ଚିକିତ୍ସା ଅବହେଳାରୁ ଚାଲିଗଲା ମହିଳାଙ୍କ ଜୀବନ, ଅନାଥ ହୋଇଗଲେ ୪ ଭାଇଭଉଣୀ

ସମ୍ବଲପୁର: ଜିଲ୍ଲାରେ କୋରୋନା ସଂକଟ ଧୀରେଧୀରେ ଉଗ୍ରରୂପ ନେଉଛି। ଏହି ରୋଗରେ ପୀଡିତ ହୋଇ ଅନେକଙ୍କ ଜୀବନ ମଧ୍ୟ ଗଲାଣି। ତେବେ ନିକଟରେ ଜଣେ କୋରୋନା ସଂକ୍ରମିତ ମହିଳାଙ୍କ ଜୀବନ ଯାଇଥିଲା। ଆଉ ମୃତ୍ୟୁ ପରେ ସମ୍ବଲପୁରରୁ ଆସିଛି ଏକ ଅଭାବନୀୟ ଚିତ୍ର।  

କୋରୋନା ସଂକଟ ସମୟରେ ଆଗଧାଡ଼ିର ଯୋଦ୍ଧା ଭାବେ ଡାକ୍ତରମାନଙ୍କୁ ପରିଗଣିତ କରାଯାଉଛି। ମାତ୍ର ଡାକ୍ତରମାନଙ୍କ ଅବହେଳା ମଧ୍ୟ ଅଧିକାଂଶ ସମୟରେ ସାମ୍ନାକୁ ଆସିଛି। ସେହିଭଳି ଏକ ଅଭିଯୋଗ ସମ୍ବଲପୁରରୁ ଆସିଛି। ନିକଟରେ ସମ୍ବଲପୁରରେ ଜଣେ ମହିଳାଙ୍କ କୋରୋନା ଜନିତ ମୃତ୍ୟୁ ହୋଇଥିଲା। ଅଭିଯୋଗ ହେଉଛି ଯେ ଉକ୍ତ ମହିଳାଙ୍କ ଜୀବନ ଚିକିତ୍ସା ଅଭାବରୁ ଯାଇଛି। ପରବର୍ତ୍ତି ସମୟରେ ତାଙ୍କର କୋରୋନା ପଜିଟିଭ ଆସିଥିବା ନେଇ ଜଣାପଡ଼ିଛି। ତେବେ କୋରୋନା ଟେଷ୍ଟ ରିପୋର୍ଟ ନ ଆସିଥିବାରୁ ତାଙ୍କର ଚିକିତ୍ସାରେ ଅବହେଳା କରିଥିଲେ ଡାକ୍ତର ବୋଲି ଅଭିଯୋଗ ହୋଇଛି। ଫଳରେ ରିପୋର୍ଟ ଆସିବା ଭିତରେ ଗତକାଲି ଚାଲିଗଲା ମହିଳାଙ୍କ ଜୀବନ । ଦୁଇ ମାସ ପୂର୍ବେ ସ୍ୱାମୀଙ୍କ ମୃତ୍ୟୁ ହୋଇଥିଲା । ଦୁଇ ମାସ ବ୍ୟବଧାନରେ ସ୍ୱାମୀ ସ୍ତ୍ରୀଙ୍କ ମୃତ୍ୟୁ ପରେ ଅନାଥ ହୋଇଗଲେ ୪ ଭାଇଭଉଣୀ । ପରିବାର ଚଳାଇବା ପାଇଁ ପାଖରେ ଟଙ୍କାଟିଏ ନାହିଁ । ଦୁର୍ଦ୍ଦିନରେ ୪ ଅନାଥ ଭାଇଭଉଣୀ।

