ବେଣ୍ଟପଦା ଗୋଷ୍ଠୀ ସଂଘର୍ଷ ଘଟଣା, ଚିକିତ୍ସାଧୀନ ଅବସ୍ଥାରେ ଆଖି ବୁଜିଲେ ମହେନ୍ଦ୍ର

ମନୋରଞ୍ଜନ ମହାନ୍ତି, ଆଠଗଡ଼: ବେଣ୍ଟପଦା ଗୋଷ୍ଠୀ ସଂଘର୍ଷ ଘଟଣା । ଗୁରୁତର ଆହତ ହୋଇ ମେଡିକାଲରେ ଚିକିତ୍ସିତ ହେଉଥିବା ମହେନ୍ଦ୍ର ମହାନ୍ତିଙ୍କ ଶେଷରେ ମୃତ୍ୟୁ ହୋଇଛି । ଗତକାଲି କଟକର ଏକ ଘରୋଇ ମେଡିକାଲରେ ଚିକିତ୍ସାଧୀନ ଅବସ୍ଥାରେ ସେ ଆଖିବୁଜିଛନ୍ତି । ଦୀର୍ଘ ୯ ଦିନ ହେଲା ତାଙ୍କର ଚିକିତ୍ସା ଚାଲିଥିଲା । ଏହି ଗୋଷ୍ଠୀ ସଂଘର୍ଷରେ ମହେନ୍ଦ୍ର ମହାନ୍ତିଙ୍କ ପୁତୁରା ସଞ୍ଜୟ ମହାନ୍ତି ମଧ୍ୟ ଆହତ ହୋଇ ଚିକିତ୍ସିତ ହେଉଛନ୍ତି । ଅନ୍ୟପଟେ ଘଟଣାକୁ ଏତେ ଦିନ ବିତିସାରିବା ପରେ ମଧ୍ୟ ପୋଲିସ ଅଭିଯୁକ୍ତଙ୍କୁ ଗିରଫ କରିନାହିଁ । ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । 

ଗତ ୩ ତାରିଖରେ ଆଠଗଡ ଥାନା ବେଣ୍ଟପଦା ଗାଁରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଥିଲା । ଅଭିଯୋଗ ଅନୁସାରେ, ଗାଁର ଗୋପାଳ ସାହିର ୫ରୁ ୭ ଜଣ ଯୁବକ ଦଳବଦ୍ଧ ଭାବେ ମହାନ୍ତି ସାହିର ମୃତକ ମହେନ୍ଦ୍ର ମହାନ୍ତି ଓ ତାଙ୍କ ପୁତୁରା ସଞ୍ଜୟ ମହାନ୍ତିଙ୍କୁ ଆକ୍ରମଣ କରିଥିଲେ । ଏକ ଧାରୁଆ ଅସ୍ତ୍ରରେ ଉଭୟଙ୍କ ଉପରେ ଏହି ଆକ୍ରମଣ ହୋଇଥିଲା । ଗୁରୁତର ଅବସ୍ଥାରେ ଗ୍ରାମବାସୀ ଉଭୟଙ୍କୁ ଆଠଗଡ଼ ଡାକ୍ତରଖାନାରେ ଭର୍ତ୍ତି କରିଥିଲେ । ପରେ ସ୍ୱାସ୍ଥ୍ୟବସ୍ଥା ଗୁରୁତର ହେବାରୁ ମହେନ୍ଦ୍ରଙ୍କୁ କଟକର ଏକ ଘରୋଇ ମେଡିକାଲଙ୍କୁ ସ୍ଥାନାନ୍ତର କରାଯାଇଥିଲା । ତେବେ ଗତକାଲି(ରବିବାର) ମହେନ୍ଦ୍ର ମହାନ୍ତିଙ୍କ ମୃତ୍ୟୁ ହୋଇଛି । 

ଅନ୍ୟପଟେ ଏହି ଆକ୍ରମଣ ପରେ ମୃତକ ମହେନ୍ଦ୍ରଙ୍କ ଝିଅ କୁମାରୀ ଭାଗ୍ୟଶ୍ରୀ ମହାନ୍ତି ଆଠଗଡ଼ ଥାନାରେ ଅଭିଯୋଗ କରିଥିଲେ । ୪ ଜଣ ଯୁବକ ଏହି ଆକ୍ରମଣ କରିଥିବା ନିଜ ଅଭିଯୋଗ ପତ୍ରରେ ଉଲ୍ଲେଖ କରିଥିଲେ ଭାଗ୍ୟଶ୍ରୀ । ଭାଗ୍ୟଶ୍ରୀ ନିଜ ଏଫଆଇଆର କପିରେ ସ୍ପଷ୍ଟ ଭାବେ ଲେଖିଥିଲେ, ଗୋପାଳ ସାହିର ବିଭୁ ବେହେରା, ସମୀର ବେହେରା, କାଳନ୍ଦୀ ବେହେରା ଓ ଲିଜତ ବେହେରା ଘରେ ପଶି ଏଭଳି ଆକ୍ରମଣ କରିଛନ୍ତି । 

ତେବେ ଅଭିଯୋଗ କରିବାର ଏତେ ଦିନ ପରେ ମଧ୍ୟ ଆଠଗଡ଼ ପୋଲିସ ଅଭିଯୁକ୍ତଙ୍କୁ ଗିରଫ କରିନାହିଁ । ଯାହାକୁ ନେଇ ଗ୍ରାମବାସୀ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି । ମୃତକଙ୍କୁ ପରିବାର ପକ୍ଷରୁ ଅଭିଯୁକ୍ତଙ୍କୁ ତୁରନ୍ତ ଗିରଫ କରିବାକୁ ଦାବି ହୋଇଛି ।