କୋରୋନା ଯୋଦ୍ଧାଙ୍କୁ କାନ୍ଧ ମିଳିଲାନି, ସାହା ହେଲେ ସାମ୍ବାଦିକ

ଗଞ୍ଜାମ: କୋରୋନା ଯୋଦ୍ଧାଙ୍କୁ ମିଳିଲାନି ଚାରି କାନ୍ଧ। ଡାକ୍ତରଖାନା ବାହାରେ ପଡ଼ିରହିଲା କୋରୋନା ଯୋଦ୍ଧାଙ୍କ ମୃତଦେହ। କୋରୋନା ସଂକଟ ସମୟରେ ମଧ୍ୟ ଦୁରେଇ ଗଲେ ସମ୍ପର୍କୀୟ। ଏପରିକି ନିଜ ପୁଅ ଓ ସ୍ତ୍ରୀ ମଧ୍ୟ ପାଖକୁ ଆସିଲେ ନାହିଁ। ଏଭଳି ଏକ ଅଭାବନୀୟ ଘଟଣା ଘଟିଛି ଗଞ୍ଜାମ ଜିଲ୍ଲାରେ।

ଗଞ୍ଜାମ ଜିଲ୍ଲା ଭଞ୍ଜନଗର କୋର୍ଟ ଏଏସଆଇ ରବୀନ୍ଦ୍ରନାଥ ବେହେରାଙ୍କ ପରଲୋକ ହୋଇଯାଇଛି । ତାଙ୍କ ମୃତ୍ୟୁ ଖବର ପ୍ରଚାରିତ ହେବାପରେ ଅଂଚଳରେ ଶୋକର ଛାୟା ଖେଳିଯାଇଛି । ସେ ପୂର୍ବରୁ କୋଦଳା ଥାନାରେ କାର୍ଯ୍ୟ କରିଛନ୍ତି ଓ ବେଗୁନିଆପଡାରେ ରହି ଆସୁଥିଲେ। ତାଙ୍କର କାର୍ଯ୍ୟକାଳ ଭିତରେ ଅଞ୍ଚଳରେ ଲୋକମାନଙ୍କ ସୁଖଦୁଃଖର ସାଥି ହୋଇ ସୁରକ୍ଷା ଦେଇ ଆସୁଥିଲେ । 

୪ ଦିନ ହେଲା ସେ କାଶ ଓ ଥଣ୍ଡାରେ ପୀଡିତ ଥିଲେ ପରେ ସେ ସ୍ୱାସ୍ଥ୍ୟ ପରୀକ୍ଷା ପାଇଁ ମେଡିକାଲ ଆସିଥିଲେ। କିନ୍ତୁ ତାଙ୍କର ସ୍ୱାସ୍ଥ୍ୟ ଅଧିକ ଖରାପ ହେବାରୁ ସେ ମୃତ୍ୟ ବରଣ କରିଛନ୍ତି। କିନ୍ତୁ କୋରୋନା ସନ୍ଦେହରେ ତାଙ୍କ ଶବକୁ କେହି ବି ଛୁଇଁନଥିବା ବେଳେ ସଂସ୍କାର ମଧ୍ୟ କରାଯାଇନାହିଁ। ରିପୋର୍ଟ ଲେଖାଯିବା ପର୍ଯ୍ୟନ୍ତ ପୁଣି କିଛି ସାମ୍ବାଦିକ ପିପିଇ କିଟ ପିନ୍ଧି ତାଙ୍କ ମୃତଦେହ ଉଠାଇଥିବା ସୂଚନା ମିଳିଛି ।

ଏପରିକି ତାଙ୍କ ନିକଟରେ ଉପସ୍ଥିତ ଥିବା ତାଙ୍କ ସ୍ତ୍ରୀ ଓ ପୁଅ ମଧ୍ୟ ଶବକୁ ଛୁଇଁନଥିବା ଜଣାପଡ଼ିଛି। କୋଦଳା ମେଡିକାଲଠାରେ ତାଙ୍କ ଶବ ପଡିଥିବା ବେଳେ ଏଯାଏଁ ସେଠାରେ ଅନ୍ୟ କୌଣସି ପଦାଧିକାରୀମାନେ ଓ ପ୍ରଶାସନିକ ଅଧିକାରୀ ଉପସ୍ଥିତ ନଥିବା ଜଣାପଡ଼ିଛି।ଏଣୁ ଏହା ଉପରେ ଦୃଷ୍ଟି ଦେବାକୁ ଦାବି ହୋଇଛି।