ଏଥର ମାସକୁ ପୂର୍ବରୁ ନିଷ୍କାସିତ ହୋଇପାରେ ହୀରାକୁଦର ପ୍ରଥମ ବନ୍ୟାଜଳ

ଅଜୟ କୁମାର ନାଥ, ସମ୍ବଲପୁର: ଉପରମୁଣ୍ଡରେ କିଛି ଭଲ ବର୍ଷା ଯୋଗୁ ହୀରାକୁଦ ନଦୀବନ୍ଧର ଜଳସ୍ତରରେ ବର୍ତ୍ତମାନ ଆଖିଦୃଶିଆ ବୃଦ୍ଧି ଘଟୁଛି । ହୀରାକୁଦ ନିୟନ୍ତ୍ରଣ କକ୍ଷ ସୂତ୍ରରୁ ମିଳିଥିବା ସୂଚନା ଅନୁସାରେ ଆଜି ସକାଳ ୮ଟା ସମୟରେ ଏହାର ଜଳସ୍ତର ୬୧୫.୫୪ ଫୁଟ ହୋଇଛି । ଭଲ ବର୍ଷା ଏବଂ ଉପର ମୁଣ୍ଡରୁ ଅଧିକ ଜଳ ପ୍ରବାହିତ ହେବା ଫଳରେ ଏଥର ନିର୍ଦ୍ଦିଷ୍ଟ ସମୟ ପୂର୍ବରୁ ଅର୍ଥାତ ଏକ ମାସ ପୂର୍ବରୁ ହୀରାକୁଦ ନଦୀ ବନ୍ଧର ପ୍ରଥମ ବନ୍ୟାଜଳ ନିଷ୍କାସନ କରାଯିବ । ଏହି ଭାବରେ ଯଦି ଉପର ମୁଣ୍ଡରୁ ଜଳପ୍ରବାହ ଜାରି ରୁହେ, ତାହା ହେଲେ ଆଗାମୀ କିଛି ଦିନ ମଧ୍ୟରେ ଏହାର ସର୍ବୋଚ୍ଚ ଜଳସ୍ତର ୬୩୦ଫୁଟ ହୋଇଯାଇପାରେ ବୋଲି ବିଶେଷଜ୍ଞଙ୍କ ଠାରୁ ଜଣାପଡିଛି ।

ଏଣୁ ସେହି ଅନୁସାରେ ଏଠାରୁ ବନ୍ୟାଜଳ ନିଷ୍କାସନ ମଧ୍ୟ ହେବ ଓ ସେଥିପାଇଁ ତଳ ଅଞ୍ଚଳରେ ବନ୍ୟାସ୍ଥିତି ବିପନ୍ନ ହେବାର ଆଶଙ୍କା କରାଯାଉଛି । ଏଥରର ବ୍ୟତିକ୍ରମ ହେଲା ଯେ, ପୂର୍ବ ବର୍ଷ ଅପେକ୍ଷା ଏଥର ନଦୀ ବନ୍ଧର ଜଳସ୍ତରରେ ରେକର୍ଡ ବୃଦ୍ଧି ଘଟିଛି । ସେଥିପାଇଁ ଆସନ୍ତା ୨୫ ତାରିଖ ଦିନ ୧୦ଟା ପରେ ଯେକୌଣସି ମୁହୂର୍ତ୍ତରେ ହୀରାକୁଦ ନଦୀ ବନ୍ଧର ପ୍ରଥମ ବନ୍ୟାଜଳ ନିଷ୍କାସନ କରାଯିବ ବୋଲି ବନ୍ଧ କର୍ତ୍ତୃପକ୍ଷ ସୂଚନା ପ୍ରଦାନ କରିଛନ୍ତି । 

Add Zee News as a Preferred Source