 "ଗୋବର ବିଦ୍ୟା! କଅଁଳ କଢ଼ଙ୍କ ଖତରେ ଫୁଟୁଛି ସରଗୀଫୁଲ")
ଗଜପତି: ମହାମାରୀ କୋରୋନାରେ ସବୁଠୁ ଅଧିକ ଛାତ୍ରଛାତ୍ରୀ ପ୍ରଭାବିତ ହୋଇଛନ୍ତି। ବର୍ଷେରୁ ଅଧିକ ସମୟ ବନ୍ଦ ରହିବା ପରେ ଶିକ୍ଷାନୁଷ୍ଠାନ ଧୀରେ ଧୀରେ ଖୋଲିବା ଆରମ୍ଭ କରିଛି। କୋରୋନା କଟକଣା ଭିତରେ ଆଶ୍ରମ ଓ ସ୍କୁଲ ଖୋଲଛି। ଆଶା କରାଯାଉଛି ମହାମାରୀରେ ପିଲାଙ୍କ ଯେତିକି ପାଠ ନଷ୍ଟ ହୋଇଛି ତାହାକୁ ଶୀଘ୍ର ସୁଧାର କରାଯିବ। କିନ୍ତୁ ଗଜପତି ଜିଲ୍ଲାରେ କିଛି ଅଲଗା ହିଁ ଦୃଶ୍ୟ ଦେଖିବାକୁ ମିଳିଛି। ପାଠ ପଢାଇବା ବଦଳରେ ଶିକ୍ଷକମାନେ ପିଲାଙ୍କୁ ଗୋବର ଗୋଟେଇବାପାଇଁ ପଠାଇଛନ୍ତି।
ଆଶ୍ରମ ବିଦ୍ୟାଳୟରେ ପାଠପଢିବା ବଦଳରେ ପିଲାମାନେ ରାଜରାସ୍ତାରେ ଚାଲି ଚାଲି ଗୋବର ଆଣୁଛନ୍ତି। ବିଦ୍ୟାଳୟରୁ ଅଧକିମି ଦୂରରୁ ହାତରେ ଗୋବର ଭର୍ତ୍ତି ବାଲ୍ଟିକୁ ବହୁ କଷ୍ଟରେ ବୋହି ବୋହି ନେଉଛନ୍ତି। ଏଭଳି ଅଭାବନୀୟ ଦୃଶ୍ୟ ଆର ଉଦୟଗିରି ବ୍ଳକ ସଣ୍ଡରବା ଆଶ୍ରମ ବିଦ୍ୟାଳୟରେ ଦେଖିବାକୁ ମିଳିଛି। ବିଦ୍ୟାଳୟରେ ସରଗୀଫୁଲ କାର୍ଯ୍ୟକ୍ରମ ଆରମ୍ଭ ହୋଇଥିବା ବେଳେ ପିଲାଙ୍କୁ ଗୋବର ଆଣିବାକୁ ସାର ପଠାଇଥିବା ପିଲାମାନେ କହିଛନ୍ତି।
ମୋହନା ପାରଳାଖେମୁଣ୍ଡିକୁ ସଂଯୋଗ କରୁଥିବା ଜାତୀୟ ରାଜପଥରେ ୧୦-୧୨ ଜଣ ପିଲାଙ୍କୁ ବେପାରୁଆ ଭାବେ ଗୋବର ଅଣିବାକୁ ପଠାଯାଇଛି। ସାଥିରେ କୌଣସି ଶିକ୍ଷକ କିମ୍ବା ବିଦ୍ୟାଳୟର କର୍ମଚାରୀ ମଧ୍ଯ ଉପସ୍ଥିତ ନାହାଁନ୍ତି। ଦୁର୍ଭାଗ୍ୟବଶତଃ କୌଣସି ଅଘଟଣ ଘଟିଲେ କିଏ ଦାୟି ରହିବେ? ଅନ୍ୟପଟେ ପିଲାମାନେ ବିଦ୍ୟାଳୟରୁ ବାହାରକୁ ଯିବା ଘଟଣା ଜାଣିନଥିବା ପ୍ରଧାନ ଶିକ୍ଷକ ଯୁଦ୍ଧିଷ୍ଠୀର ଦଳାଇ କହିଛନ୍ତି। ଏପରି କି ପିଲାମାନଙ୍କୁ ଏଭଳି କାମରେ ନିୟୋଜିତ କରିବା ଠିକ ନୁହେଁ ବୋଲି ସେ କହିଛନ୍ତି।
ପିଲାମାନଙ୍କ କହିବା ଅନୁସାରେ ଖତ ଆଣିବା ପାଇଁ ଶିକ୍ଷକ ସେମାନଙ୍କୁ ପଠାଇଥିଲେ। ତେବେ କେଉଁ ଶିକ୍ଷକ ପଠାଇଥିଲେ ପିଲାମାନେ ତାଙ୍କ ନାମ କହିନାହାନ୍ତି। କନ୍ତୁ ବେପରୁଆ ଭାବେ ଛୋଟ ଛୋଟ ପିଲାଙ୍କୁ ପାଠ ନ ପଢାଇ ଗୋବର ପାଇଁ ପଠାଇବା କେତେ ଯୁକ୍ତିଯୁକ୍ତ ବୋଲି ସାଧାରଣରେ ପ୍ରଶ୍ନ ଉଠିଛି। ଅନ୍ୟପଟେ କୋରୋନା ସଂକ୍ରମଣ ପୁଣି ବୃ୍ଦ୍ଧି ପାଉଥିବା ବେଳେ ଆଶ୍ରମ ସ୍କୁଲର ପିଲାଙ୍କୁ ବାହାରକୁ ଛାଡିବା ନିଆଁକୁ ଠେଲିବା ସଙ୍ଗେ ସମାନ ବୋଲି ବୁଦ୍ଧିଜୀବୀମାନେ ମତ ପ୍ରକାଶ କରିଛନ୍ତି।
)