 "ଅନଲାଇନ ପାଠପଢାରେ ବାଧକ ସାଜିଛି ଅଶ୍ଲୀଳତା ଓ ଅନଲାଇନ ଗେମ, ଅଭିଭାବକ କ୍ଷୁବ୍ଧ")
ଶାନ୍ତସ୍ୱରୂପ ରାଉତ, ଭୁବନେଶ୍ୱର: ଦିଗହରା ଅନଲାଇନ କ୍ଲାସ୍ (On Line Class) । ମହାମାରୀ କୋରୋନା କାଳରେ ପ୍ରତ୍ୟକ୍ଷ ଶ୍ରେଣୀଗୃହ ପାଠପଢାରୁ ଛାତ୍ରଛାତ୍ରୀ ବଞ୍ଚିତ ହୋଇଥିବା ବେଳେ ଏକମାତ୍ର ମାଧ୍ୟମ ସାଜିଛି ଅନଲାଇନ ଶିକ୍ଷାଦାନ (On Teaching)। ଚଳିତ ଶିକ୍ଷାବର୍ଷ (Academic Year) ଆରମ୍ଭରୁ ଦୀର୍ଘ ଦିନ ହେବ ଅନଲାଇନ ପାଠପଢା ଚାଲିଥିବା ବେଳେ ଏବେ ମୂଳ ଉଦ୍ଦେଶ୍ୟରୁ ଦୂରେଇ ଯାଉଛି ପାଠପଢା । କାରଣ ଏଥିରେ ବାଧକ ସାଜିଛି ସୋସିଆଲ୍ ମିଡିଆ (Social Media)। ସତେ ଯେପରି ସତ୍ତା ହରାଉଛି କି ଅନଲାଇନ ଶିକ୍ଷାଦାନ?
କୋରୋନା ସଂକଟ (Corona Crisis) କାଳରେ ବର୍ତମାନ ଅନଲାଇନ କ୍ଲାସ ପାଇଁ ଅଭିଭାବକ (Guardian) ମୋବାଇଲ (Mobile), ଲାପଟପ (Lap Top), କମ୍ପ୍ୟୁଟର (Computer) ମାଧ୍ୟମରେ ଇଣ୍ଟରନେଟ୍ (Internet) ସଂଯୋଗ କରି ପିଲାଙ୍କୁ ଦେବାକୁ ପଡୁଛି । ପିଲାଏ ମଧ୍ୟ ଦୈନିକ ଘଣ୍ଟା ଘଣ୍ଟା ଧରି ଅନଲାଇନରେ ପାଠ ପଢୁଛନ୍ତି । ହେଲେ ବଡ ସମସ୍ୟା ହେଉଛି ନାନା ସୋସିଆଲ ମିଡ଼ିଆ, ଯାହା ଦ୍ୱାରା ଅନେକ ଅଶ୍ଳୀଳ ଚିତ୍ର (Pornography), ଦୃଶ୍ୟ (Scene), ଅନଲାଇନ ଭିଡିଓ ଗେମ୍ (Online Video Game) ଆଦି ଅଚାନକ ଆସୁଛି।
କିଛି ବ୍ୟକ୍ତି ବିଶେଷ ହେଉ ଅଥବା ସଂସ୍ଥା ପ୍ରମୁଖ ମନ୍ଦ ଉଦ୍ଦେଶ୍ୟ ରଖି କାମୋଦ୍ଦୀପକ, ଉତ୍ତେଜକ, ଅପ୍ରାକୃତ ଚିତ୍ର, ଦୃଶ୍ୟ ଓ ଭାଷା ଆଦି ବ୍ୟବହାର କରି ପୋଷ୍ଟ କରୁଛନ୍ତି। ଯାହାର ପ୍ରଭାବରେ କୋମଳମତି, କିଶୋର କିଶୋରୀ, ଛାତ୍ରଛାତ୍ରୀ ନକରାତ୍ମକ ଦିଗ ଆଡକୁ ମୁହାଁଉଛନ୍ତି। ଯାହାକୁ ନେଇ ଅଭିଭାବକଙ୍କ ମହଲରେ ଉଦବେଗ ପ୍ରକାଶ ପାଉଛି।
ଏହାକୁ ଗମ୍ଭୀରତାର ସହ ନେଇଛି ଓଡିଶା ଅଭିଭାବକ ମହାସଂଘ । ଏହି ସବୁ ଅଦରକାରୀ ଓ ଅଶ୍ଳୀଳ ପୋଷ୍ଟ ଓ ଆପ୍ପ୍ ତୁରନ୍ତ ବ୍ୟାନ କରିବାକୁ ରାଷ୍ଟ୍ରପତି, ପ୍ରଧାନମନ୍ତ୍ରୀ, ରାଜ୍ୟପାଳ, ମୁଖ୍ୟମନ୍ତ୍ରୀଙ୍କ ସମେତ କେନ୍ଦ୍ର ସଞ୍ଚାର, ଶିକ୍ଷାମନ୍ତ୍ରୀଙ୍କୁ ଚିଠି ଯୋଗେ ଅବଗତ କରିଛି । ଆଇଟି ବିଭାଗ (Information & Technology Department) ଦ୍ୱାରା ଅନଲାଇନ ପାଠପଠାରେ ବ୍ୟବହୃତ ଆପରୁ ଅନ୍ତତଃ ଏସବୁ ନିଷେଧ କରିବାକୁ ଦାବି କରିଛି ସଂଘ ।
ନଚେତ ଛାତ୍ରଛାତ୍ରୀଙ୍କ ଭବିଷ୍ୟତ ଓ ଅଭିଭାବକଙ୍କ ସ୍ୱାର୍ଥ ଦୃଷ୍ଟିରୁ ଆନ୍ଦୋଳନ କରିବାକୁ ପଛାଇବ ନାହିଁ ବୋଲି ଚେତାବନୀ ଦେଇଛନ୍ତି ମହାସଂଘର ଅଧ୍ୟକ୍ଷ ବାସୁଦେବ ଭଟ୍ଟ। ସେପଟେ ଏହାର ସ୍ଥାୟୀ ସମାଧାନ ଓ ପ୍ରତିକାର ଲାଗି ଶିକ୍ଷାବିତ୍, ସରକାର, ଅଭିଭାବକଙ୍କୁ ନେଇ ସ୍ୱତନ୍ତ୍ର କମିଟି ଗଠନ କରି ପାଠପଢାକୁ ବ୍ୟବସ୍ଥିତ କରିବାକୁ ମତ ଦେଇଛନ୍ତି ମନସ୍ତତ୍ୱବିତ୍ ପ୍ରତାପ ରଥ।
ମହାମାରୀ ସମୟରେ ଅନଲାଇନ ପାଠପଠାରୁ ଛାତ୍ରଛାତ୍ରୀଙ୍କୁ ଦୂରେଇବା ଅସମ୍ଭବ ହୋଇପଡିଥିବା ବେଳେ ଏପରି ଅଶ୍ଲିଳତାର ଏକ ପ୍ରକାର କୁପ୍ରଭାବ ଛାତ୍ରଛାତ୍ରୀଙ୍କ ଉପରେ ପଡୁଛି। ସାମୂହିକ ସ୍ୱାର୍ଥକୁ ଦୃଷ୍ଚିରେ ରଖି ସରକାରଙ୍କ ପକ୍ଷରୁ ଉପଯୁକ୍ତ ପଦକ୍ଷେପ ନନେଲେ ଅନଲାଇନ ପାଠପଢା ଦିଗହରା ହେବା ସୁନିଶ୍ଚିତ୍।
)