ଘାଇକୁ ନେଇ ତେଜୁଛି ରାଜନୀତି, ରାତି ଅଧରେ ଘାଇ ହେଲା କିପରି !

ଯାଜପୁର: ଯାଜପୁର ଜିଲାରେ ଦେଖାଦେଇଥିବା ବନ୍ୟାରେ ସର୍ବାଧିକ କ୍ଷତିଗ୍ରସ୍ତ ହୋଇଛି ବରୀ ବ୍ଲକ । ବ୍ରାହ୍ମଣୀ ଏବଂ ଖରସ୍ରୋତା ନଦୀ ଦ୍ୱାରା ବ୍ଲକ ସବୁଠାରୁ କ୍ଷତିଗ୍ରସ୍ତ ହୋଇ ପ୍ରାୟ ୮ଟି ଘାଇ ସୃଷ୍ଟି ହେବା ଫଳରେ ସମଗ୍ର ଅଞ୍ଚଳ ଜଳମଗ୍ନ ହୋଇଥିଲା । ଆଜି ବି ଅନେକ ଗାଁରେ ବନ୍ୟା ପାଣି ଦେଖିବାକୁ ମିଳିଛି । ତେବେ ଏତେ ସଂଖ୍ୟକ ଘାଇ ସୃଷ୍ଟି ହେବାକୁ ନେଇ ମଧ୍ୟ ଆରମ୍ଭ ହୋଇଛି ଆରୋପ ପ୍ରତ୍ୟାରୋପ । ବିଭିନ୍ନ ନଦୀରେ ସୃଷ୍ଟି ହୋଇଥିବା ଘାଇ ମନୁଷ୍ୟକୃତ ବୋଲି ବରୀର ପୂର୍ବତନ ବିଧାୟକ ଦେବାଶିଷ ନାୟକ ଅଭିଯୋଗ କରିଛନ୍ତି । ସେପଟେ ଦେବାଶିଷଙ୍କ ସ୍ୱରରେ ସ୍ୱର ମିଳାଇଛନ୍ତି ରାଜ୍ୟ ବିରୋଧୀ ଦଳ ନେତା ପ୍ରଦୀପ୍ତ ନାୟକ । ଅନ୍ୟପଟେ ଘଟଣା ସମ୍ପର୍କରେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ଯାଜପୁର ଜିଲାପାଳ ସୂଚନା ଦେଇଛନ୍ତି ।

ବରୀରେ ବନ୍ୟା ଛାଡିବା ପରେ ଆରମ୍ଭ ହୋଇଛି ଘାଇ ରାଜନୀତି । କେମିତି ହେଲା ଆଠ ଆଠଟି ଘାଇ? ଏହା ପ୍ରାକୃତିକ ଘାଇ ନା ଏହାମନୁଷ୍ୟକୃତ ? ଏହାକୁ ନେଇ ଲାଗି ରହିଛି ବାଦ ଓ ବିବାଦ । ବରୀ ବ୍ଲକ ଚତୁଃପାର୍ଶ୍ୱରେ ରହିଥିବା ବ୍ରାହ୍ମଣୀ ଓ ଖରସ୍ରୋତା ନଦୀରେ ବନ୍ୟା ଆସିବା ଫଳରେ ସୃଷ୍ଟି ହୋଇଛି ୮ଟି ଘାଇ । ଗତ ୨୦୧୧ ମସିହାରେ ଆସିଥିବା ପ୍ରଳୟଙ୍କରୀ ବନ୍ୟାରେ ମଧ୍ୟ ଏତେ ସଂଖ୍ୟକ ଘାଇ ସୃଷ୍ଟି ହୋଇନଥିବା ବେଳେ ଚଳିତ ବନ୍ୟାରେ କାହିଁକି ଏତେ ଘାଇ ସୃଷ୍ଟି ହେଲା, ତାହାକୁ ନେଇ ଏବେ ରାଜନୀତି ଆରମ୍ଭ ହୋଇ ଯାଇଛି । ଗତବନ୍ୟା ପର ଠାରୁ ଏବେ ନଦୀବନ୍ଧକୁ ଆହୁରି ଶକ୍ତ ଓ ମଜବୁତ କରାଯାଇଛି । ଏହି ଘାଇ ଗୁଡିକ ସମ୍ପୂର୍ଣ୍ଣ ଭାବେ ମନୁଷ୍ୟକୃତ ଏବଂ ସରକାରଙ୍କ କୋଟି କୋଟି ଟଙ୍କା ପାଣିରେ ପଡିଲା ବୋଲି ଅଭିଯୋଗ କରିଛନ୍ତି ବରୀର ପୂର୍ବତନ ବିଧାୟକ ଦେବାଶିଷ ନାୟକ । ଖାଲି ଦେବାଶିଷ ନୁହେଁ ଦେବାଶିଷଙ୍କ ସ୍ୱରରେ ସ୍ୱର ମିଳାଇଛନ୍ତି ରାଜ୍ୟ ବିରୋଧୀ ଦଳ ନେତା ପ୍ରଦୀପ୍ତ ନାୟକ । ସେ ବରୀ ବନ୍ୟାଞ୍ଚଳ ବୁଲିବାକୁ ଆସି ସମାନ ଅଭିଯୋଗ କରିଛନ୍ତି ।