ସମ୍ବଲପୁର ବରେଇପାଲି ରାଣୀବନ୍ଧପଡାର ସନ୍ତୋଷିନୀ ଥାପ୍ପା । ଶ୍ୱାସ ରୋଗରେ ପୀଡିତ ଥିବାରୁ ଦୁଇ ବର୍ଷ ହେବ ଚିକିତ୍ସା ଚାଲିଥିଲା । ଗତ ଦୁଇ ଦିନ ପୁର୍ଵରୁ ତାଙ୍କର ଅବସ୍ଥା ଗୁରୁତର ହେବାରୁ ତାଙ୍କ ବଡ ଝିଅ ମନିଷା ତାଙ୍କୁ ବରଗଡର ଏକ ଘରୋଇ ଡାକ୍ତରଙ୍କ ପାଖକୁ ନେଇଥିଲେ। ସେଠାରୁ ଗୁରୁତର ଅବସ୍ଥାରେ ବରଗଡ ଡାକ୍ତରଖାନା ଓ ପରେ ବୁ୍ର୍ଲା ଆଣିଥିଲେ । ହେଲେ କୋଭିଡ ଟେଷ୍ଟ କରାଇ ଦୁଇ ଘଣ୍ଟା ଅଟକାଇ ରଖିବାରୁ ବୁ୍ର୍ଲା ବଡ ମେଡିକାଲରେ ଚିକିତ୍ସା ନପାଇ ସନ୍ତୋଷିନୀଙ୍କ ମୃତ୍ୟୁ ଘଟିଥିବା ଝିଅ ମନିଷା ଅଭିଯୋଗ କରିଛନ୍ତି । 

ସେପଟେ ଦୁଇ ଘଣ୍ଚା ପରେ ତାଙ୍କ ମା'ଙ୍କ କୋରୋନା ରିପୋର୍ଟ ନେଗେଟିଭ୍ ଆସିଥିବା ତାଙ୍କୁ ଜଣାଇ ଦିଆଗଲା ବୋଲି ମନିଷା କହିଛନ୍ତି । ତେବେ ଯଦି ମା'ଙ୍କୁ ଦୁଇ ଘଣ୍ଚା ନ ଅଟକାଇ ଚିକିତ୍ସା କରାଯାଇଥିଲେ ମା' ବଞ୍ଚିଯାଇଥାନ୍ତେ ବୋଲି  ଦୁଃଖ ବଖାଣିଛନ୍ତି ଝିଅ । ତେବେ ଦୁଇ ମାସ ବ୍ୟବଧାନରେ ମା'ବାପାଙ୍କ ମୃତ୍ୟୁ ପରେ ୪ ଭାଇଭଉଣୀ ଅନାଥ ହେବା ସହ ବଡଝିଅ ମନିଷାଙ୍କ ଉପରେ ଘରର ବୋଝ ।

ସେପଟେ ବାପା କାମ କରୁଥିବା ସିକ୍ୟୁରିଟି ସଂସ୍ଥାରେ ମନିଷାକୁ କାମ ଦେଲେ ପରିବାର ଚଳିଯାନ୍ତା ବୋଲି ଅଭାଗିନୀ ଜେଜେ ମା' କହିଛନ୍ତି । ଜେଜେମା'ଙ୍କୁ ମିଳୁଥିବା ଭତ୍ତା ଓ ୫ କେଜି ଚାଉଳ ଏମାନଙ୍କର ବର୍ତ୍ତମାନ ସବୁକିଛି । ଆର୍ଥିକ ଅଭାବରୁ ସାନ ଭଉଣୀ ପାଠପଢା ଛାଡିଲାଣି । ଆଗକୁ ଭାଇମାନଙ୍କ ପାଠପଢା କେମିତି ହେବ ଚିନ୍ତାରେ ପୁରା ପରିବାର ଓ ସାହିପଡିଶା । ତେଵେ  ବରଗଡ ମୁଖ୍ୟ ଚିକିତ୍ସାଲୟରେ ବିନା କୋଭିଡ ଟେଷ୍ଟରେ ଭର୍ତ୍ତି ହୋଇ ଚିକିତ୍ସା ହୋଇପାରିଲେ । ହେଲେ ବୁର୍ଲା ଭିମସାରରେ କାହିକି ଏତେ ବାହାନା । ଏହି ରୋଗୀଙ୍କ ମୃତ୍ୟର ଦୋଷୀ ଭିମସାର କର୍ତ୍ତୃପକ୍ଷ ହେବେ କି ବୋଲି ସାଧାରଣରେ ପ୍ରଶ୍ନ ଉଠିଛି ।