଦିନକୁ ଏଭଳି ୨୦ଟି ନମୁନା ସଂଗ୍ରହ କେନ୍ଦ୍ର ପ୍ରସ୍ତୁତ କରାଯାଇପାରିବ ବୋଲି କହିଛନ୍ତି ଟିମର ଟ୍ରେନିଂ ଅଫିସର । ଏହି କିଓସ୍କୋର ଚାରିପାଖରେ କୋରୋନା ସଚେତନତା ଲାଗି ମଧ୍ୟ ଏକ ବାର୍ତ୍ତା ଯୋଡାଯାଇଛି ।

କୋରୋନାକୁ ମୁକାବିଲା କ୍ଷେତ୍ରରେ ଆଇଟିଆଇ କଲେଜର ଏଭଳି ନମୁନା ସଂଗ୍ରହ କେନ୍ଦ୍ର ଆଗକୁ ବେଶ ସଫଳ ଅର୍ଜନ କରିପାରିବ ବୋଲି ଆଶା କରାଯାଉଛି ।