ଲକଡାଉନ୍ ହଟିଲେ ଆରମ୍ଭ ହେବ ମାଟ୍ରିକ ଖାତା ଦେଖା

ଅଧାରେ ଅଟକିଛି ମୂଲ୍ୟାୟନ ପ୍ରକ୍ରିୟା

ଜଗନ୍ନାଥ ପାତ୍ର, କଟକ: ଆସନ୍ତା ସପ୍ତାହେ ମଧ୍ୟରେ ରାଜ୍ୟର ସମସ୍ତ ଜୋନରେ ପହଞ୍ଚିବ ନବମ ଓ ଦଶମ ଶ୍ରେଣୀର ଟେଷ୍ଟ ବୁକ୍‌ । ଏଥିପାଇଁ ସୋମବାରଠୁ କଟକ ବୋର୍ଡ ମୁଖ୍ୟାଳୟରୁ ସମସ୍ତ ଜୋନାଲ ସେଣ୍ଟରକୁ ବହି ଯୋଗାଇବା ପ୍ରକ୍ରିୟା ଆରମ୍ଭ ହୋଇଛି । ସେହିପରି ଅଧାରେ ଅଟକି ଥିବା ମାଟ୍ରିକ ଖାତା ମୂଲ୍ୟାୟନ ଲାଗି ସମସ୍ତ ପ୍ରସ୍ତୁତି ଶେଷ ହୋଇଛି । ଆଉ ଲକଡାଉନ୍ ସରିବା ପରେ ଏନେଇ ତାରିଖ ସ୍ପଷ୍ଟ କରାଯିବ ବୋଲି ବୋର୍ଡ ପକ୍ଷରୁ ସୂଚନା ଦିଆଯାଇଛି ।

ମାଟ୍ରିକ ଛାତ୍ରଛାତ୍ରୀଙ୍କ ପାଖରେ ନୂତନ ଟେଷ୍ଟ ବୁକ୍‌ ପହଞ୍ଚାଇବା ଲାଗି ଉଦ୍ୟମ ଆରମ୍ଭ କରିଛି ମାଧ୍ୟମିକ ଶିକ୍ଷା ପରିଷଦ । କଟକ ସ୍ଥିତ ମାଧ୍ୟମିକ ଶିକ୍ଷା ପରିଷଦରୁ ରାଜ୍ୟର ବିଭିନ୍ନ ଜୋନକୁ ବହି ଯୋଗାଣ ପ୍ରକ୍ରିୟା ଆରମ୍ଭ ହୋଇଛି । ଦଶମ ସହିତ ନବମ ଶ୍ରେଣୀର ଛାତ୍ରଛାତ୍ରୀଙ୍କ ଲାଗି ବହି ଯୋଗାଇ ଦିଆଯାଉଛି । ଏହି ସମସ୍ତ ବହି କଟକ ସେଣ୍ଟ୍ରୋଲ ଜୋନ ସହିତ ଭୁବନେଶ୍ୱର, ବାଲେଶ୍ୱର, ବ୍ରହ୍ମପୁର ଓ ସମ୍ୱଲପୁର ଜୋନକୁ ଏକ ସପ୍ତାହ ମଧ୍ୟରେ ପହଞ୍ଚିବ । ଜୟପୁର ବ୍ୟତୀତ ଅନ୍ୟାନ ସମସ୍ତ ଜୋନରେ ଲକଡାଉନ୍ ପରେ ବହି ଉପଲବ୍ଧ ହେବ । ଯଦି ଲକଡାଉନର ଅବଧି ବଢ଼େ, ତେବେ www.bseodisha.ac.in ରେ ଇ-ବୁକ୍‌ରେ ମଧ୍ୟ ଛାତ୍ରଛାତ୍ରୀ ପଢ଼ିପାରିବେ ବୋଲି ବୋର୍ଡ ସମ୍ପାଦକ କହିଛି । 

ସେହିପରି ଅଧାରେ ଅଟକି ଥିବା ମାଟ୍ରିକ ମୂଲ୍ୟାୟନ ପ୍ରକ୍ରିୟାକୁ ପୁନଃ ଆରମ୍ଭ କରିବା ପାଇଁ ପ୍ରସ୍ତୁତି କରୁଛି ମାଧ୍ୟମିକ ଶିକ୍ଷା ପରିଷଦ । ଏବେ ସୁଦ୍ଧା ସେଭଳି କୌଣସି ତାରିଖ ସ୍ପଷ୍ଟ ହୋଇ ନ ଥିବା ବେଳେ ଲକଡାଉନ୍ ପରେ ତାରିଖ ନିର୍ଦ୍ଧାରିତ କରାଯିବ ବୋଲି କହିଛନ୍ତି ସଭାପତି । ପରୀକ୍ଷା ମୂଲ୍ୟାୟନରେ ଅଧିକ ବିଳମ୍ୱ ହେଇଯାଇଥିବାରୁ ଦ୍ୱିତୀୟ ପର୍ଯ୍ୟାୟରେ ମୂଲ୍ୟାୟନକୁ ଶୀଘ୍ର କିପରି ଶେଷ କରାଯିବ, ସେଉପରେ ଗୁରୁତ୍ୱ ଦିଆଯିବ । ଏଥିଲାଗି ମୂଲ୍ୟାୟନ ପାଇଁ ଆବଶ୍ୟକତା ଅନୁସାରେ ଅଧିକ ଶିକ୍ଷକ ନିଯୁକ୍ତି କରାଯିବ । ସେହିପରି ମୂଲ୍ୟାୟନ କେନ୍ଦ୍ର ବୃଦ୍ଧି କରାଯିବ ବୋଲି କହିଛନ୍ତି ବୋର୍ଡ ସଭାପତି । ମୂଲ୍ୟାୟନକୁ ନେଇ କୌଣସି ପରୀକ୍ଷାର୍ଥୀ ବିଚଳିତ ନହେବା ପାଇଁ ପରାମର୍ଶ ଦିଆଯାଇଛି ।