ସ୍କୁଲ ଗେଟ୍ ପାଚେରୀ ପଡି ଜଣେ ଛାତ୍ରୀ ମୃତ, ୨ ଗୁରୁତର

କନ୍ଧମାଳ: ଜିଲ୍ଲାର ଜି ଉଦୟଗିରି ଥାନା ଅନ୍ତର୍ଗତ ବେଲକଟି ପ୍ରାଥମିକ ବିଦ୍ୟାଳୟରେ ଆଜି ଅପରାହ୍ନରେ ଏକ ଅଭାବନୀୟ ଘଟଣା ଘଟିଯାଇଛି। ବିଦ୍ୟାଳୟର ଗେଟ ପାଚେରୀ ପଡିଯାଇ ଜଣେ ଛାତ୍ରୀଙ୍କ ମୃତ ହୋଇଥିବା ବେଳେ ଦୁଇଜଣ ଛାତ୍ରଛାତ୍ରୀ ଗୁରୁତର ଆହତ ହୋଇଛନ୍ତି। ମୃତ ଛାତ୍ରୀ ଜଣକ ବେଲକଟି ଗ୍ରାମର ସଞ୍ଜୀବ ପ୍ରଧାନଙ୍କ ୮ ବର୍ଷୀୟା ଝିଅ ରିସିକା ପ୍ରଧାନ। ଗୁରୁତର ରିତେଶ ପ୍ରଧାନ, ଶୁଭଶ୍ରୀ ପ୍ରଧାନଙ୍କୁ ଫୁଲବାଣୀ ମୁଖ୍ୟଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି।

ସୂଚନା ଅନୁଯାଇ, ବେଲକଟି ଅଙ୍ଗନବାଡ଼ି କେନ୍ଦ୍ରରେ ଆଜି ମଶାରୀ ବଣ୍ଟନ (Mosquito net)  ହେଉଥିଲା। ଏଥିପାଇଁ ଗ୍ରାମର ସବୁ ଲୋକ ଅଙ୍ଗନବାଡ଼ି କେନ୍ଦ୍ରକୁ ଯାଇଥିଲେ। ଆଉ ଏହି ସମୟରେ ରିସିକା, ରିତେଶ ଓ ଶୁଭଶ୍ରୀ ମଧ୍ୟ ସେମାନଙ୍କ ମା’ଙ୍କ ସହ ଅଙ୍ଗନବାଡ଼ି କେନ୍ଦ୍ର (Anganwadi Center)କୁ ମଶାରୀ ପାଇଁ ଯାଇଥିଲେ। ମଶାରୀ ବଣ୍ଟନ ଚାଲିଥିବା ବେଳେ ଉକ୍ତ ତିନି ଜଣ ପିଲାଏ ସ୍ଥାନୀୟ ବେଲକଟି ପ୍ରାଥମିକ ବିଦ୍ୟାଳୟ (Belkati P/s) ପରିସରକୁ ଯାଇ ଖେଳୁଥିଲେ।

Also Read: ଚଢିଗଲା ଟ୍ରକ; ବାଇକରେ ଥିଲେ ବାପା ମାଆ, ଦୁଇ ଶିଶୁ

ବିଦ୍ୟାଳୟ ପରିସରରେ ତିନି ଜଣ ପିଲା ଖେଳୁଥିବା ବେଳେ ହଠାତ୍ ତାଙ୍କ ଉପରେ ବିଦ୍ୟାଳୟର ଗେଟ ପାଚେରି ପଡ଼ି ଯାଇଥିଲା। ସ୍ଥାନୀୟ ଲୋକଙ୍କ ସହାୟତାରେ ସେମାନଙ୍କୁ ଉଦ୍ଧାର କରି ସ୍ଥାନୀୟ ଜି ଉଦୟଗିରି ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଡାକ୍ତର ସେଠାରେ ରିଷିକାକୁ ମୃତ ଘୋଷାଣ କରିଥିବା ବେଳେ ଅନ୍ୟ ଦୁଇ ଜଣ ଗୁରୁତର ଛାତ୍ରଛାତ୍ରୀଙ୍କୁ ଫୁଲବାଣୀ ମୁଖ୍ୟଚିକିତ୍ସାଳୟ (Phulbani Hospital) କୁ ସ୍ଥାନାନ୍ତର କରାଯାଇଛି।

ଏହି ଦୁର୍ଘଟଣା ପରେ ଏବେ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ସ୍କୁଲର ଗେଟ୍ ପୁରୁଣା ହୋଇଯାଇଥିଲା। ପାଚେରୀ ମଧ୍ୟ ଦୁର୍ବଳ ଥିଲା। ହେଲେ ଏବାଦରେ ସ୍କୁଲ କର୍ତ୍ତୃପକ୍ଷ ଜଣାଥିଲେ ନା ନାହିଁ? ଜଳ ଜଳ ହୋଇ ଦେଖାଯାଉଥିବା ଗେଟର ସ୍ଥିତି ଯଦି ଜଣିଥିଲେ, ତେବେ କାହିଁକି ତାକୁ ମରାମତି କରି ନଥିଲେ ବୋଲି ସାଧାରଣରେ ପ୍ରଶ୍ନ ଉଠୁଛି।