ବନ୍ୟାଜଳ ତିନିମୁହାଣୀ ନିକଟରେ ନଦୀ ବନ୍ଧ ଠାରୁ ଢେର ତଳେ ରହିଥିଲା। ନଦୀବନ୍ଧର ସୁରକ୍ଷା ପାଇଁ ରହିଥିଲା ମୋଟା କଂକ୍ରିଟ ୱାଲ । ତଥାପି ନଦୀ ମୁହାଣରୁ ଅନେକ ଦୂରରେ ଥିବା ଏହି କଂକ୍ରିଟ୍ ୱାଲ କିପରି ଭାଙ୍ଗି ଘାଇ ସୃଷ୍ଟି କଲା ତାକୁ ନେଇ ପ୍ରଶ୍ନ କରିଛନ୍ତି ଘାଇ ମୁହଁରୁ ଅଳ୍ପକେ ବର୍ତି ଯାଇଥିବା ନିର୍ମଳ ଜେନାଙ୍କ ପରିବାର । ନିର୍ମଳଙ୍କ କହିବା ମୁତାବକ ବନ୍ୟା ରାତି ୨ଟା ପର୍ଯ୍ୟନ୍ତ ସେ ଜଗିଥିଲେ । ଶୋଇବା ପରେ ହଠାତ୍ ଏକ ଶବ୍ଦ ଶୁଭିଥିଲା ଏବଂ ଏହାପରେ ଘର ବାହାରକୁ ଆସି ଦେଖିବା ବେଳକୁ ଘାଇରେ ଚାଲୁଥିଲା ପାଣି । ତେବେ ସେହି ଉଚ୍ଚ ଶବ୍ଦ ଆସିଲା କେଉଁଠୁ? ଧର୍ମଶାଳାରେ ସୃଷ୍ଟି ହୋଇଥିବା ଘାଇ ପଛରେ ଡିନାମାଇଟ୍ ବ୍ୟବହାର ହୋଇଥିବା ଅଭିଯୋଗ ହେଉଥିବା ବେଳେ ଏଠାରେ ସମାନ ଢ଼ଙ୍ଗରେ ଘାଇ ସୃଷ୍ଟି କରାଯାଇଛି କି? ସେପଟେ ଏହି ଘଟଣା ସମ୍ପର୍କରେ ପୋଲିସ ତଦନ୍ତ କରୁଛି ଏବଂ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଯାଜପୁର ଜିଲାପାଳ ସୂଚନା ଦେଇଛନ୍ତି ।

ବରୀରେ ସୃଷ୍ଟି ହୋଇଥିବା ବିଭିନ୍ନ ଘାଇ କେବଳ ରାତି ସମୟରେ ହୋଇଥିବାରୁ ମନୁଷ୍ୟକୃତ ଘାଇ ନେଇ ସାଧାରଣରେ ସନ୍ଦେହ ବଢ଼ିବାରେ ଲାଗିଛି । ସେପଟେ ଏହି ଘାଇ ନେଇ ପୂର୍ବତନ ବିଧାୟକ ଏବଂ ରାଜ୍ୟ ବିରୋଧୀ ଦଳ ନେତା ପ୍ରଦୀପ୍ତ ନାୟକ ବନ୍ୟାଂଚଳ ଗସ୍ତ କରିବା ପରେ କରିଥିବା ଅଭିଯୋଗ ନେଇ ଚର୍ଚ୍ଚା ଜୋର ଧରିଥିବା ବେଳେ ଗୋଟିଏ ପ୍ରଶ୍ନ ସାଧାରଣରେ ଆଲୋଚନା ହେଉଛି ମନୁଷ୍ୟକୃତ ଘାଇ ସୃଷ୍ଟି ପଛରେ କାହାର ରହିଛି ହାତ?